Allan Gray
Allan Gray (8 April 1938, Oos-Londen, Suid-Afrika – 10 November 2019, Bermuda) was ’n Suid-Afrikaanse filantroop en sakeman wat in 2013 as die tweede rykste mens in Afrika beskryf is.[1]
Sy welvaart is in Oktober 2013 op VS$8,5 miljard (destyds sowat R85 miljard) geraam, wat hom aansienlik ryker gemaak het as bekende welgesteldes in Suid-Afrika soos Nicky Oppenheimer, Johann Rupert en Christo Wiese. Gray laat hom selde afneem, hy staan nie mediaonderhoude toe nie en vermy publisiteit sover hy kon.[2] Daarom is selde oor die rykste Suid-Afrikaner geskryf of berig, al was hy die stigter van een van die suksesvolste finansiële instellings in die land.
Dit is nietemin bekend dat Gray in Oktober 2013 75 jaar oud was en dat hy in Oos-Londen gebore is. Ná sy voorgraadse studie aan die Rhodes-universiteit[3] het hy op die ouderdom van 22 jaar as geoktrooieerde rekenmeester gekwalifiseer en altesaam vier jaar vir die rekeningkundige firma Deloitte in sowel Kaapstad as Johannesburg gewerk. Nadat hy hy 'n ruk lank in Londen was, het hy in 1965 'n MBA aan Harvard se Sakeskool verwerf.[4] Daarna het hy agt jaar deurgebring by Fidelity Fund Management and Research in Boston, Massachusetts. Ná sy terugkeer in Suid-Afrika in 1973 het hy hom in Kaapstad gevestig en Allan Gray Limited gestig.
Hierdie beleggingsmaatskappy het reeds in 2013 sowat R300 miljard se sake namens miljoene kliënte behartig. Nog R200 miljard is destyds bestuur deur Orbis, ’n batebestuursmaatskappy gesetel op Bermuda, waar Gray en sy gesin gewoon het, hoewel hy sy Suid-Afrikaanse burgerskap behou het.
Gray het die Allan Gray Orbis-stigting in 2005 gestig omdat hy entrepreneurskap as ’n integrale deel van die ekonomiese vooruitgang van enige land beskou. Dié beskouing spoor Gray se filantropiese bydraes aan. Die hoofdoelwit van die stigting is die ontwikkeling van entrepreneurs deur die Allan Gray-beurs en Allan Gray-genootskappe.
Allan Gray Limited en Orbis Investment Management, albei deur Gray gestig, finansier die stigting se aktiwiteite. Minstens sewe persent van Allan Gray Limited se belasbare wins word aan die stigting geskenk. Voorts bied ’n bydrae van R1,15 miljard, wat Gray in sy persoonlike hoedanigheid in 2007 geskenk het, verdere finansiële sekuriteit aan die stigting in gevalle wanneer Allan Gray Limited se wins wisselvallig is.
'n Vrouekoshuis van Rhodes-universiteit, Allan Gray House, wat in 1992 in gebruik geneem is, is na hom genoem nadat hy of sy maatskappy die geld vir die oprigting daarvan geskenk het.[5] Dit bied huisvesting aan 85 studente en is deel van Drostdy Hall.[6]
Hy was getroud met Gill, vir meer as 50 jaar, en hulle het drie kinders, Trevor, Jenny en Will. Hy laat sewe kleinkinders en twee agterkleinkinders agter.[7]
Gray is op Sondag, 10 November 2019 in die ouderdom van 81 aan 'n hartaanval in Bermuda oorlede.[8][9]
Verwysings[wysig | wysig bron]
- ↑ (en) Allan Gray is ranked second richest African, Iol.co.za, 10 Oktober 2015. URL besoek op 28 Oktober 2015.
- ↑ (en) 85 billion shades of Gray. The richest man in South Africa, Moneyweb.co.za, 8 Oktober 2013. URL besoek op 28 Oktober 2015.
- ↑ (en) “So little done, so much to do” – Mr Allan Gray Geargiveer 29 Oktober 2015 op Wayback Machine. URL besoek op 28 Oktober 2015.
- ↑ (en) A passion for success, Iol.co.za, 2 November 2010. URL besoek op 28 Oktober 2015.
- ↑ (en) Inligting oor Allan Gray House, maar nie oor die skenking wat dit moontlik gemaak het nie, URL besoek op 18 Oktober 2015.
- ↑ (en) Drostdy Hall: rich in history and community, The Oppidan Press. URL besoek op 28 Oktober 2015.
- ↑ 'Spook' van geld wêreld deel welvaart met ander. Rapport Weekliks 17 November 2019
- ↑ Strydom, Nico (11 November 2019). "Allan Gray oorlede: 'Hy laat blywende nalatenskap'". Maroela Media. Geargiveer vanaf die oorspronklike op 3 Januarie 2020. Besoek op 11 November 2019.
- ↑ Vernon Wessels en Hilton Shone (11 November 2019). "Founder of South African Money Manager Allan Gray Dies". Bloomberg (in Engels). Geargiveer vanaf die oorspronklike op 24 Februarie 2020. Besoek op 12 November 2019.
Eksterne skakels[wysig | wysig bron]
- (en) The man behind the brand, Mail & Guardian, 30 April 2007. URL besoek op 28 Oktober 2015.