Gaan na inhoud

A Star Is Born (2018-rolprent)

in Wikipedia, die vrye ensiklopedie
A Star Is Born
Regisseur Bradley Cooper
Vervaardiger
  • Bill Gerber
  • Jon Peters
  • Bradley Cooper
  • Todd Phillips
  • Lynette Howell Taylor[1][2]
Draaiboek
  • Eric Roth
  • Bradley Cooper
  • Will Fetters
Geskoei op A Star Is Born (1937, '54 en '76)
Met
Kinematografie Matthew Libatique
Ateljee
  • Metro-Goldwyn-Mayer Pictures
  • Live Nation Productions
  • Gerber Pictures
  • Peters Entertainment
  • Joint Effort[3]
Verspreider Warner Bros. Pictures[4]
Uitgereik 31 Augustus 2018 (2018-08-31): Venesië
5 Oktober 2018 (2018-10-05): VSA
Speeltyd 136 minute
Land VSA
Taal Engels
Begroting $36 miljoen[5]
Bruto wins $436,3 miljoen[6]
IMDb-profiel

A Star Is Born is 'n Amerikaanse musiek- en romantiese dramarolprent van 2018 wat deur Bradley Cooper geregisseer en vervaardig is in sy debuut as regisseur. Die draaiboek is deur Cooper, Eric Roth en Will Fetters geskryf. Die hoofrolle word deur Cooper en Lady Gaga vertolk, met Dave Chappelle, Andrew Dice Clay en Sam Elliott as byspelers. Dit gaan oor 'n alkoholistiese musikant (Cooper) wat 'n jong sangeres (Gaga) ontdek en op haar verlief raak. Dit is die derde herverwerking van die oorspronklike A Star Is Born van 1937 ná dié in 1954 en 1976, laasgenoemde met Kris Kristofferson en Barbra Streisand.

Alec Badwin

Die première was op 31 Augustus 2018 op die Venesiese Internasioale Rolprentfees en die prent is op 5 Oktober 2018 deur Warner Bros. Pictures in Amerika uitgereik. Dit was 'n groot sukses wat wêreldwyd meer as $436 miljoen verdien het. Dit het ook groot lof ingepalm vir Cooper, Gaga en Elliott se toneelspel en Cooper se regie, sowel as vir die draaiboek, kinematografie en musiek.

Die prent het talle pryse en benoemings ontvang, insluitend agt benoemings vir Oscars (onder meer beste prent, beste akteur, beste aktrise en vir Elliot as beste manlike byspeler). Dit het die Oscar vir beste oorspronklike liedjie gewen vir "Shallow". Dit het ook vyf benoemings vir Golden Globes gekry en het die prys vir beste oorspronklike liedjie gewen vir "Shallow".

Die prent se klankbaan het 'n Bafta gewen vir beste musiek en vier Grammys uit sewe benoemings. Vir haar toneelspel en bydraes tot die klankbaan was Gaga die eerste vrou in die geskiedenis wat in een jaar 'n Oscar, Bafta, Golden Globe en Grammy gewen het. Cooper was die eerste mens in Bafta se geskiedenis wat in een jaar benoemings ontvang het vir vervaardiging, regie, skryfwerk, toneelspel en komponeerwerk.[7][8]

Akteurs

[wysig | wysig bron]
  • Bradley Cooper as Jackson "Jack" Maine, 'n gevestigde sanger en liedjieskrywer, en akoholis
  • Lady Gaga as Ally Maine, 'n sangeres en liedjieskrywer wat deur Jack ontdek word
  • Andrew Dice Clay as Ally se pa
  • Dave Chappelle as George "Noodles" Stone, 'n afgetrede musikant en Jack se beste vriend
  • Sam Elliott as Bobby Maine, Jack se ouer halfbroer en bestuurder
  • Rafi Gavron as Rez Gavron, 'n musiekvervaardiger en Ally se bestuurder
  • Anthony Ramos as Ramon, Ally se vriend
  • Drena de Niro as Paulette Stone, Noodles se vrou
  • Greg Grunberg as Phil, Jack se drywer

Daarbenewens vertolk Shangela die rol van die fopdosser-seremoniemeester, Willam Belli die rol van die fopdosser Emerald en Ron Rifkin dié van Jackson se rehabilitasieterapeut, Carl. Barry Shabaka Henley is Little Feet, Rebecca Field is Gail en Michael Harney is Wolfie, 'n vriend van Lorenzo. Lukas Nelson & Promise of the Real vertolk die rolle van Jackson se musiekgroep. Eddie Griffin is 'n plaaslike prediker en Luenell is 'n kassier. Marlon Williams, Brandi Carlile, Alec Baldwin, Halsey en Don Roy King vertolk kameerolle as hulleself. Cooper se eie hond, Charlie, is die hond wat deur Ally en Jackson aangeneem word.[9]

Storielyn

[wysig | wysig bron]

Bederwingswaarskuwing: Die storielyn en/of storie se einde volg hieronder.

