Alida Postma

in Wikipedia, die vrye ensiklopedie
Jump to navigation Jump to search
Alida en Dirk Postma, kort ná hul troue.
Ds. en mev. Postma en die vyf oudste van hul 13 kinders wat grootgeword het. Die tweede en derde oudste, tweelingdogters, is kleintyd aan witseerkeel dood.
Ds. en mev. Postma en 13 van hul kinders.
Johanna Alida Postma se grafsteen.
Alida se begrafnis op 2 Mei 1929 in Burgersdorp se begraafplaas.

Johanna Alida Postma (gebore Coetsee, plaas Bakenkop, distrik Middelburg, Kaap, 20 Junie 1879 - 30 April 1929) was die eerste vrou van ds. Dirk Postma, van 1906 tot 1940 predikant van die Gereformeerde kerk Burgersdorp.

Johanna was die dogter van J.J.A. (Adriaan) Coetsee en Anna Johanna Martha (née Coetsee), stigters van die Gereformeerde kerk Middelburg, Kaap op 1 Desember 1860, en familie van broer Coetsee van Roosterhoek, die plaas waarop die eerste gemeente van die Gereformeerde Kerk in Kaapland (Gereformeerde kerk Burgersdorp) herstig is in die distrik Burgersdorp. Johanna se moeder het die stigting van die Gereformeerde kerk Burgersdorp, op 21 Januarie 1860 as negejarige kind meegemaak. Haar vader, H.S. Coetsee, se naam verskyn die eerste op die lys van stigters. Haar suster, Magrieta, was die eggenote van prof. Ferdinand Postma, eerste rektor van die PUK. Prof. Postma se suster Kitty was getroud met die eerste hoof van die Potchefstroom Gimnasium, Ad Coetsee, ook 'n boorling van Middelburg. Alida is gebore op die plaas Brandvlei waar haar stoere en vrome ouers geboer het. Sy het as egte boerenooi grootgeword en die goeie eienskappe van die landelike opvoeding het haar haar lewe lank bygebly, naamlik nederigheid, hardwerkendheid, gasvryheid en vriendelikheid.

Sy is op betreklike jeugdige leeftyd verloof aan Dirk Postma, teologiese student en toe die oorlog in 1899 uitbreek, het sy hom gehelp om stilletjies weg te loop om as rebel by die Boeremagte aan te sluit. Ná die oorlog en nadat Dirk Postma van ballingskap op Bermuda af teruggekom en hy sy studie voltooi het, is hulle getroud en het sy hom met liefde en toewyding as predikantsvrou bygestaan, eers op Burgersdorp, waar ds. D. Postma as professor opgetree het, en daarna op Krugersdorp, die oudste Gereformeerde gemeente op die Rand wat in 1898 gestig is. Dit was gedurende die tyd toe daar so baie Chinese in die myne gewerk het en sy moes lange dae alleen bly terwyl haar eggenoot oor 'n uitgestrekte gebied onder andere ook in Swaziland die bediening behartig het. Haar suster, Margaretha, was met haar man se broer Ferdinand getroud.

In 1906 is hulle na Burgersdorp waar ds. Postma as predikant werksaam was tot aan sy dood in Desember 1940. Ds. en mev. Postma het 'n groot huisgesin gehad, naamlik 15 kinders. Die tweede oudste, tweelingdogters, is jonk dood aan die gevreesde witseerkeel en is 10 dae ná mekaar begrawe op die familieplaas Brandvlei. Ten spyte van die druk werksaamhede as moeder van 'n groot huisgesin het Johanna Postma nog tyd oorgehad om haar aandag aan die gemeentelike werk te wy. Sy was baie getrou om oues van dae en siekes te besoek en het baie maal ure by hulle gewaak. Sy het haar kinders se klere self gemaak en daarby het sy nog tyd gehad om haar aandag aan die bedrywighede van die susters te wy. Onder haar leiding is een van die eerste sustersverenigings in Kaapland gestig; die vergaderings is gewoonlik in die pastorie gehou.

Hoewel sy op jeugdige leeftyd oorlede is, sy was maar 49 jaar oud, word daar aan haar gedink as 'n ware moeder wat in nederigheid en met warme liefde haar huisgesin en die gemeente gedien het. Baie maal ná haar dood het die ou mense wat haar geken het, gesê: "Sy was 'n wonderlike vrou." Sy het die gawe gehad om ander se probleme te verstaan en altyd simpatieke advies te kon gee. Sy het elkeen van die 15 kinders in die pastoriegesin verstaan, en elkeen volgens sy eie geaardheid behandel, en haar man het sy met onkreukbare trou gehelp in sy veeleisende werk as predikant. Geen wonder dat toe sy te ruste gelê is op 2 Mei 1929, daar 'n groot wenende skare om haar graf gestaan het, gedagtig aan die woorde van ds. E.L.J. Venter van Aliwal-Noord in sy rede, naamlik "'n Ware moeder in Israel het heengegaan."

Bronne[wysig | wysig bron]

  • (af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.