Aaron Arrowsmith

in Wikipedia, die vrye ensiklopedie
Jump to navigation Jump to search
Aaron Arrowsmith

Aaron Arrowsmith, (Winston, Durham, Engeland, 14 Julie 1750Londen, 23 April 1823) was ’n kartograaf en uitgewer van landkaarte.

Arrowsmith moes reeds op jeugdige leeftyd self die mas opkom weens sy vader se vroeë dood. Sy moeder trou weer, maar die stiefvader bring die kinders se erfdeel deur. Ná 'n skamele opleiding gaan hy omstreeks 1770 na Londen waar hy eers in die landmeetkunde en daarna as kaarttekenaar werksaam is. In 1790 publiseer hy die eerste van sy eie kaarte, wat sy lang en voortreflike reeks van ongeveer 200 landkaarte van baie dele van die aardbol inlui. Sy werk word gekenmerk deur akkuraatheid, die betroubaarheid van sy inligtingsbronne en die goeie gehalte van die gravering.

Hy word deur sy seuns, Aaron en Samuel, en sy neef John Arrowsmith (1790–1873) bygestaan. Ná Arrowsmith se dood sit die seuns die sakeonderneming voort totdat Samuel in 1839 oorlede is, toe John (wat ná die dood van sy oom op eie houtjie voortgegaan het) na die firma terugkeer en dit vir die res van sy lewe bestuur.

Belangrikste kaarte[wysig | wysig bron]

Die belangrikste kaarte van suidelike en Suid-Afrika wat deur Aarrowsmith geteken is, is "Colony Cape Good Hope from Mr Barrow's Survey", 1 Maart 1802, uitgegee deur Cadell en Davies (250 x 200 mm) waarvan 'n verdere uitgawe in 1805 gepubliseer word; "Africa", 1 November 1802, gepubliseer op vier blaaie van ongeveer 700 x 630 mm elk, waarvan twee suid van die ewenaar is. Dit is opgedra aan die "Committee and Members of the British Association for Discovery in the Interior Parts of Africa". Ander uitgawes verskyn tot in 1811. "Cape of Good Hope", 1 November 1805, is opgedra aan kapt. Carmichael Smith, R.E., gepubliseer op vier blaaie van 710 x 610 mm elk en waarvoor inligting in groot mate verkry is uit John Barrow se kaart in sy Travels, deel I, 1801. Verder is daar "Cape of Good Hope", 1 Januarie 1807 (385 x 255 mm) deur Longman, Hurst, Reese en Orme uitgegee; "Cape of Good Hope", 20 Januarie1812, wat slegs die Kaapse Skiereiland en Valsbaai op 'n groot skaal (820 x 650 mm) dek en "South Africa delineated from various documents", 10 Maart 1815 (940 x 810 mm), met 'n inlas van Delagoabaai in die onderste regterkantse hoek. "Cape of Good Hope", 1817, word deur A. Constable & Kie. in Edinburg uitgegee, met 'n heruitgawe in 1823 (250 x 200 mm). Ná Arrowsmith se dood gee sy seuns Aaron en Samuel die "Map of Cape of Good Hope", 1825 (300 x 220 mm), uit. Verdere uitgawes verskyn in 1828 en in 1845.

Arrowsmith was getroud en het minstens twee seuns gehad.

Bronne[wysig | wysig bron]