Vlag van Nicaragua

in Wikipedia, die vrye ensiklopedie
Spring na: navigasie, soek
Vlag van Nicaragua
Vlag van  Nicaragua
Gebruik Nasionale vlag en vaandel Nasionale vlag en vaandel
Verhouding 3:5
Goedgekeur 27 Augustus 1971
Ontwerp Drie horisontale bane in blou, wit en blou met die landswapen in die middel van die wit baan.

Die nasionale vlag van Nicaragua is op 20 Mei 1902 amptelik in gebruik geneem. Die vlag vertoon drie horisontale bane in blou, wit en blou met die landswapen van Nicaragua in die middel van die vlag.

Simboliek[wysig]

Nicaragua het van 1823 tot die burgeroorlog van 1838-1840 deel uitgemaak van die Verenigde State van Sentraal-Amerika wat vanaf 1825 bekend gestaan het as die Federale Republiek van Sentraal-Amerika. Net soos die ander state wat uit hierdie federasie ontstaan het nl. Costa Rica, El Salvador, Guatemala en Honduras, het Nicaragua sy vlag gebaseer op die vlag van die Verenigde State van Sentraal Amerika.

Die twee blou bane staan vir die Stille en Atlantiese Oseane waartussen Nicaragua geleë is. Die wit baan stel die land voor wat tussen die twee watermassa lê. In die middel van die wit baan is die wapen van Nicaragua wat baie herinner aan wapen van die Verenigde State van Sentraal-Amerika. die vyf vulkane in die wapen staan vir die vyf lidstate van hierdie federasie, die reënboog in die wapen stel vrede voor en die frigiese mus stel vryheid voor. Die driehoek simboliseer gelykheid.

Ontwerp[wysig]

’n Wapperende Nicaraguaanse vlag in Granada

Die vlag het ’n hoogte-breedteverhouding van 3:5,[1] waarby geld dat elk van die bane een derde van die hoogte van die vlag is.

Die blou kleur word amptelik beskryf as kobaltblou.[1]

Ander vlae[wysig]

Die huidige Nicaraguaanse vlag is op 4 September 1908 aanvaar. Op 27 Augustus 1971 is die ontwerpdetails en vlaginstruksie van die vlag amptelik vasgelê deur middel van ’n wet in die grondwet van 1987.[1]

Vlae van die Verenigde State van Sentraal-Amerika[wysig]

Die vlag van Nicaragua is afgelei van die vlag van die Verenigde State van Sentraal-Amerika, wat weer op sy beur beïnvloed is deur die vlag van Argentinië. Die Sentraal-Amerikaanse vlag het bestaan uit drie horisontale bane in blou, wit en blou met die wapen van die Verenigde State van Sentraal-Amerika in die middel van die wit baan. In die periode van die federasie se bestaan (1823-1841) het die Nicaraguaanse vlag gedien as die deelstaatvlag en die federale vlag het gedien as die nasionale vlag.

Die ander lande wat uit die federasie ontstaan het (Costa Rica, El Salvador, Guatemala en Honduras) het elk ook hul vlae op die vlag van die Verenigde State van Sentraal-Amerika gebaseer. Die vlae van hierdie lande is ook in blou, wit en blou; die uitsonderings is egter dat die vlag van Costa Rica ’n rooi baan in die wit baan gevoeg het en die vlag van Guatemala wat vertikaal is.

Vlae van die onafhanklike Nicaragua[wysig]

Nicaragua het sedert haar onafhanklikheid agtereenvolgens ’n aantal verskillende nasionale vlae gehad, waarby geld dat die presiese status van die vlae weens ’n gebrek aan dokumentasie moelik uitkenbaar is. Dit is wel duidelik dat Nicaragua, na die verkryging van onafhanklikheid, vir nog ’n redelike tyd die vlag van die Verenigde State van Sentraal-Amerika gebruik het; hierdie vlag is naamlik ook gebruik as die vlag vir die deelstaat Nicaragua binne die Verenigde State

Sommige bronne skryf ’n horisontale driekleur in wit, geel en rooi met ’n groen vulkaan in die middel toe aan Nicaragua (wat dateet uit omstreeks 1852). Of hierdie vlag werklik (deur Nicaragua) gebruik is, word egter betwyfel.[2]

Op 21 April 1854 is die eerste ‘egte’ Nicaraguaanse vlag aanvaar waaroor wel duidelikheid bestaan; dit gaan hier om ’n horisontale geel, wit en oranjebruin vlag. In die handelsvlag was die naam van die land in die middel van die wit baan vermeld. Na ’n magsoorname het die vlag in die periode tussen 1856 en 1858 de facto buite gebruik geraak, om in 1858 formeel vervang te word deur die blou, wit en blou vlag van die ontbinde federasie.[2]

Vlag van die Walkerregering

Intussen het die Amerikaanse avonturier William Walker in 1855 sy geluk in Nicaragua probeer; hy het die toenmalige hoofstad Granada aangeval en verower met hul van troepe uit León wat vyandig was teenoor Granada. Hy het homself aangestel as president van die land. Walker het ’n blou, wit en blou vlag aanvaar met ’n rooi vyfpuntige ster in die middel. In 1857 is Walker deur ’n koalisie van Mid-Amerikaanse state verslaan en uitgelewer aan die Verenigde State van Amerika. Die genoemde vlag is egter nooit amptelik aanvaar as Nicaraguaanse vlag nie, maar as die vlag van één van die partye wat in die burgeroorlog betrokke was.[2]

In 1869 is ’n blou, wit en blou vlag sonder ’n wapen aanvaar.[2] In die dekades daarna sou verskillende vlae egter in gebruik wees, dikwels deur politieke partye wat die gesag van die land oorgeneem het. Die meeste van hierdie vlae het blou, wit en blou as basis gebruik.

In 1895 het dit aan die lig gekom dat Nicaragua saam met Honduras en El Salvador die Groter Republiek van Sentraal-Amerika sou vorm; weer ’n poging om die Sentraal-Amerikaanse lande te verenig in een staat. Die vlag van die Republiek van Sentraal-Amerika was slegs een maand in 1898 in gebruik, omdat die republiek gou na die stigting tot niet gegaan het. Vyf jaar vroeër het Nicaragua weer ’n eie vlag aanvaar, bestaande uit drie bane in blou, wit en blou. In 1896 is die toenmalige wapen in die vlag geplaas; hierdie vlag is in 1908 deur die huidige vlag vervang, waaraan daar in 1971 klein wysigings aan die wapen gebring is.

Eksterne skakels[wysig]

Verwysings[wysig]

  1. 1,0 1,1 1,2 (en) Flags of the World (2006): Nicaragua, URL besoek op 18 Julie 2007.
  2. 2,0 2,1 2,2 2,3 (en) Flags of the World (2005): Nicaragua - Historical Flags, URL besoek op 19 Julie 2007.
Commons-logo.svg
Wikimedia Commons het meer media verwant aan:
Vlae van Nicaragua (kategorie)


Hierdie artikel is in sy geheel of gedeeltelik vanuit die Nederlandse Wikipedia vertaal.