William Palmer, 2de Graaf van Selborne
William Waldegrave Palmer, 2de Graaf van Selborne (17 Oktober 1859 - 26 Februarie 1942) was 'n Britse staatsman.
Hy is in 1859 gebore as seun van die eerste Graaf van Selborne en kry sy opleiding aan die Universiteit van Oxford. In 1882 word hy sekretaris van sy vader wat destyds Lord Chanceloor was. In 1885 word hy lid van die Britse Laerhuis vir Petersfield, Hampshire. Tien jaar later erf hy sy vader se titel, word lid van die Hoërhuis en onderminister van kolonies. In 1900 word hy minister van mariene. In 1905 volg hy lord Alfred Milner op as hoë kommissaris in Suid-Afrik en goewerneur van Transvaal en die Oranje-Vrystaat. Twee jaar later stel hy met behulp van ander 'n memorandum op oor die vereniging van die Suid-Afrikaanse kolonies. Hy vertrek kort voor Uniewording in 1910 terug na Engeland, waar hy in 1915 minister van landbou word. In 1916 bedank hy egter uit die Britse regering omdat hy nie met die regering se Ierse beleid kon saamstem nie. Hy sterf in 1942.
Die Laer en Hoër Seunskool Selborne in Oos-Londen is na hom vernoem.
Bronne[wysig]
- Albertyn, dr. C.F. (red.) 1962. Die Afrikaanse Kinderensiklopedie. Kaapstad, Bloemfontein, Johannesburg: Nasionale Boekhandel Bpk.
