William Atherstone

in Wikipedia, die vrye ensiklopedie
Spring na: navigasie, soek
'n Bejaarde William Atherstone.

William Guybon Atherstone (Sion Hall, Nottingham, 1814 - 1898) was 'n Suid-Afrikaanse geneesheer en geoloog van Britse herkoms.

Hy kom in 1820 saam met sy gesin na die Kaapkolonie. Nege jaar later gaan hy na die Uitenhage-akademie onder dr. Rose-Innes en tree daarna by sy vader, John Atherstone, distriksgeneesheer van Albanie, in diens as leerjonge. In 1834 word hy gedurende die Sesde Grensoorlog as geneesheer van sir Harry Smith aangestel. Hy gaan studeer in Dublin, Ierland, en behaal in 1838 die graad M.D. aan die Universiteit van Heidelberg en keer terug na die Kaap, waar hy vennoot van sy vader word. In 1847 gebruik hy vir die eerste maal in Suid-Afrika eter tydens 'n operasie. Hy stel veel belang in die geologie en lewer in 1856 in Grahamstad 'n belangrike lesing oor die onderwerp. In 1867 verklaar hy dat die blink klippie wat naby Hopetown gevind is 'n diamant is en so begin die geskiedenis van diamantdelwery in Suid-Afrika. In 1874 gaan inspekteer hy die goudveld van Lydenburg en in 1881 word hy lid van die Kaapse Wetgewende Vergadering vir Grahamstad. Drie jaar later word hy benoem as lid van die Wetgewende Raad, die Kaapse koloniale kabinet van destyds. Swak sig dwing hom in 1887 om sy praktyk te laat vaar en uit die Wetgewende Vergadering te tree. Hy bly nietemin aktief en op sy aandrang word in 1891 die eerste gesondheidslaboratorium, die Colonial Bacterial Institute, gestig. In 1896 word hy verkies as voorsitter van die vierde Suid-Afrikaanse mediese kongres in Grahamstad. Hy sterf twee jaar later.

Ter ere van hom is 'n koshuis van Rhodes-universiteit Atherstone House genoem[1].

Bronne[wysig]

  • Albertyn, dr. C.F. (red.) 1962. Die Afrikaanse Kinderensiklopedie. Kaapstad, Bloemfontein, Johannesburg: Nasionale Boekhandel Bpk.

Verwysings[wysig]