Webblaaier

in Wikipedia, die vrye ensiklopedie
Spring na: navigasie, soek
Voorbeeld van 'n webblaaier (Mozilla Firefox)
Die Google Chrome-webblaaier

'n Webblaaier (ook bekend as 'n webleser of webbladleser) is 'n sagtewareprogram wat gebruikers in staat stel om teks, prente en ander inligting op 'n webwerf op die Wêreldwye Web of 'n lokale netwerk te vertoon.

Teks en prente op 'n webbladsy kan skakels bevat na nader webblaaie op dieselfde of 'n ander webwerf. Webblaaiers stel gebruikers in staat om inligting vinnig en maklik te bekom oor 'n verskeidenheid bladsye en webwerwe deur die blaaie met skakels aan mekaar te verbind. Webblaaiers formatteer HTML-inligting voordat dit vertoon word; die voorkoms van 'n bladsy kan dus verskil na gelang van die bladleser wat gebruik word.

Sommige van die webblaaiers wat beskikbaar is op persoonlike rekenaars sluit in: Internet Explorer, Mozilla Firefox, Google Chrome, Safari, Opera en Netscape.

Webblaaiers word meestal gebruik om bladsye op die Wêreldwye Web te besoek, maar kan ook gebruik word om inligting vanaf webbedieners op private netwerke of 'n rekenaar se hardeskyf te sien.

Taalkeuse[wysig]

Die meeste webbedieners kan opgestel word om dokumente in die gebruiker se taalkeuse aan te stuur. Die taalvoorkeur van die gebruiker se bladleser sal dan bepaal watter dokument gesien word. Byvoorbeeld, as 'n Afrikaanse en Nederlandse bladsy beskikbaar is, maar die gebruiker verkies Afrikaans, sal die Afrikaanse blad vertoon word.