Vlag van Libanon

Vlag van Libanon

Vlag van Libanon
Gebruik	Nasionale vlag en vaandel
Verhouding	2:3
Goedgekeur	7 Desember 1943
Ontwerp	Drie horisontale bane in rooi, wit en rooi met ’n groen seder in die middel van die wit baan.

Die nasionale vlag van Libanon is op 7 Desember 1943 amptelik in gebruik geneem. Die vlag vertoon drie horisontale bane in rooi, wit en rooi met ’n groen seder in die middel van die wit baan.

Simboliek

Die teenwoordigheid en posisie van die seder in die middel van die vlag is direk geïnspireer deur die Libanese seders (Cedrus libani) op die berge. Die seder is ’n teken van heiligheid, ewigheid en vrede. Dit is ’n embleem van langlewendheid en het sy oorsprong in talle Bybelse verwysings.

Cedrus libani

Die seder van Libanon word 77 keer in die Bybel genoem, vernaam in Psalm 92:13 wat lui: “Die regverdige sal groei soos ’n palmboom; hy sal opgroei soos ’n seder op die Libanon” en Psalm 104:16 wat lui: “Die bome van die HERE word versadig, die seders van die Libanon wat Hy geplant het.”

In sy verwondering oor die seders van Libanon het Alphonse de Lemartine (1790–1869) tydens sy reis na die ooste saam met sy dogter Julie die volgende te sê gehad: “[d]ie seders van Libanon is die oorblyfsels van eeue en natuur, die bekendste natuurlike landmerke in die heelal. Hulle ken die geskiedenis van die aarde beter as die verhaal self.

Antoine de Saint-Exupéry (1900–1944) wat ook lief was vir die seders en Libanon in 1935 besoek het, het in sy werk Citadel geskryf “vrede is ’n lang, groeiende boom. Ons het dit nodig soos ’n seder wat hom op ’n rots vestig”.

Vir die Libanese is die seder ’n simbool van hoop, vryheid en herinnering. In 1920, in ’n teks oor die proklamasie van die Staat van Groter Libanon, is gesê: “ ’n immergroen seder is soos ’n jong volk, ’n wrede verlede ten spyt. Hoewel onderdruk, nooit verower nie, is die seder sy wekroep. Deur vereniging sal dit alle aanvalle afweer”.

Die wit van die vlag stel die sneeu as simbool van reinheid en vrede voor. Die twee rooi bane verwys na die Libanese bloedvergieting om die land teen opeenvolgende aanvallers te bewaak.

Ontwerp

Volgens Artikel 5 van die Grondwet van Libanon bestaan die Libanese vlag uit drie horisontale bane, ’n wit baan tussen twee rooi bane. Die hoogte van die wit baan is gelyk aan albei rooi bane. In die middel van die wit baan is ’n groen sederboom waarvan die bopunt aan die boonste rooi baan raak en die stam aan die onderste rooi baan; die boom neem een derde van die wit baan in beslag.

Konstruksietekening

Geskiedenis

Deur die geskiedenis van Libanon het die land, of ten minste die streek, die vlag aangeneem van die besetter (Mameluk, Ottomaanse Ryk).

Gedurende die Franse Mandaat Sirië is die Libanese vlag ontwerp deur Naoum Mukarze, die president van die Libanese Weerstandsbeweging. Dit was soortgelyk aan die driekleur vlag van Frankryk met ’n seder in die middel.

Die huidige Libanese vlag is aanvaar kort voor onafhanklikheid van Frankryk in 1943. Die vlag is vir die eerste keer geskets deur Henri Pharaon, ’n LP wat pro-onafhanklikheid was, in Saeb Salam se huis. Dit is op 7 Desember 1943 aanvaar gedurende ’n vergadering in die parlement, waar artikel 5 van die Libanese Grondwet gewysig is.

Een teorie is dat aangesien Henri Pharaon ’n jarelange kunsul in Wene, Oostenryk en vriend van die “Austro-Libanese Vereniging van Vriendskap” was, die kleure geïnspireer kan wees deur die vlag van Oostenryk. Dit kan egter ook wees dat die kleure van die vlag ontleen is aan die geografie van Libanon met die boonste rooi baan wat Berg Libanon voorstel en die onderste rooi baan wat die Anti-Libanon Gebergtes voorstel met die wit wat die Bekavallei voorstel wat tussen die twee bergreekse geleë is.

Antieke vlae van Libanon

• 
  Vlag gebruik in die Fenisise Tydperk, 3000 v.C. tot 200 n.C.
• 
  Vlag van Jerusalem, 1099 tot 1291
• 
  Vlag onder die Abbaside Kalifaat, 750 tot 1258
• 
  Vlag onder die Oemajjadiese Kalifaat, 660 tot 750
• 
  Tanoekvlag, 200 tot 400 n.C.
• 
  Vlag na die val van die Ottomaanse Ryk

Vlae van stamme gedurende die Middeleeue

• 
  Feodale vlag van die Joemblat-stam
• 
  Feodale vlag van die Aboe Kanad-stam
• 
  Feodale vlag van die Lamaite-prinses

Vlae van sultanate en emirate

• 
  Vlag van die Maanid-emiraat, 1119 tot 1697
• 
  Vlag onder die Ajjoebide Dinastie, pre-1250
• 
  Vlag onder die Mameluk-sultanaat, 1250 tot 1517
• 
  Vlag van die Sjihab Emiraat, 1697 tot 1842

Franse Mandaat van Libanon

• 
  Vlag van Groot-Libanon gedurende die Franse mandaat, 1920 tot 1943
• 
  Vlag van Groot-Libanon gedurende die Franse mandaat, 1920 tot 1943
• 
  Vlag van Groot-Libanon gedurende die Franse mandaat, 1920 tot 1943

Vlagvariante van Libanon

Die volgende is ’n lys van vlagvariante wat in Libanon gebruik word:

• 
  Ontwerp in bewaring by die Wêreldorganisasie vir Intellektuele Eiendom
• 
  Vlag soos geteken en goedgekeur deur lede van die parlement tydens die onafhanklikheidsverklaring in 1943
• 
  Vlag gebruik na WOI onder Arabiese Administrasie, 1918 tot 1920
• 
  Vlag gebruik in Deir El Kamar, hoofstad van die Maanid en vroeë Sjihab emirs, 1830
• 
  Rebellevlag gedurende die Merdai-era (Jemeniete)
• 
  Nasionale Maanid-vlag
• 
  Rebellevlag gedurende die Prins Ibrahim-era

Soortgelyke vlae

• 
  Vlag van Oostenryk
• 
  Vlag van Spanje
• 
  Vlag van Kanada
• 
  Die vlag van Nieu-Engeland gedurende die Amerikaanse Onafhanklikheidsoorlog
• 
  Vlag van Norfolkeiland

Eksterne skakels

• (en) Libanon by Flags of the World.
• (en) "Flag of Lebanon". Encyclopædia Britannica. Besoek op 27 Mei 2019.

Hierdie artikel is in sy geheel of gedeeltelik vanuit die Engelse Wikipedia vertaal.