Die 43-jarige Jackson "Jack" Maine, ’n country-rocksanger wat in die geheim teen alkohol- en dwelmverslawing worstel, tree by ’n konsert op. Sy vernaamste ondersteuning is Bobby, sy bestuurder en ouer halfbroer. Ná ’n vertoning gaan Jack uit vir drankies en besoek hy ’n fopdosserkroeg.

Daar sien Jack ’n huldigingsoptrede aan Édith Piaf deur die 31-jarige Ally, wat as ’n kelnerin en sanger-liedjieskrywer werk. Hy is verstom deur haar optrede, en hulle bestee die nag om te gesels. Ally bespreek haar onsuksesvolle pogings om ’n professionele musiekloopbaan na te streef. Sy deel lirieke wat sy geskryf het, en hy sê vir haar sy is ’n talentvolle liedjieskrywer en behoort haar eie materiaal op te voer. Jack nooi Ally na sy volgende vertoning. Ten spyte van haar aanvanklike weiering, woon sy dit by en sing, met Jack se aanmoediging, die liedjie "Shallow" saam met hom op die verhoog. Jack nooi Ally om op toer te gaan, en hulle raak romanties by mekaar betrokke.

In Arizona besoek Ally en Jack die plaas waar Jack grootgeword het en waar sy pa begrawe is. Hulle ontdek egter Bobby het die grond verkoop en dit is in ’n windplaas omskep. Jack, kwaad oor die verraad, val Bobby aan, waarna Bobby as sy bestuurder bedank. Voordat hy dit doen, onthul Bobby dat hy vir Jack van die verkoop vertel het, maar Jack was te dronk om dit te onthou.

Terwyl hulle op toer is, ontmoet Ally vir Rez, ’n platevervaardiger wat haar ’n kontrak aanbied. Hoewel hy duidelik gepla is, ondersteun Jack steeds haar besluit om by Rez te teken. Rez verskuif Ally se fokus weg van country na popmusiek. Jack loop een van Ally se optredes mis nadat hy in die openbaar dronk geword het. Jack herstel aan huis van sy beste vriend, George "Noodles" Stone, en maak later weer vrede met Ally. Hy vra haar om te trou met ’n geïmproviseerde ring wat van ’n lus van ’n kitaarsnaar gemaak is. Hulle trou dieselfde dag in ’n kerk waar ’n familielid van Noodles die diens lei.

Tydens Ally se optrede op Saturday Night Live raak Bobby en Jack versoen. Later baklei Ally en ’n dronk Jack oor haar groeiende artistieke sukses. Jack kritiseer Ally se nuwe beeld en musiek, aangesien haar sukses sy afnemende gewildheid oortref. By die Grammys, waar Ally in drie kategorieë benoem is, lewer ’n sigbaar dronk Jack ’n huldeblyk aan Roy Orbison. Later die aand wen sy die Grammy vir beste nuwe kunstenaar. Terwyl Ally haar aanvaardingstoespraak lewer, strompel die steeds besope Jack na haar toe, maak hom in die openbaar nat en sak bewusteloos neer. Ally se pa, Lorenzo, skel op ’n halfbewuste Jack terwyl Ally probeer om hom nugter te kry.

Jack sluit kort daarna by ’n rehabilitasieprogram aan. Hy vertel aan sy berader dat hy op die ouderdom van 12 probeer het om selfmoord te pleeg en onthul sy toenemend erger wordende tinnitus (gesuis in die ore). Jack vra Ally huilend verskoning vir sy gedrag. Terwyl hy huis toe terugkeer, erken Jack aan Bobby dat dit hy was, en nie hulle pa nie, wat hy verafgod het. Ally vra Rez om Jack saam op haar Europese toer te neem, maar Rez weier, wat Ally aanspoor om die res van die toer te kanselleer om na Jack om te sien.

Rez konfronteer Jack en beskuldig hom daarvan dat hy Ally se loopbaan byna verwoes het, en sê Jack sal beslis weer van die waterkar afval. Hy sê dit is "verleentheidswekkend" dat sy met hom getroud is. Daardie aand lieg Ally vir Jack en sê haar platemaatskappy het haar toer gekanselleer sodat sy op haar tweede album kan fokus. Jack belowe hy sal daardie aand na haar konsert kom, maar nadat Ally vertrek het, hang hy homself in hulle motorhuis op.

