Vlag van Bangladesj

in Wikipedia, die vrye ensiklopedie
Spring na: navigasie, soek
Vlag van Bangladesj
Vlag van  Bangladesj
Bynaam (bn) লাল-সবুজ
(af) Rooi-groen
Gebruik Nasionale vlag en vaandel Nasionale vlag en vaandel
Verhouding 3:5
Goedgekeur 13 Januarie 1972[1]
Ontwerp ’n Eenvoudige bottelgroen baan met ’n rooi skyf net links van die middel.
Ontwerp deur Quamrul Hassan

Die nasionale vlag van Bangladesj is op 13 Januarie 1972 amptelik in gebruik geneem. Die vlag vertoon ’n eenvoudige bottelgroen baan met ’n rooi skyf net links (m.a.w. na die vlagpaalkant) van middel.

Simboliek[wysig]

Volgens die CIA se Wêreldfeiteboek[2][3] stel die groen in die vlag die geilheid van die groen landskap van die land voor.[4] Die rooi skyf stel die opkomende son oor Bengale voor asook die bloed wat gevloei het van diegene wat gesterf het in die stryd om onafhanklikheid.

Ontwerp[wysig]

Die vlag word soos volg saamgestel:

Konstruksietekening

Kleure[wysig]

Volgens regeringspesifikasie[5] moet die vlag soos volg lyk:

  • Die vlag moet in bottelgroen wees en reghoekig in vorm in die verhouding 6:10 met ’n rooi skyf naby aan die middel.
  • Die rooi skyf moet ’n radius van een-vyfde van die lengte van die vlag hê. Die middel moet op die kruispunt lê van die lyn wat loodreg getrek word op nege-twintigstes van die breedte en die horisontale lyn wat deur die middel van die vlag getrek word.
  • Die groen agtergrond van die vlag moet van Procion Heldergroen H-2RS 50 dele per 1000 wees. Die rooi skyf moet van Procion Helderoranje H-2RS 60 dele per 1000 wees.
  • Afhangend van die grootte van die gebou moet vlaggroottes 3x1,8 meter, 1,52x0,91 meter of 760x460 mm wees. Die grootte van die vlag vir voertuie is 320x190 mm en die grootte van ’n tafel(staan)vlag vir bilaterale konferensies is 250x150 mm.
Kleurskema Groen Rooi
RGB 1, 121, 111 217, 56, 30
Pantone (druk) 342 C 485 C
CMYK 100-0-70-40 0-100-80-5
Heksadesimaal 01796F D9381E

Geskiedenis[wysig]

Die eerste vlag is ontwerp deur studenteleiers van Shawdhin Bangla Nucleus en is gemaak van klere wat deur die eienaar van Apollo Tailors, Bazlur Rahman Lasker, geskenk is.[6] Op 2 Maart 1971 is die eerste weergawe van die vlag vir die eerste keer in Bangladesj by die Universiteit van Dhaka gehys. Die adjunkpresident van die Dhaka Universiteit Studente-unie (DUCSU), A.S.M. Abdur Rab het die vlag gehys.[7] Die vlag is spesifiek so ontwerp om die sekelmaan en ster uit te sny omdat dit as tekens van Wes-Pakistan beskou is. Die vlag is gebaseer op ’n soortgelyke vlag wat gebruik is gedurende die onafhanklikheidsoorlog van 1971. Op dié vlag was ’n geel kaart van Bangladesh op die rooi skyf. In 1972 is die kaart van die skyf verwyder. Een rede daarvoor was omdat dit moeilik was om die vlag op die voor- en agterkante weer te gee.[2]

Protokol[wysig]

Die plek in Dhaka-universiteit waar die vlag vir die eerste keer in 1971 gehys is

Die nasionale vlag van Bangladesj word op alle werksdae vertoon op belangrike regeringsgeboue en kantore soos die president se huis, geboue van die wetgewende vergadering, alle ministeries en die sekretariaatsgeboue van Bangladesj, kantore van die hooggeregshof, distrikshowe en sessieregters, kantore van die kommissarisse van distrikte, adjunkkommissarisse/versamelaars, voorsitters, upazila parishad, sentrale en distriksgevangenisse, polisiestasies, laer- en hoërskole en ander geboue wat van tyd tot tyd deur die regering aangewys word.

