Gaan na inhoud

Addams Family Values

in Wikipedia, die vrye ensiklopedie
Addams Family Values
[[Beeld:
Raul Julia
Anjelica Huston
Christina Ricci
Joan Cusack
|250px|]]
Regisseur Barry Sonnenfeld
Vervaardiger Scott Rudin
Draaiboek Paul Rudnick
Met
Musiek deur Marc Shaiman
Kinematografie Donald Peterman
Ateljee Scott Rudin Productions
Verspreider Paramount Pictures
Uitgereik 1993
Speeltyd 94 minute
Land VSA
Taal Engels

Addams Family Values is 'n Amerikaanse bonatuurlike swart komedie wat deur Barry Sonnenfeld geregisseer en deur Paul Rudnick geskryf is. Dit is geskoei op die karakters wat deur Charles Addams geskep is en is die opvolg van The Addams Family van 1991. Feitlik al die hoofakteurs van die oorspronklike rolprent is weer te sien, insluitende Anjelica Huston, Raul Julia, Christopher Lloyd, Christina Ricci, Carel Struycken, Jimmy Workman en Christopher Hart. Joan Cusack en Carol Kane is ook in die prent.

In vergelyking met sy voorloper, wat in 'n mate die lawwe benadering van die TV-reeks met dieselfde naam van 1964 behou het, is Addams Family Values se humor baie donker en makaber.[1] Die rolprent gaan oor die gesin se aanpassings by die geboorte van die nuwe baba, Pubert. Verder trou oom Fester met die nuwe kinderoppasser, Debbie Jellinsky, 'n reeksmoordenaar wat beplan om hom te vermoor vir sy erfenis; en gaan Wednesday en Pugsley na 'n somerkamp.

Die prent is opgvolg deur Addams Family Reunion.

Bederwingswaarskuwing: Die storielyn of storie se einde volg hieronder.

Storielyn

[wysig | wysig bron]

Gomez en Morticia Addams het 'n baba, Pubert, en neem 'n kinderoppasser, Debbie Jellinsky, in diens om hom op te pas. Dit is ná 'n paar mislukte pogings van sy sibbes, Wednesday en Pugsley, om hom te vermoor.

Hulle weet dit nie, maar Debbie is 'n reekmoordenaar wat met ryk alleenlopers trou en hulle dan vermoor om hulle erfenis te kry. Sy verlei oom Fester, maar Wednesday raak agterdogtig. Debbie oorreed Gomez en Morticia dat Wednesday en Pugsley 'n somerkamp wil bywoon. By Kamp Chippewa word hulle gou deur die kampleiers en die snobbistiese meisie Amanda Buckman uitgesonder vir hulle makabere voorkoms en optrede.

Debbie en Fester raak verloof en trou. Op hulle wittebrood probeer sy hom vermoor deur hom dood te skok, maar misluk. Sy is gefrustreerd en verbied hom om kontak met sy familie te hê. Die Addamse is ontsteld toe hulle uitvind Pubert het in 'n blouoogbaba met rosige wange en blonde krulhare verander. Ouma Addams skryf dit toe aan hulle lewe wat op sy kop gekeer is en Gomez raak vreeslik depressief.

Ná groot moleste by Kamp Chippewa keer Pugsley en Wednesday terug huis toe in die kamp se gesteelde voertuig. Debbie probeer Fester weer vermoor deur hulle huis op te blaas, maar hy oorleef. Thing help Fester ontsnap. By die Addamse se huis vra Fester vir Gomez verskoning. Net toe daag Debbie op, hou hulle met 'n wapen aan en maak hulle in elektriese stoele vas om hulle almal te vermoor.

Die Addamse luister simpatiek na Debbie terwyl sy vertel hoe sy haar ouers vermoor het nadat hulle vir haar die verkeerde pop vir haar verjaarsdag gegee het. Sy vertel ook vir hulle hoe sy haar vorige mans vermoor het. Intussen ontsnap Pubert, wat sy ou voorkoms met swart hare en 'n snor herwin het, uit sy wiegie met 'n mes. Toe Debbie die skakelaar wil druk om die Addamse dood te skok, verbind Pubert twee los drade en herlei die elektriese stroom na Debbie sodat sy doodgeskok word. Net as bly van haar oor.

'n Ruk later vergader die Addamse en hulle familie om Pubert se eerste verjaarsdag te vier. Fester sê hy verlang soms na Debbie, maar raak verlief op Dementia, 'n nuwe kinderoppasser.

Hoofkarakters

[wysig | wysig bron]

Ontvangs

[wysig | wysig bron]

Addams Family Values was in sy openingsnaweek nommer een by die loket in Amerika met 'n inkomste van $14 117 545.[2] In die tweede week was die prent nommer twee, naas Mrs. Doubtfire, en in sy derde week nommer drie, naas Mrs. Doubtfire en A Perfect World.[3] Sy finale inkomste in die VSA en Kanada was $48 919 043, 'n aansienlike afname van die inkomste van die vorige prent van $113 502 426.[4] Internasionaal het dit $62 miljoen verdien.[5]

Ek glo vas die Addams Family is die liefdevolste en mees gekonnekteerde familie wat nog op die silwerdoek was. Hulle is vreeslik toegewy aan mekaar, toon belangstelling in wat die ander doen en bring baie gehaltetyd saam deur. Eerlikwaar, daar is nogal heelwat om oor jaloers te wees as jy na hulle kyk.

