Die stad Wuppertal het in 1929 ontstaan na die fusie van 'n paar kleiner dorpe, elk met 'n eie sokkerspan. Wuppertaler SV is in 1954 gevorm na die samesmelting tussen TSG Vohwinkel en SSV Wuppertal.
In 1972 het die klub die Regionalliga Wes gewen en so vir die eerste (en tot dusver enigste) keer na die Bundesliga gepromoveer, waar die klub vir 3 seisoene kon meeding voor relegasie. Die eerste seisoen in die Bundesliga was die suksesvolste en die klub het in die 4de posisie geëindig nadat die klub vir 5 weke die 2de posisie beklee het. As gevolg van hierdie goeie einde kon die klub die volgende seisoen aan die UEFA-beker deelneem.
In 2004 het die klub met SV Wuppertal Borussia saamgesmelt, wat self 'n fusie was van SV Germania 1907 Wuppertal en VfL 1912 Wuppertal, wat in 1976 saamgesmelt het. Die klub het vervolgens die naam Wuppertaler SV Borussia aangeneem, maar hierdie besluit was ongewild by aanhangers. In Mei 2013 is dit weer gewysig na die oorspronklike Wuppertaler SV.
