Wet op Outeursreg 98 van 1978

in Wikipedia, die vrye ensiklopedie
Spring na: navigasie, soek
Wikisource
Die volledige teks van Wet op Outeursreg 98 van 1978 kan by die Afrikaanse Wikisource besigtig word, by Wet op outeursreg 98 van 1978.

Die Wet op Outeursreg 98 van 1978 is die Suid-Afrikaanse wetgewing wat daarop gemik is om wetgewing ten opsigte van outeursregtelike sake te reël en het op 1 Januarie 1979 in werking getree. Die wetgewing is sedertdien telkemale gewysig. Werke wat in aanmerking kom vir beskerming ingevolge die wetgewing sluit in: letterkundige werke, musiekwerke, artistieke werke, rolprente, klankopnames, uitsendings, programdraende seine, gepubliseerde uitgawes, rekenaarprogramme.

Termyn van Beskerming[wysig]

Die duur van beskerming op outeursreg word in Subartikel 2 van Artikel 3 van die wet uiteengesit as volg:

  • Die termyn van beskerming op letterkundige- en musiekwerke asook artistieke werke wat fotos uitsluit geld vir die lewensduur van die outeur plus 50 jaar na sy afsterwe mits verskeie handelinge (publikasie, openbare op-/uitvoering, verkoop van opnames, uitsaai) nie voor die afsterwe van so 'n outeur verrig is nie. In die geval waar sulke handelinge wel verrig word duur die beskerming op outeursreg vir vyftig jaar vanaf die einde van die jaar waarop sodanige handeling verrig is.
  • In die geval van rolprente, foto's en rekenaarprogramme geld beskerming vir 50 jaar nadat die werk met die eienaar van die outeursreg se toestemming aan die publiek beskikbaar gestel is of dit vir die eerste keer gepubliseer is. Indien nie een van bogenoemde gebeurtenisse plaasgevind het nie geld beskerming vir 'n tydperk van 50 jaar na vervaardiging van sodanige werk.
  • Vir klankopnames geld beskerming vir 50 jaar na publikasie.
  • Vir uitsendings geld beskerming vir 50 jaar na die eerste uitsending.
  • Vir programdraende seine geld beskerming vir 50 jaar na eerste versending na 'n satelliet.
  • Vir gepubliseerde uitgawes, vyftig jaar na die publikasie van die eerste uitgawe.

Die wet maak ook voorsiening vir die geval waar die outeur anoniem of onbekend is. 'n Belangrike bepaling is in die geval waar daar meer as een outeur bestaan in welke geval die wet bepaal dat die afsterfdatum in voorafgaande artikels geag te word as die afsterfdatum van die laaste outeur is.

Wysigings[wysig]

Die wet is verskeie kere gewysig sedert 1978 deur die volgende wysigingswette soos in die staatskoerant gepubliseer:

  • Wysigingswet op Outeursreg 56 van 1980
  • Wysigingswet op Outeursreg 66 van 1983
  • Wysigingswet op Outeursreg 52 van 1984
  • Wysigingswet op Outeursreg 39 van 1986
  • Wysigingswet op Outeursreg 13 van 1988
  • Wysigingswet op Outeursreg 61 van 1989
  • Wysigingswet op Outeursreg 125 van 1992
  • Wysigingswet op Intellektuele Goederewette 38 van 1997
  • Wysigingswet op Outeursreg 9 van 2002