Jonathan Barkan, Bloody Disgusting, 2015[6]

Addams Family Values is goed ontvang en het beter resensies as die eerste prent gekry.[7] Op Rotten Tomatoes het dit 'n goedkeuringsyfer van 75% gekry, gebaseer op 114 resensies, met 'n gemiddelde punt van 6,7 uit 10.[8] Op Metacritic het die prent 'n punt van 61 uit 100 gekry, gebaseer op 21 resensies, wat dui op 'n "algemeen gunstige" ontvangs.[9]

Leonard Klady van Variety het gesê die storie is dun, maar dit was 'n wenner-rolverdeling.[10] Richard Schickel van Time het geskryf dit was 'n "lui" fliek en vol sêgoed wat nie eintlik snaaks is nie.[11]

Nie Gene Siskel of Roger Ebert het van die oorspronklike prent gehou nie. Siskel het dit 'n gemengde resensie gegee en gesê Sonnenfeld gee meer om oor hoe die fliek lyk as of die grappies werk. Ebert het egter 'n punt van drie uit vier gegee en gesê dit was beter as die oorspronklike fliek, wat seldsaam is. Hy het die prent aanbeveel.[12][13]

Latere reaksie

[wysig | wysig bron]

Nadat die rolprent aanvanklik met gemengde gevoelens ontvang is, het dit in die dekades sedert sy uitreiking weer lof ingeoes. Die donker humor en satire word nou geprys.[14][15][16] Ricci en Cusack se toneelspel word ook nou meer waardeer, en veral Cusack se rol het die bron geword van baie internetmemes, asook videos op YouTube wat haar spel prys.[14][16]

Verwysings

[wysig | wysig bron]
  1. ↑ Levy, David (20 Desember 1993). "Charles Addams Might Grimace at This 'Family'". Los Angeles Times. Geargiveer vanaf die oorspronklike op 3 Desember 2013. Besoek op 24 Augustus 2010.
  2. ↑ "Weekend Box Office Results for November 19–21, 1993". Box Office Mojo.
  3. ↑ "Addams Family Values (1993) - Weekend Box Office Results". Box Office Mojo. Geargiveer vanaf die oorspronklike op 4 Maart 2016. Besoek op 20 April 2020.
  4. ↑ "The Addams Family box office totals". Box Office Mojo. Geargiveer vanaf die oorspronklike op 5 Julie 2018. Besoek op 10 Oktober 2019.
  5. ↑ "Top 100 grossers worldwide, '93-94". Variety. 17 Oktober 1994. p. M-56.
  6. ↑ Barkan, Jonathan (14 April 2015). "Which Addams Family Member Are You?". Bloody Disgusting. The Collective. Geargiveer vanaf die oorspronklike op 1 Mei 2016. Besoek op 3 Februarie 2017.
  7. ↑ Brew, Simon (22 November 2019). "How 1991's The Addams Family Nearly Got Derailed". Den of Geek. Geargiveer vanaf die oorspronklike op 14 Januarie 2020. Besoek op 2 April 2018.
  8. ↑ "Addams Family Values (1993)". Rotten Tomatoes. Fandango Media. Geargiveer vanaf die oorspronklike op 7 Desember 2022. Besoek op 7 Desember 2022.
  9. ↑ "Addams Family Values Reviews". Metacritic. CBS Interactive. Geargiveer vanaf die oorspronklike op 1 Julie 2022. Besoek op 18 Junie 2022.
  10. ↑ Klady, Leonard (13 November 1993). "Addams Family Values". Variety. Besoek op 1 Januarie 2021.
  11. ↑ Schickel, Richard (29 November 1993). "Looking for Mr. Goodfather". Time. Geargiveer vanaf die oorspronklike op 4 November 2009. Besoek op 24 November 2009.
  12. ↑ "Addams Family Values". At the Movies (1986 TV program). November 20, 1993. https://siskelebert.org/?p=4942. Besoek op May 18, 2023. No. 11, season 8. 
  13. ↑ Ebert, Roger (19 November 1993). "Addams Family Values". Geargiveer vanaf die oorspronklike op 8 Desember 2017. Besoek op 27 November 2018.
  14. ↑ 14,0 14,1 Abrams, Simon (21 November 2018). "The Hidden Message of 'Addams Family Values'". The Hollywood Reporter. Geargiveer vanaf die oorspronklike op 7 September 2022. Besoek op 27 Desember 2023.
  15. ↑ Sims, David (20 November 2018). "Addams Family Values Is a Darkly Funny Thanksgiving Classic". The Atlantic. Geargiveer vanaf die oorspronklike op 27 Desember 2023. Besoek op 27 Desember 2023.
  16. ↑ 16,0 16,1 Terasaki, Kimberly (17 November 2023). "30 Years Later, 'Addams Family Values' Is Still the Best Addams Family Adaptation". The Mary Sue. Geargiveer vanaf die oorspronklike op 27 Desember 2023. Besoek op 27 Desember 2023.

Skakels

[wysig | wysig bron]
Ontsluit van "https://af.wikipedia.org/w/index.php?title=Addams_Family_Values&oldid=2733220"