Die slottonele onthul ’n terugflits van Jack wat aan ’n liedjie werk oor sy liefde vir Ally wat hy nooit voltooi het nie. Ally voer dit as ’n huldeblyk aan Jack op en stel haarself vir die eerste keer bekend as Ally Maine.

Vervaardiging

[wysig | wysig bron]

Voorproduksie

[wysig | wysig bron]

Vorige herverwerkings van die oorspronklike rolprent van 1937 sluit in die een van 1954 met Judy Garland en die een van 1976 met Barbra Streisand en Kris Kristofferson in die hoofrolle. Die Bollywood-fliek Aashiqui 2 (2013) is ook deur A Star Is Born geïnspireer, maar was nie 'n herverwerking nie.[10] Die idee van 'n nuwe herverwerking dateer reeds van die 1990's.[11] In 2000 was daar gerugte dat Jamie Foxx en Oliver Stone ernstig in 'n herverwerking geïnteresseerd is.[11] Foxx het reeds met die sangeres Aaliyah en die akteur Paul Walker gesels vir die hoofrolle.[12]

Van 2011 af het verskeie mense soos Clint Eastwood planne gemaak om die prent te verfilm. Sangeresse wat oorweeg is, sluit in Beyoncé,[13] Jennifer Lopez, Rihanna, Shakira, Janelle Monáe, Selena Gomez en Demi Lovato. Van die mans wat oorweeg is, is Christian Bale, Leonardo DiCaprio, Tom Cruise, Johnny Depp en Will Smith.

Op 24 Maart 2015 het Warner Bros. Pictures aangekondig Cooper is in finale onderhandelings betrokke om sy debuut as regisseur met die prent te maak. Ondanks waarskuwings deur mense na aan hom en met die wete dat dit 'n risiko was om nog 'n herverwerking van A Star Is Born te maak, het die projek iets in hom aangevuur.[14] Cooper wou sedert sy kinderjare 'n prent regisseer, en op 40 het hy gevoel dis nou die tyd.[15]

Rolverdeling

[wysig | wysig bron]
Lady Gaga sing "La vie en rose" in 2015 op 'n konsert. Haar vertoning het Cooper laat besluit om haar 'n rol aan te bied.

Cooper het die manlike hoofrolspeler geword te midde van sy samesprekings om sy regisseursdebuut einde Maart 2016 te maak.[16] Volgens Cooper wou hy aanvanklik net die prent regisseer en nie daarin speel nie. Sy eerste keuse vir die manlike hoofrol was die musikant Jack White, maar die ateljee het die idee verwerp. Cooper het toe ingestem om self die rol te vertolk.[17]

Op 16 Augustus 2016 is aangekondig die vroulike hoofrol is Lady Gaga s'n. Die vervaardiging sou vroeg in 2017 begin.[18] Cooper het besluit om die rol vir Gaga te gee nadat hy haar "La Vie en rose" op 'n welsynkonsert sien sing het.

Hulle het dadelik begin saamwerk, sing en materiaal informeel beproef, wat bygedra het tot die dinamika tussen hulle op die skerm.[19] Gaga het maande voordat die verfilming begin het, haar hare gekleur en grimering verwyder om haar van haar openbare beeld te distansieer en beter by Ally se karakter aan te pas

Op 17 Maart 2017 het Sam Elliott by die span aangesluit in die rol van Jack se halfbroer en bestuurder.[20] In dieselfde maand het Andrew Dice Clay met samesprekings begin vir die rol van Lorenzo, Ally se pa, wat 'n komiese sy sou verskaf.[21]

Om die egtheid van die prent te vergroot het Cooper 'n paar fopdossers in klein rolle geplaas, onder andere 'n paar wat hy van Philadelphia geken het, asook Gaga se dansers, choreograaf en grimeerkunstenaars.[22]

Regie en verfilming

[wysig | wysig bron]

Cooper het klem gelê op emosionele egtheid in sy regie en gesê die prent se persoonlike besonderhede sal die storie getrouer laat voel. Gedurende emosioneel moeilike tonele het hy verkies om fisiek na aan die akteurs te bly eerder as om van videomonitors af te regisseer; hy het geglo nabyheid aan die akteurs sou hulle gewilliger maak om waagstukke te neem. Gaga het gesê dié sin van vertroue het haar tonele van konfrontasie met Cooper gevorm: Wanneer sy teenoor hom gespeel het, was sy bang vir hom en is terselfdertyd deur hom ondersteun. Vir Jackson se dronkste tonele, insluitend die Grammy-toneel, het Cooper deels in karakter gebly terwyl hy regisseer. Elliott onhou ná Jackson se belydenistoneel teenoor Bobby het Cooper die toneel klaargemaak, 'n monitor opgetel en sy regie hervat; Elliott beskryf die oomblik as dat hy Bradley die akteur sien verander het in Bradley die regisseur.[23]

Cooper afgeneem tydens 'n vertoning by die Glastonbury-fees van 2017 vir die prent se openingstoneel.

