Adler Museum vir Geneeskunde

Die Adler Museum vir Geneeskunde in Johannesburg wy hom toe aan die geskiedenis van die geneeskunde wêreldwyd en van Suider-Afrika in die besonder.

Hierdie museum is gevestig op die kampus van die mediese skool van die Universiteit van die Witwatersrand en word hoofsaaklik gebruik vir mediese navorsing en die opleiding van geneeshere.

Die 40 000 items in die versameling bestaan uit vroeëre apparate en toestelle, dokumente, beelde, prente, medaljes sowel as ‘n biblioteek met o.a. ‘n 300 unieke boeke waarvan sekeres dateer uit die 17de eeu. Aandag word ook gegee aan die tradisionele inheemse Afrika-geneeskunde, die Europese volksgeneeskunde, die Oosterse geneeskunde, toorkuns, heksery en akupunktuur. Tipiese voorbeelde van spreekkamers van ‘n algemene praktisyn, ‘n oogkundige, ‘n tandarts en ‘n sangoma sowel as ‘n operasieteater en ‘n apteek is ingerig asook ‘n winkel van ‘n kruiedokter.

Die versameling is begin deur dr. Cyril Adler en sy vrou dr. Esther Adler. In 1968 is dit aan die publiek beskikbaar gestel en is sedert 1974 onder beheer van die universiteit.

Bibliografie

• Adler, Cyril: The Adler Museum of the History of Medicine. In: Lantern. Tydskrif vir Kennis en Kultuur. Jaargang 35, nr. 1, Januarie 1986
• Adler Museum of the History of Medicine. In: Lantern. Tydskrif vir Kennis en Kultuur. Jaargang 35, nr. 4, Desember 1986
• Fransen, Hans: Guide to the museums of Southern Africa. Kaapstad: Suid-Afrikaanse Museumvereniging, 1978
• Standard Encyclopaedia of Southern Africa, deel 7. Kaapstad: Nasou, 1972 ISBN 0-625-00323-3