Waterloo (skip)

in Wikipedia, die vrye ensiklopedie
Spring na: navigasie, soek
Skildery van die Abercrombie Robinson en die Waterloo.
Die Waterloo se wrak in Tafelbaai op 28 Augustus 1842

Die Britse seilskip Waterloo het met groot lewensverlies op 28 Augustus 1842 by die mond van die Soutrivier in Tafelbaai vergaan.

Die Waterloo van slegs 414 ton is in 1815 in Bristol gebou en was tydens hierdie vaart reeds 'n ou skip en in 'n swak toestand. Kapt. Henry Agar was in bevel op hierdie tog van Kent na Tasmanië. Aan boord was 219 bandiete, 30 sipiers, 5 vroue, 13 kinders en 34 bemanningslede. Om vars drinkwater in te neem vaar die skip Tafelbaai binne en lê daar voor anker slegs 'n ½ km van die Abercrombie Robinson . 'n Besonder sterk noordwester storm met donderweer en kwaai reën het opgesteek. Met dié gevolg dat die skip se maste breek en paniek onder die opvarendes losbars. Die Waterloo breek op, mense spring in die see en verskeie van hulle word ernstig beseer deur drywende wrakstukke. Teen die middaguur was slegs die kiel van die skip oor. Ten aanskoue van die magtelose publiek op die strand verdrink binne twee uur 189 mense. Geen reddingsbote, boeie en toue was op die skip of die strand beskikbaar nie. Boonop was alle aandag toegespits op die reddingspoging by die Abercrombie Robinson. Die ander 20 skepe in die baai het maar geringe skade opgeloop.

Die triomf van die suksesvolle redding van die opvarendes van die Abercrombie Robinson enkele ure tevore word heeltemal oorskadu deur die ernstiger ramp met die Waterloo. Sedert die stranding van die Sceptre (skip) in 1799 was daar nog nie weer 'n skeepsramp met so 'n groot lewensverlies nie. By sowel die Waterloo en die Sceptre was die verbrokkeling van die skepe te wyte aan die verrotte skeepsrompe.

Twaalf dae na die stranding van die Waterloo en die Abercrombie Robinson was daar weer 'n reuse storm in Tafelbaai. Toe het van die 18 skepe in die baai verskeie gestrand, maar die lewensverlies was beperk.

Die wrak lê onder die ingepolderde grond by die Kaapstadse waterkant. In die Africana Museum is 'n skildery deur 'n onbekende kunstenaar wat die ramp van die Waterloo en die Abercrombie Robinson uitbeeld.

Bibliografie[wysig]

  • Burman, Jose: The bay of storms – Table Bay 1503-1860. Kaapstad: Human & Rousseau, 1976. ISBN 0-7981-0670-0
  • Green, Lawrence G.: South African Beachcomber. Kaapstad: Howard Timmins, 1958.
  • Potgieter, Coenraad: Skipbreuke aan ons kus. Kaapstad: Tafelberg, 1969.
  • Turner. Malcolm: Shipwrecks & salvage in South Africa – 1505 to the present. Kaapstad: Struik, 1988. ISBN 0-86977-387-9
  • Wexham, Brian: Shipwrecks of the Western Cape. Kaapstad: Howard Timmins, [1984]. ISBN 0-86978-251-7
  • www.wrecksite.eu