Die hoofverfilming vir A Star Is Born het op 17 April 2017 begin.[1] Die egtheid van die prent is verhoog deur konserttonele op werklike musiekfeeste met regte toeskouers te verfilm. Die sleuteloptredes is op die Stagecoach-fees in Indio, Kalifornië, tussen optredes deur Jamey Johnson en Willie Nelson verfilm. Die filmspan het net agt minute gehad om die kameras op te stel en 'n toneel te skiet.[24]

Bykomende tonele is op die Coachella- en die Glastonbury-fees geskiet.[25] Lady Gaga het op Coachella opgetree terwyl sy tussendeur tonele vir die fliek geskiet het, en dit het die span uitgebreide toegang tot die hele feesterrein gegee. Glastonbury-tonele is voor 'n skare van sowat 80 000 verfilm, met Kris Kristofferson wat die span 'n kort tydjie van vier minute gegee het om 'n toneel op die verhoog op te neem.[26][24]

Die eerste vertoning van "Shallow" op die verhoog is in die Greek Theatre in Los Angeles opgeneem, wat 'n venue in Noord-Kalifornië voorgestel het. Die meeste van die ekstras was Gaga-bewonderaars wat vir die verfilming bymekaargekry is. Cooper, Gaga, Lukas Nelson en Promise of the Real het verskeie liedjies vir die skare gesing.[27] Die eindtoneel van "I'll Never Love Again" is geskiet in die Shrine Auditorium in Los Angeles, dieselfde venue waar Judy Garland "The Man That Got Away" verfilm het vir die 1954-verwerking van A Star Is Born. Verskeie weergawes van die liedjie is in verskillende tempo's en sleutels voorberei sodat Gaga se vertoning gedurende die verfilming aangepas kon word.[28] Die Grammy-tonele is ook in die Shrine Auditorium geskiet.[25]

Die fopdossertonele is verfilm in The Virgil, 'n klein kroeg in Los Angeles wat in die fiktiewe venue Bleu Bleu omskep is.[27]

Ontvangs

[wysig | wysig bron]

Op Rotten Tomatoes is 90% van 550 resensies positief, met 'n gemiddelde punt van 8,1/10. Die webtuiste se konsensus lui: "Met sy innemende hoofrolle, bekwame regie en 'n aangrypende liefdesverhaal is A Star Is Born ’n herverwerking wat reg gedoen is – en 'n herinnering daaraan dat 'n nuwe vertelling van sommige verhale net so doeltreffend kan wees."[29] Op Metacritic kry die prent 88 uit 100 op grond van 60 resensies, wat dui op 'n "algemeen gunstige" ontvangs.[30] Gehore wat deur CinemaScore ondervra is, het die prent 'n gradering van "A" gegee op 'n skaal van A+ tot F.[31]

Alonso Duralde van The Wrap se resensie was positief. Hy het geskryf, "Cooper en Gaga is saam dinamiet; dit is 'n verhaal dié wat slaag of nie oor die sentrale verhouding en die onmiddellike chemie wat tussen hulle moet ontluik, en dié twee het dit in oorvloed." Hy het ook die musiek geprys.[32] Owen Gleiberman van die tydskrif Variety het Cooper se regie, medeskryfwerk en spel geloof, en het die film "’n transendente Hollywood-fliek" genoem.[33] Leah Greenblatt van Entertainment Weekly het die prent ’n B+ gegee en Gaga se vertolking uitgesonder. Sy het geskryf Gaga verdien "lof vir haar ingehoue, menslike vertolking op ’n klein skaal as ’n sangeres wie se kwesbaarheid as ’n regte mens ver verwyderd is van die glansryke vleisrokwaansin van haar eie verhoogpersoonlikheid."[34]

