Verkeersirkel
'n Verkeersirkel is 'n sirkulêre padkruising waar verkeer in een rigting om 'n sentrale eiland vloei en verkeer binne die kruising voorrang geniet.
Suid-Afrika[wysig | wysig bron]
- Sien ook: Padtekens in Suid-Afrika
In Suid-Afrika moet bestuurders wat 'n verkeersirkel nader, aan aankomende verkeer van regs toegee, links draai wanneer dit veilig is en kloksgewys om die sentrale eiland beweeg. Verkeersirkels word in die Suider-Afrikaanse Ontwikkelingsgemeenskap met padteken R137 aangedui. Dit is 'n bevelteken met drie wit pyle in die middel wat kloksgewys in die rondte wys. Wanneer hierdie teken nie voldoende sigbaar is nie of die verkeersirkel bestuurders mag verras, word padteken W201 aangewend om verkeer van 'n naderende sirkel te waarsku. Dit is 'n waarskuwingteken met drie swart pyle in die middel wat kloksgewys in die rondte wys.
Verkeersirkels moenie met mini-sirkels verwar word nie. Laasgenoemde word aangedui met padteken R2.2. Dit is 'n toegeeteken (SAOG-padteken R2) met drie swart pyle in die middel wat kloksgewys in die rondte wys. Mini-sirkels werk in Suid-Afrika anders as verkeersirkels in die sin dat verkeer wat eerste by die mini-sirkel aankom, voorrang geniet. Mini-sirkels werk dus in wese dieselfde as 'n vierrigtingstop.
Bronne[wysig | wysig bron]
- http://www.circles.org.za/r137.html
- http://www.circles.org.za/r2.html
- http://www.circles.org.za/w201.html
Eksterne skakels[wysig | wysig bron]
Wikimedia Commons het meer media in die kategorie Verkeersirkel.
