Alan Shearer

Alan Shearer

Shearer in 2008
Persoonlike inligting
Geboortedatum	13 Augustus 1970 (1970-08-13)
Geboorteplek	Newcastle upon Tyne, Engeland
Lengte	1,83 m
Speelposisie	Doelskieter
Jeugloopbaan
000	Wallsend Boys Club
1986–1988	Southampton
Seniorloopbaan*
Jare	Span	Kere†	(Doele)†
1988–1992	Southampton	118	(23)
1992–1996	Blackburn Rovers	138	(112)
1996–2006	Newcastle United	303	(148)
Totaal		559	(283)
Nasionale span
1990–1992	Engeland o/21	11	(13)
1992	England B	1	(0)
1992–2000	Engeland	63	(30)
Spanne bestuur
2009	Newcastle United (tussentyds)
* Kere vir seniorklub uitgedraf en doele is net vir die plaaslike liga.. † Kere uitgedraf (Doele).

Alan Shearer (gebore 13 Augustus 1970) is ’n Engelse sokkerontleder en voormalige professionele speler wat as ’n aanvaller gespeel het. Hy word wyd beskou as een van die beste aanvallers van alle tye en een van die grootste spelers in die geskiedenis van die Premier League sedert die stigting daarvan in 1992, en hy is die liga se rekorddoelskieter met 260 doele. Hy is in 1994 deur die Football Writers' Association as Speler van die Jaar aangewys en het in 1995 die Professional Footballers' Association se Speler van die Jaar-toekenning gewen. In 1996 het hy derde geëindig in beide die Ballon d'Or en FIFA World Player of the Year-toekennings. In 2004 is hy deur Pelé in die FIFA 100-lis van die wêreld se grootste lewende spelers gelys. Shearer was een van die eerste twee spelers wat in 2021 in die Premier League Hall of Fame opgeneem is.

Shearer het sy hele loopbaan op die hoogste vlak van Engelse sokker gespeel. Hy het sy loopbaan in 1988 by Southampton begin voordat hy in 1992 na Blackburn Rovers verhuis het, waar hy homself gevestig het as een van die mees produktiewe doelskieters in Europa en die Premier League van 1994/95 gewen het. In die somer van 1996 het hy by sy tuisdorpklub Newcastle United aangesluit vir ’n destydse wêreldrekordsom van £15 miljoen, en in sy eerste seisoen het hy sy derde agtereenvolgende Premier League Golden Boot gewen. Hy het in die eindstryde van die FA-beker 1998 en 1999 gespeel, met hom as kaptein in laasgenoemde, en het uiteindelik die klub se topskieter aller tye geword. Hy het aan die einde van die 2005/06-seisoen afgetree.

Vir die Engelse nasionale span het Shearer 63 keer verskyn en 30 doele geskop. Die Europese Kampioenskap op tuisgrond in 1996 was sy grootste sukses op internasionale vlak; Engeland het die halfeindrondte bereik, en Shearer is met die UEFA Euro Golden Boot bekroon en in die Span van die Toernooi opgeneem. Hy het daarna as kaptein van Engeland opgetree tydens die Wêreldbekertoernooi in 1998 en die Europese Kampioenskap in 2000, en het daarna van internasionale sokker afgetree.

Sedert sy aftrede as speler in 2006, werk Shearer as televisieontleder vir die BBC.

Shearer is in 2001 in die Queen’s Birthday Honours tot Offisier van die Orde van die Britse Ryk (OBE) benoem, en in 2016 in die Birthday Honours tot Bevelvoerder van die Orde van die Britse Ryk (CBE) bevorder vir sy liefdadigheidswerk en gemeenskapsdiens in Noordoos-Engeland.