Stephanie Zacharek van die tydskrif Time het gedink die prent is beter as die vorige weergawes en het Cooper se regie, die skryfwerk sowel as die vertonings en chemie tussen Cooper en Gaga op soortgelyke wyse geloof. Sy het gesê: "Jy stap weg met ’n gevoel vir hierdie mense, gebrekkige individue wat probeer om die gebarste dele van hulleself bymekaar te hou – of om die krake van dié vir wie hulle lief is, te herstel." Sy het Gaga se vertolking as ’n "uitklophou" beskryf.[35] In die Los Angeles Times het Justin Chang Cooper geloof vir sy vars benadering tot die uitgediende formule van die 1937-fliek, sowel as vir sy regie, die toneelspel, die skryfwerk en die kinematografie.[36] Peter Travers van Rolling Stone het die rolprent 4,5 uit vyf sterre gegee en dit ’n "moderne klassieke fliek" genoem. Hy het die spel van Cooper en Gaga, asook Cooper se regie, geloof. Volgens hom was die draaiboek en die oorspronklike liedjies "naatloos" en "fantasties".[37]

Ann Hornaday van The Washington Post het die prent as "verruklik" en "oortuigend" beskryf en bygevoeg dat dit ’n "gepas siniese blik bied op die stermaakmasjinerie op sy siniesste, maar ook op sy opwindendste en bevredigendste."[38] In die Chicago Sun-Times het Richard Roeper geskryf dit is een van die beste weergawes van al die herverwerkings, sowel as een van die beste flieks van die jaar.[39]

Jennifer Michael Hecht van die webtuiste Vox het die uitbeelding van verslawing en emosionele pyn geprys, maar die selfmoordtoneel as oordrewe eksplisiet gekritiseer. Sy het aangevoer die einde loop die risiko om die mite van ’n "edelmoedige" selfmoord te versterk deur Jackson se dood uit te beeld as iets wat Ally se finale opgang moontlik maak, anders as die 1954-weergawe, waarvan die einde Esther se toekoms ná haar man se dood meer somber voorstel.[40]

Die byspelers, veral Sam Elliott, Andrew Dice Clay en Dave Chappelle, is ook deur verskeie joernaliste as "sterk" en "briljant" uitgesonder.[34][41][42]

In Augustus 2021 is berig Barbra Streisand, wat in die 1976-herverwerking van A Star Is Born gespeel het, het die 2018-prent as ’n "herverwerking van ’n herverwerking" gekritiseer en gesê dit was die "verkeerde idee".[43] Haar opmerkings het verskil van opmerkings wat sy in ’n 2018-onderhoud met Extra gemaak het, waarin sy die prent geloof en Gaga "wonderlik" genoem het.[44]

In 2021 het The Guardian die fliek op sy lys geplaas van "Herverwerkings wat die oorspronklikes oortref",[45] terwyl Variety dit in 2024 vyfde op sy lys van die "50 Grootste Romantiese Flieks van Alle Tye" geplaas het.[46]

Pryse en benoemings

[wysig | wysig bron]

Die prent het talle pryse en benoemings ontvang, insluitend agt benoemings vir Oscars (onder meer beste prent, beste akteur, beste aktrise en vir Elliot as beste manlike byspeler). Dit het die Oscar vir beste oorspronklike liedjie gewen vir "Shallow". Dit het ook vyf benoemings vir Golden Globes gekry en het die prys vir beste oorspronklike liedjie gewen vir "Shallow".

Die prent se klankbaan het 'n Bafta gewen vir beste musiek en vier Grammys uit sewe benoemings. Vir haar toneelspel en bydraes tot die klankbaan was Gaga die eerste vrou in die geskiedenis wat in een jaar 'n Oscar, Bafta, Golden Globe en Grammy gewen het. Cooper was die eerste mens in Bafta se geskiedenis wat in een jaar benoemings ontvang het vir vervaardiging, regie, skryfwerk, toneelspel en komponeerwerk.[7][8]

Top-10-lyste

[wysig | wysig bron]

A Star Is Born was op 2018 se top-10-lys van talle resensente, onder wie:[47]