Ministers en persone aan wie die status van minister verleen is, adjunkministers en persone aan wie die status van adjunkminister verleen is waar hulle buite die hoofstad reis, binne of buite die grense van Bangladesj, is geregtig om die vlag op hul motorvoertuie en vaartuie te vertoon.[8]

Amptelike wonings[wysig]

Die volgende persone moet die vlag by hul amptelike wonings vertoon:

  • Die President.
  • Die Eerste Minister.
  • Die Speaker van die Parlement.
  • Die Hoofregter van Bangladesj.
  • Kabinetsministers.
  • Hoofsweep.
  • Adjunk-Speaker van die Parlement.
  • Die Leier van die Opposisie in die Parlement.
  • Mense met die status van ’n Kabinetsminister.
  • Staatsministers.
  • Persone met die status van ’n Staatsminister.
  • Adjunkministers.
  • Persone met die status van Adjunkminister.
  • Hoofde van Diplomatieke/Konsulêre Verteenwoordiging van Bangladesj in die buiteland.
  • Voorsitters van Chittagong Hill Tracts distrikskantore van Rangamati, Khagrachari en Bandarban[8]

Voer- en vaartuie[wysig]

Die volgende persone mag die vlag op hul voer- en vaartuie vertoon:

  • Die President.
  • Die Eerste Minister.
  • Die Speaker van die Parlement.
  • Die Hoofregter van Bangladesj.
  • Kabinetsministers.
  • Hoofsweep.
  • Adjunk-Speaker van die Parlement.
  • Die Leier van die Opposisie in die Parlement.
  • Persone met die status van ’n Kabinetsminister.
  • Hoofde van Diplomatieke/Konsulêre Verteenwoordiging van Bangladesj in die buiteland.[8]

Vertoning[wysig]

Die Nasionale Vlag van Bangladesj word op die volgende dae regoor Bangladesj op openbare en privaatgeboue en op die persele van Diplomatieke Verteenwoordiging en Konsulêre Poste vertoon:

  • Onafhanklikheidsdag op 26 Maart
  • Oorwinningsdag op 16 Desember
  • Geboortedag van die Islamitiese profeet Mohammed.
  • Enige ander dag wat deur die regering van Bangladesj bepaal word.[8]

Halfstok[wysig]

Die Nasionale Vlag van Bangladesj word op die volgende dae halfstok gehang:

  • Nasionale Shaheed-dag, ook bekend as Internasionale Moedertaaldag, 21 Februarie
  • Nasionale Roudag op 15 Augustus
  • Alle ander dae soos deur die regering van Bangladesj bepaal.[8]

Ander vlae[wysig]

Wêreldrekord[wysig]

Op 16 Desember 2013, die 42ste Oorwinningsdag in Bangladesj, het 27 117 Bangladesji’s op die Nasionale Paradegrond in Dhaka se Sher-e-Bangla Nagar vergader en ’n “menslike vlag” geskep. Dit is as ’n Guinness Wêreldrekord opgeteken as die grootste menslike vlag in die wêreld.[9][10][11] Die deelnemers moes vir 6 minute en 16 sekondes met bordjies bo hul koppe staan om die rekord te kry.

Soortgelyke vlae[wysig]

Verwysings[wysig]

  1. (en) Bangladesj”. Flags of the World. URL besoek op 23 Februarie 2014.
  2. 2,0 2,1 (en) Vlag van Bangladesj, "Flags of the World".
  3. "Lonely Planet: Bangladesh", 4th Edition, Lonely Planet Publications, (December 2000), ISBN 0-86442-667-4.
  4. (en) Vlagbeskrywing”. Die Wêreldfeiteboek. CIA USA. URL besoek op 3 Mei 2013.
  5. (en) Vlagreëls vir die Volksrepubliek van Bangladesj, 1972 (Hersien in 2005), Regering van Bangladesj, Kabinetafdeling
  6. (en) http://www.prothom-alo.com/pachmisheli/article/98845/আমাদের_জাতীয়_পতাকা
  7. Glassie, Henry and Mahmud, Feroz. 2008. Living Traditions. Cultural Survey of Bangladesh Series-II. Asiatic Society of Bangladesh. Dhaka. p.580
  8. 8,0 8,1 8,2 8,3 8,4 (en) Vlagreëls, Volksrepubliek van Bangladesj
  9. (en) http://bdnews24.com/bangladesh/2014/01/04/bangladeshs-human-flag-in-guinness-world-records
  10. (en) http://www.banglamail24.com/english/index.php?view=details&news_type_id=1&menu_id=3&news_id=13262
  11. (en) http://bdnews24.com/bangladesh/2013/12/16/world-largest-human-flag

Eksterne skakels[wysig]

Commons-logo.svg
Wikimedia Commons het meer media verwant aan:


Hierdie artikel is in sy geheel of gedeeltelik vanuit die Engelse Wikipedia vertaal.