Ali Asadof

Ali Asadof
President	Ilham Alijef
Voorafgegaan deur	Nowroez Mammadof
Persoonlike besonderhede
Gebore	30 November 1956 (1956-11-30) Bakoe, Azerbeidjanse Sowjet Sosialistiese Republiek, Sowjetunie (nou Bakoe, Azerbeidjan)
Kind(ers)	2

Ali Hidajat ogloe Asadof (Azerbeidjans: Əli Hidayət oğlu Əsədov ) is gebore op 30 November 1956. Hy dien tans as eerste minister van Azerbeidjan. Hy is op 8 Oktober 2019 deur president Ilham Alijef aangestel.

Lewe

Ali Asadof is op 30 November 1956 in Bakoe gebore. In 1974 voltooi hy sy skoolloopbaan by die sekondêre skool in Bakoe en skryf in by die Plechanof Russiese Universiteit vir Ekonomie in Moskou, waar hy in 1978 gradueer. Van 1978 tot 1980 dien hy in die weermag.

In 1980 begin hy werk as hoof- laboratoriumassistent by die Instituut van Ekonomie aan die Akademie van Wetenskap van die Aserbeidjanse SSR.

Asadof sit tussen 1981 en 1984 sy studies voort aan die Instituut van Ekonomie aan die Russiese Akademie vir Wetenskap in Moskou, waar hy sy nagraadse diploma in ekonomie voltooi.

Tussen 1989 en 1995 werk hy as medeprofessor en hoof van die departement aan die Bakoe-instituut van Maatskaplike Bestuur en Politieke Wetenskap, voordat hy die politiek betree.

In die eerste Aserbeidjanse parlementêre verkiesing op 12 November 1995 word hy verkies tot verteenwoordiger van die Nuwe Aserbeidjanse Party vir die tydperk 1995 tot 2000 as 'n lid van die Nasionale Vergadering van die Republiek van Azerbeidjan.

Op 17 April 1998 word hy aangestel as die assistent van die president van Azerbeidjan vir ekonomiese sake.

Volgens 'n besluit deur president Ilham Alijef op 30 November 2012 word Asadof aangestel as adjunkhoof van presidensiële administrasie en in 2017 as ekonomiese raadgewer van die president van Azerbeidjan.

Hy word as 'n bondgenoot van president Alijef beskou. In Oktober 2019, na die bedanking van Nowroez Mammadof, word Asadof in die Nasionale Vergadering met 105 stemme teen 0 verkies tot eerste minister van Azerbeidjan.

Eksterne skakels

• Wikimedia Commons het meer media in die kategorie Ali Asadof.