  • 1ste – Chris Wasser, Irish Independent
  • 1ste – Harry Fletcher, London Evening Standard
  • 1ste – Tom Gliatto, People
  • 1ste – Owen Gleiberman, Variety
  • 2de – Complex
  • 2de – Frank Scheck, The Hollywood Reporter
  • 2de – Peter Bradshaw, The Guardian
  • 2de – The New Zealand Herald
  • 2de – Peter Travers, Rolling Stone
  • 2de – Brian Truitt, USA Today
  • 2de – Peter Debruge, Variety
  • 3de – Christopher Orr, The Atlantic
  • 3de – Robbie Collin, The Telegraph
  • 4de – David Sims, The Atlantic
  • 4de – Uproxx
  • 6de – Lindsey Bahr, Associated Press
  • 6de – Richard Roeper, Chicago Sun-Times
  • 6de – Pete Hammond, Deadline Hollywood
  • 6de – Matthew Jacobs, HuffPost
  • 6de – Olly Richards, NME
  • 6de – Quinn Hough, RogerEbert.com
  • 7de – The Independent
  • 7de – Sam C. Mac, Slant Magazine
  • 7de – Stephanie Zacharek, Time
  • 8ste – Empire
  • 8ste – Sheila O'Malley, RogerEbert.com
  • 8ste – Richard Lawson, Vanity Fair
  • 9de – Noel Murray, The A.V. Club
  • 9de – Mike Scott, The Times-Picayune
  • 10de – Jon Frosch, The Hollywood Reporter
  • 10de – Christy Lemire, RogerEbert.com
  • 10de – Emily Yoshida, Vulture
  • Top-10 (alfabeties gelys, geen rang) – IGN
  • Top-10 (alfabeties gelys, geen rang) – Kenneth Turan, Los Angeles Times
  • Top-10 (alfabeties gelys, geen rang) – NPR
  • Top-10 (alfabeties gelys, geen rang) – Nell Minow, RogerEbert.com
  • Top-10 (alfabeties gelys, geen rang) – Dana Stevens, Slate
  • Top-10 (alfabeties gelys, geen rang) – Joe Morgenstern, The Wall Street Journal

