Addo-olifant- Nasionale Park
| Addo-olifant- Nasionale Park | |
|---|---|
 | |
| Land | Suid-Afrika |
| Provinsie | Oos-Kaap |
| Naaste dorp | Gqeberha |
  Addo-olifant- Nasionale Park |
|
| Koördinate: 33°26′46″S 25°44′55″O / 33.44611°S 25.74861°O | |
| Oppervlak | 1 640 km2 |
| Openingsjaar | 1931 |
| Bestuursliggaam | SANParke |
| Webblad | Addo-Olifant- Nasionale Park |
Die Addo-olifant- Nasionale Park is 'n wildreservaat wat naby Gqeberha in Suid-Afrika geleë is. Die park is een van Suid-Afrika se twintig nasionale parke.
Die oorspronklike gedeelte van die park is in 1931 gestig om 'n veilige hawe vir die oorblywende elf olifante in die area te bied. Die park huisves tans meer as 600 olifante, 400 buffels, meer as 48 bedreigde swartrenosters, asook 'n verskeidenheid boksoorte. Leeus en hiënas is ook onlangs weer in die gebied hervestig. 'n Unieke spesie in die gebied is die miskruierspesie Circellium bacchus wat nie kan vlieg nie. Die diertjie het die reg-van-weg op paaie voor motors.
Die oorspronklike park is uitgebrei om die Woody Cape-natuurreservaat wat van die Sondagsrivier tot Alexandria strek in te sluit, asook 'n marienereservaat wat St. Croixeiland en Voëleiland in Algoabaai insluit. Die gebied is 'n belangrike broeihabitat vir pikkewyne en ander marienespesies. Die uitbreiding is deel van 'n plan om die park van 1 480 km² uit te brei tot 3 600 km² – die Groter Addo-olifant- Nasionale Park.
Die uitbreiding beteken dat die park vyf van Suid-Afrika se sewe biome insluit. Die park is ook waarskynlik die enigste ter wêreld wat die sogenaamde "Groot Sewe" in hul natuurlike habitat huisves (olifant, renoster, leeu, buffel, luiperd, walvis en witdoodshaai).
Die park ontvang jaarliks ongeveer 120 000 besoekers. Sowat 54% is internasionale besoekers, hoofsaaklik uit Duitsland, Nederland en die Verenigde Koninkryk.
Ruskampe
[wysig | wysig bron]Die park het vyf ruskampe asook vier ander kampe wat as konsessies bedryf word. Die hoofingang asook twee wildkykpaaie in die park is geteer, terwyl ander grondpaaie is. Die park kan ook vanaf die N2-snelweg naby Colchester bereik word.
Die verblyfkampe sluit die Addoruskamp, Spekboom-tenteruskamp, Matyholweni-ruskamp, die Langeboshutte, Narina-boskamp en Kabouga in. Hierdie kampe bied 'n verskeidenheid akkommodasie en geriewe, terwyl 'n paar op 'n spesiale ervaring van die bos gefokus is, soos die meer eksklusiewe Nyathi-ruskamp of die Spekboom-tenteruskamp.
Addoruskamp is die hoofkamp en bied 'n wye verskeidenheid akkommodasie, insluitend chalets, rondawels, kothuise en gastehuise. Dit is toegerus met 'n restaurant, swembad, winkel en 'n verligte watergat-uitkykpunt.
Nyati-konsessie
[wysig | wysig bron]Hierdie privaat konsessie-area van 14 000 hektaar is noord van die R342 roete geleë en is nie oop vir die algemene publiek nie. Nyathi-ruskamp (2017 heropen) is 12 km noord van die hoofkamp geleë, en is 'n eksklusiewe akkommodasie-opsie aan die voet van die Suurberge. Die kamp het 11 verblyfeenhede wat oor die Coerneyrivier uitkyk. Dit bied 'n meer afgesonderde ervaring en 'n ander perspektief op die natuurlewe. RiverBend Lodge bied luukse akkommodasie en aktiwiteite soos privaat wildritte, ten einde 'n meer eksklusiewe safari-ervaring te bied. Naby RiverBend is ook Long Hope Villa, 'n gerestoureerde 1900's-plaashuis wat 'n privaat safari-ervaring met eie sjef en wildvoertuig bied.
Eksterne skakels
[wysig | wysig bron]
Wikimedia Commons het meer media in die kategorie Addo-olifant- Nasionale Park.- Amptelike webwerf Geargiveer 5 September 2008 op Wayback Machine
