Abraham Fouché
Abraham Fouché (1889–1982) was ’n Afrikaanse digter.
Lewe en werk[wysig | wysig bron]
Abraham Fouché was op 3 April 1889 in die distrik George gebore. Hier ontvang hy sy eerste onderrig op ’n plaasskooltjie. Later is hy argitek op Mosselbaai, winkelier in Langkloof en vir dertig jaar werksaam in die versekeringsbedryf. Nadat hy die doktorsgraad in Sielkunde behaal, vestig hy hom in Linden in Johannesburg en praktiseer as ’n terapeutiese sielkundige. Hy is in 1982 oorlede.
Skryfwerk[wysig | wysig bron]
Sy kinderversies word in ’n opeenvolging van bundels versamel, eers die vroeë “Kleuterklankies” in 1938 en daarna in “Kleinverse vir kinders”, “Waterhoendertjies en ander kinderversies” en “Kinderversies”, terwyl hy in “Karetten die klipkopman” San-stories vir die jeug oorvertel.
Sy debuut as digter vir volwassenes maak hy met[1] “Tiende van die oes”.[2] Hierin bundel hy verse oor die natuurskoon en die verganklikheid van alle dinge, met die filosofiese onderbou om geleenthede aan te gryp. Die gedig “Tafels van vermenigvuldiging” word getoonset en professioneel opgeneem. Die San is die sentrale tema van sy gedigte in die bundels “Weeskinders van die hemelgod” en “Boesmanverse”, waarin hy uitvoerig gebruik maak van die beeldspraak en idioom van die San. Van sy verse word getoonset deur onder andere Stefans Grové. Sy gedigte word ook opgeneem in verskeie versamelbundels, waaronder “Groot verseboek”, “Uit ons digkuns”, “Kleuterverseboek”, “Nuwe Kleuterverseboek”, “Kleinverseboek”, “Nuwe Kleinverseboek”, “Land van sonlig en van sterre”, “Die mooiste Afrikaanse liefdesgedigte” en “Die Afrikaanse poësie in ’n duisend en enkele gedigte”.
Publikasies[wysig | wysig bron]
| Jaar | Publikasies |
|---|---|
| 1938 | Kleuterklankies |
| 1956 | Tiende van die oes |
| 1964 | Kleinverse vir kinders |
| 1965 | Waterhoendertjies en ander kinderversies |
| 1967 | Weeskinders van die hemelgod |
| 1969 | Kinderversies |
| Karetten die klipkopman | |
| 1972 | Boesmanverse |
Bronnelys[wysig | wysig bron]
Boeke[wysig | wysig bron]
- Antonissen, Rob: “Kern en tooi”. Nasou Beperk. Eerste uitgawe. Eerste druk. Elsiesrivier. 1963.
- Buning, T.J.: “Uit ons digkuns”. J.L. van Schaik-Uitgewers. Pretoria. Nuwe omgewerkte druk. 1960.
- Dekker, G.: “Afrikaanse Literatuurgeskiedenis”. Nasou Beperk. Kaapstad. Elfde druk. 1970.
- Kannemeyer, J.C.: “Geskiedenis van die Afrikaanse literatuur 1”. Academica, Pretoria en Kaapstad. Tweede druk. 1984.
- Kannemeyer, J.C.; “Geskiedenis van die Afrikaanse literatuur 2”. Academica, Pretoria, Kaapstad en Johannesburg. Eerste uitgawe. Eerste druk. 1983.
- Kannemeyer, J.C.: “Die Afrikaanse literatuur 1652-2004”. Human & Rousseau. Kaapstad en Pretoria. Eerste uitgawe .2005.
- Van Coller, H.P. (red.): “Perspektief en Profiel Deel 2”. J.L. van Schaik-Uitgewers. Pretoria. Eerste uitgawe. 1999.
Internet[wysig | wysig bron]
- Esaach: http://www.esaach.org.za/index.php?title=Fouche,_Abraham
- Steyn, Riaan. Beeld: http://152.111.1.88/argief/berigte/beeld/1994/05/30/2/1.html[dooie skakel]
- Worldcat: http://www.worldcat.org/search?q=au%3AFouche%2C+Abraham.&qt=hot_author