Verwysings

[wysig | wysig bron]
  1. 1 2 Perry, Spencer (17 April 2017). "First Look at Lady Gaga in A Star is Born Remake". Comingsoon.net. Geargiveer vanaf die oorspronklike op 17 April 2017. Besoek op 18 April 2017.
  2. ↑ Yang, Rachel (14 September 2018). "'A Star Is Born' Director Bradley Cooper Talks Jon Peters Allegations". Variety. Geargiveer vanaf die oorspronklike op 9 Oktober 2018. Besoek op 8 Oktober 2018.
  3. ↑ "A Star Is Born trailer with Bradley Cooper and Lady Gaga". Film-news.co.uk. 7 Junie 2018. Geargiveer vanaf die oorspronklike op 12 Junie 2018. Besoek op 8 Junie 2018.
  4. ↑ "A Star is Born". WarnerBros.com. Geargiveer vanaf die oorspronklike op 30 Oktober 2018. Besoek op 29 Oktober 2018.
  5. ↑ Kilday, Gregg (22 Augustus 2018). "How 'A Star Is Born' Re-created the "Man's World" of Music, Coachella Concert Scenes". The Hollywood Reporter. Geargiveer vanaf die oorspronklike op 18 September 2018. Besoek op 17 September 2018.
  6. ↑ "A Star Is Born (2018)". Box Office Mojo. Geargiveer vanaf die oorspronklike op 26 Oktober 2018. Besoek op 7 Februarie 2020.
  7. 1 2 Ritman, Alex (9 Januarie 2019). "Bradley Cooper, Alfonso Cuaron Make BAFTA Awards Nominations History". The Hollywood Reporter. Geargiveer vanaf die oorspronklike op 11 Desember 2024. Besoek op 14 Mei 2026.
  8. 1 2 "BAFTA Awards: 'The Favourite' Dominates With 7 Wins, But 'Roma' Claims Top Prize 2019". The Hollywood Reporter. 10 Februarie 2019. Geargiveer vanaf die oorspronklike op 11 Februarie 2019. Besoek op 10 Februarie 2019.
  9. ↑ Graff, Amy (9 Oktober 2018). "What breed is Bradley Cooper's adorable dog in 'A Star is Born?'". SFGate. Geargiveer vanaf die oorspronklike op 26 April 2026. Besoek op 26 April 2026.
  10. ↑ Noelfi, Joel (18 April 2017). "How Lady Gaga's A Star Is Born evolved with Jennifer Lopez, Beyoncé, more". Entertainment Weekly. Geargiveer vanaf die oorspronklike op 25 Augustus 2018. Besoek op 11 Oktober 2018.
  11. 1 2 "Lauryn, Mariah sought for 'A Star Is Born'". 9 Maart 2000. Geargiveer vanaf die oorspronklike op 1 Oktober 2000. Besoek op 21 April 2020.
  12. ↑ Angulo, Sandra (15 September 2000). "Jamie Foxx is planning to remake A Star Is Born". Entertainment Weekly. Geargiveer vanaf die oorspronklike op 1 April 2022. Besoek op 13 April 2024.
  13. ↑ McVey, Ciara (4 November 2018). /news/a-star-is-born-producer-why-beyonce-clint-eastwood-film-didnt-happen-1157694 "'A Star Is Born' Producer on Why Beyonce, Clint Eastwood Remake Never Happened". The Hollywood Reporter. Geargiveer vanaf die oorspronklike op 18 Augustus 2019. Besoek op 7 November 2019. {{cite news}}: Check |url= value (hulp)
  14. ↑ Stack, Tim (9 Augustus 2018). "Lady Gaga and Bradley Cooper headline A Star Is Born for EW's Fall Movie Preview". Entertainment Weekly. Geargiveer vanaf die oorspronklike op 16 Maart 2024. Besoek op 26 April 2026.{{cite magazine}}: CS1 maint: bot: original URL status unknown (link)
  15. ↑ Setoodeh, Ramin (9 September 2018). "Lady Gaga on 'A Star is Born,' Addiction and Her Gay Fans". Variety. Geargiveer vanaf die oorspronklike op 9 September 2018. Besoek op 6 Mei 2026.
  16. ↑ Bart, Peter; Fleming, Mike Jr. (2 Mei 2016). "Bart & Fleming: Bradley Cooper & Lady Gaga Road Test 'A Star Is Born' Team-Up". Deadline Hollywood. Geargiveer vanaf die oorspronklike op 5 Junie 2016. Besoek op 18 Junie 2016.
  17. ↑ Setoodeh, Ramin (13 November 2018). "Lady Gaga Will Never Be the Same After 'A Star Is Born'". Variety (in American English). Geargiveer vanaf die oorspronklike op 16 November 2018. Besoek op 1 Augustus 2018.
  18. ↑ Fleming, Mike Jr. (16 Augustus 2016). "'A Star Is Born' Gets Warner Bros Green Light; Bradley Cooper Directs, Stars With Lady Gaga". Deadline Hollywood. Geargiveer vanaf die oorspronklike op 17 Augustus 2016. Besoek op 17 Augustus 2016.
  19. ↑ "For Lady Gaga & Bradley Cooper, 'A Star Is Born' Hits Close To Home". Billboard. 1 Oktober 2018. Geargiveer vanaf die oorspronklike op 18 November 2021. Besoek op 5 Mei 2026.
  20. ↑ Busch, Anita (17 Maart 2017). "Sam Elliott Joins Bradley Cooper & Lady Gaga In 'A Star Is Born'". Deadline Hollywood. Geargiveer vanaf die oorspronklike op 8 Mei 2017. Besoek op 19 April 2017.
  21. ↑ Busch, Anita (23 Maart 2017). "Andrew Dice Clay In Negotiations To Join 'A Star Is Born' In Key Role". Deadline Hollywood. Geargiveer vanaf die oorspronklike op 13 Mei 2019. Besoek op 19 April 2017.
  22. ↑ Van Meter, Jonathan (3 Oktober 2018). "Lady Gaga Opens Up About A Star Is Born, MeToo, and a Decade in Pop". Vogue. Geargiveer vanaf die oorspronklike op 5 Mei 2026. Besoek op 8 Mei 2026.
  23. ↑ Miller, Julie (21 November 2018). "Lady Gaga Explains How Bradley Cooper Made Magic with A Star Is Born". Vanity Fair. Geargiveer vanaf die oorspronklike op 21 September 2020. Besoek op 21 September 2020.
