Aletta Coetzee

in Wikipedia, die vrye ensiklopedie
Jump to navigation Jump to search
Lettie Coetzee.

Aletta Johanna (Lettie) Coetzee (née Van Rooy, Steynsburg, Kaapkolonie, 24 Oktober 1894Pretoria, Suid-Afrika, 24 Desember 1978) was die eggenote van prof. J. Chris Coetzee, in lewe rektor van die PU vir CHO.

Herkoms[wysig | wysig bron]

Aletta was die tiende kind van A.C.A. van Rooy, die tweede oudste kind en seun uit die huwelik op 21 Maart 1855 in Brussel, België, van die stamouers van die familie van Rooy, Johannes Cornelis van Rooy (Huisseling, Noord-Brabant, Nederland, 2 November 1824Steynsburg, Kaapkolonie, 24 Januarie 1889) en Anna Francina (Anne Francoise) Holsters (Brussel, 31 Desember 1834 – Steynsburg] 28 Augustus 1904), 'n dogter van Vlaamse ouers, Charles Holsters en Petronella de Gilter.

Opleiding en huwelik[wysig | wysig bron]

Aletta van Rooy het haar opleiding op Steynsburg en Bloemfontein gehad en het haar veral op klavier toegelê waarin sy ook les gegee het. Op jeugdige ouderdom het sy haar moeder verloor, Susanna Maria Smit (24 Julie 1857Kaapstad, 22 Maart 1912) met wie haar vader op 4 Junie 1887 op Burgersdorp getroud is. In 1920 is Aletta van Rooy met Johannes Christiaan Coetzee getroud. Hy is in 1921 as dosent aan die destydse Potchefstroomse Universiteitskollege vir Christelike Hoër Onderwys benoem, en in 1925 tot professor in opvoedkunde bevorder en het in 1953 rektor van die Potchefstroomse Universiteit vir CHO geword en dit gebly tot sy aftrede in 1963. Sy voorganger as rektor was prof. Joon van Rooy, nes mev. Coetzee 'n kleinkind van die Van Rooy-stamouers.

Waardering[wysig | wysig bron]

Aletta Coetzee, haar man, rof. J. Chris Coetzee, en hul kinders: (agter) Marietjie en Louwtjie; (voor) Christie (latere professor aan die Teologiese Skool Potchefstroom) en Charl.

Deur al die jare het Aletta Coetzee haar man getrou bygestaan. Prof. Coetzee het besonder baie nagraadse studente gehad, wat hom gedurende naweke en soms ook te enige tyd kom spreek het. Sy het in stilte altyd vir hierdie besoekers reggestaan. Nadat haar man rektor geword het, het haar sosiale werksaamhede aanmerklik toegeneem. Saam met haar man is nie alleen besoek aan die groot aantal personeellede gebring nie, maar waar droefheid of blydskap of siekte in 'n huisgesin was, was prof. en mev. Coetzee van die eerste besoekers. Hierby moes menigvuldige amptelike geleenthede gereeld bygewoon word. Van begin Julie tot einde Oktober 1958 was sy saam met haar man op 'n amptelike besoek aan die Verenigde State van Amerika en Kanada. Hier moes hulle veelvuldig reis en het hulle nooit tot rus gekom nie. As moeder van 'n dogter en drie seuns het sy haar huis steeds vooropgestel. Al die jare het sy baie in musiek, in kunsnaaldwerk en in haar blomtuin belanggestel.

Kinders[wysig | wysig bron]

Uit haar huwelik met J. Chris Coetzee op 27 Maart 1920 op Aliwal-Noord is vier kinders gebore, van wie die jongste, dr. J.C. Coetzee, predikant van die Gereformeerde kerke Pietersburg (1964–1968) en Paarl (1968–1970) was en daarna professor aan die Teologiese Skool Potchefstroom van 1971 tot sy aftrede in 1998. Hy is oorlede op 10 Oktober 2002.[1] Al vier die kinders was:

  1. Lodewicus Charl (Loutjie), Potchefstroom, 25 Februarie 1925 – Pretoria 12 Junie 2010.
  2. Susanna Maria (Marietjie), Potchefstroom, 13 Desember 1930 – Pretoria, 20 Oktober 2004
  3. Antoine Charles Auguste (Charl), Potchefstroom, 2 September 1933
  4. Johannes Christiaan (Christi), Potchefstroom, 2 Mei 1936 – Potchefstroom, 10 Oktober 2002

Bronne[wysig | wysig bron]

  • (af) Die Gereformeerde Vroueblad. 1959. Die Gereformeerde vrou 1859–1959. Potchefstroom: Potchefstroom Herald.
  • (af) Die familie Van Rooy in Suid-Afrika. URL besoek op 18 November 2016.

Verwysings[wysig | wysig bron]

  1. (af) Vogel, ds. Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.