2017-bombardement van Alchanli

Die bombardement van Alchanli of die Alchanli-tragedie (Azerbeidjans: Alxanlı faciəsi) was die bombardement van 'n huis op die dorp Alchanli in die distrik Foezoeli van Azerbeidjan op 4 Julie 2017 deur die Armeense weermag met 82 mm- en 120 mm-mortiere. In die bombardement is die 51-jarige Azerbeidjanse burger Sahiba Goelijewa en haar 18 maande oue kleindogter, Zahra Goelijewa, gedood terwyl die 52-jarige Sarvinaz Goelijewa ernstig beseer is, maar dit oorleef het.

Reaksies

Albei kante het mekaar daarvan beskuldig dat hulle die skietstilstand oortree het. Die Armeense minister van buitelandse sake, Sjawarsj Kotsjarjan, beweer Azerbeidjan is verantwoordelik vir alle slagoffers as gevolg van die "voortdurende militêre provokasie van Nagorno-Karabach". Plaaslike owerhede van die selfverklaarde Republiek Nagorno-Karabach beweer Azerbeidjan het uit stellings naby die woongeboue van Alchanli geskiet. 'n Woordvoerder van die Azerbeidjanse verdediging, Wagif Dargahli, het hierdie bewerings ontken en gesê daar was geen militêre hoofkwartier of stellings in Alchanli tydens die bombardement nie. Op 6 Julie 2017 het die Azerbeidjanse staats- en plaaslike owerhede 'n besoek gereël van buitelandse militêre attachés wat geakkrediteer is in Azerbeidjan en verteenwoordigers van buitelandse media in Alchanli. Die Turkse ministerie van buitelandse sake, ambassadeur van Iran in Azerbeidjan, senatore en parlementslede van die Verenigde Koninkryk en Rusland het die Armeense kant veroordeel omdat hulle aanvalle op die burgerlike bevolking geloods het.