  24. 1 2 Miller, Julie (10 September 2018). "Inside Lady Gaga and Bradley Cooper's A Star Is Born Love Fest". Vanity Fair. Geargiveer vanaf die oorspronklike op 22 November 2018. Besoek op 23 April 2026.
  25. 1 2 "Filming Locations for A Star Is Born (2018), around Los Angeles and California". The Worldwide Guide to Movie Locations. Geargiveer vanaf die oorspronklike op 23 April 2026. Besoek op 23 April 2026.
  26. ↑ Stack, Tim (9 Augustus 2018). "A Star Is Born: How they shot at Coachella, Glastonbury, and Saturday Night Live". Entertainment Weekly. Geargiveer vanaf die oorspronklike op 23 April 2026. Besoek op 23 April 2026.
  27. 1 2 Newman, Melinda (15 Oktober 2018). "How Lady Gaga & Bradley Cooper Shot At Coachella, Glastonbury & More For 'A Star Is Born': Producer Bill Gerber Explains". Billboard. Geargiveer vanaf die oorspronklike op 2 April 2026. Besoek op 2 April 2026.
  28. ↑ Hurwitz, Matt (8 Januarie 2019). "Voices From the Stage". Mix. Geargiveer vanaf die oorspronklike op 2 April 2026. Besoek op 2 April 2026.
  29. ↑ "A Star Is Born". Rotten Tomatoes. Fandango Media. Besoek op 19 Junie 2026.
  30. ↑ "A Star Is Born". Metacritic. Fandom, Inc. Besoek op 19 Junie 2026.
  31. ↑ "Find CinemaScore" (Type "Star Is Born, A" in the search box). CinemaScore. Geargiveer vanaf die oorspronklike op 13 April 2022. Besoek op 10 Oktober 2018.
  32. ↑ Duralde, Alonso (31 Augustus 2018). "A Star Is Born Film Review: Bradley Cooper and Lady Gaga Reinvigorate a Classic". The Wrap. Geargiveer vanaf die oorspronklike op 11 Oktober 2018. Besoek op 31 Augustus 2018.
  33. ↑ Gleiberman, Owen (31 Augustus 2018). "Venice Film Review: Bradley Cooper and Lady Gaga in A Star Is Born". Variety. Geargiveer vanaf die oorspronklike op 1 September 2018. Besoek op 31 Augustus 2018.
  34. 1 2 Greenblatt, Leah (31 Augustus 2018). "Lady Gaga and Bradley Cooper make (mostly) beautiful music in A Star Is Born: EW review". Entertainment Weekly. Geargiveer vanaf die oorspronklike op 1 September 2018. Besoek op 31 Augustus 2018.
  35. ↑ Zacharek, Stephanie (31 Augustus 2018). "Lady Gaga Delivers a Knockout Performance in A Star Is Born". Time. Geargiveer vanaf die oorspronklike op 31 Augustus 2018. Besoek op 14 September 2018. {{cite magazine}}: Cite has empty unknown parameter: |1= (hulp)
  36. ↑ Chang, Justin (8 September 2018). "'A Star Is Born,' 'Beautiful Boy' bring stories of love and addiction to Toronto". Los Angeles Times. Geargiveer vanaf die oorspronklike op 13 September 2018. Besoek op 14 September 2018.
  37. ↑ Travers, Peter (1 Oktober 2018). "'A Star Is Born' Review: Cooper, Lady Gaga Hit All the Right Notes". Rolling Stone. Geargiveer vanaf die oorspronklike op 2 Junie 2022. Besoek op 5 Oktober 2018.
  38. ↑ Hornaday, Ann (21 September 2018). "Bradley Cooper and Lady Gaga's hotly anticipated 'A Star is Born' is here—and it is lavishly delightful". The Washington Post. Geargiveer vanaf die oorspronklike op 10 Oktober 2018. Besoek op 6 Oktober 2018.
  39. ↑ Roeper, Richard (5 Oktober 2018). "Thrills of Bradley Cooper's 'A Star Is Born' aren't just musical". Chicago Sun-Times. Geargiveer vanaf die oorspronklike op 20 Desember 2018. Besoek op 15 Desember 2018.
  40. ↑ Michael Hecht, Jennifer (19 Februarie 2019). "Depictions of mental illness can save lives. But A Star Is Born gets one thing very wrong". Vox. Geargiveer vanaf die oorspronklike op 19 Februarie 2019. Besoek op 10 Mei 2026.
  41. ↑ Morgenstern, Joe (1 Oktober 2018). "'A Star Is Born' Review: A Brilliant Reincarnation". The Wall Street Journal. Besoek op 16 Mei 2026.
  42. ↑ Kermode, Mark (7 Oktober 2018). "A Star Is Born review – a double act to leave you star-struck". The Guardian. Besoek op 16 Mei 2026.
  43. ↑ Shanfeld, Ethan (16 Augustus 2021). "Barbra Streisand Says Lady Gaga and Bradley Cooper's 'A Star Is Born' Was 'The Wrong Idea'". Variety (in American English). Geargiveer vanaf die oorspronklike op 16 Augustus 2021. Besoek op 22 Junie 2023.
  44. ↑ (in en) Barbra Streisand Praises Lady Gaga & 'A Star Is Born', https://www.youtube.com/watch?v=NCyGzhSvEds, besoek op May 8, 2026
  45. ↑ Hans, Simran (20 Augustus 2021). "From The Fly to Casino Royale: the remakes that outshine the originals". The Guardian. Geargiveer vanaf die oorspronklike op 20 Augustus 2021. Besoek op 20 Augustus 2021.
  46. ↑ Gleiberman, Owen; Debruge, Peter (13 Februarie 2024). "The 50 Greatest Romantic Movies of All Time". Variety. Geargiveer vanaf die oorspronklike op 13 Februarie 2024. Besoek op 20 Februarie 2024.
  47. ↑ Dietz, Jason (Desember 5, 2018). "Best of 2018: Film Critic Top Ten Lists". Metacritic. Geargiveer vanaf die oorspronklike op September 21, 2019. Besoek op Desember 23, 2019.

Skakels

[wysig | wysig bron]
Ontsluit van "https://af.wikipedia.org/w/index.php?title=A_Star_Is_Born_(2018-rolprent)&oldid=2921171"