Alwyn Smit

in Wikipedia, die vrye ensiklopedie
Jump to navigation Jump to search

Ds. Alwyn Schalk Smit (Volksrust, Mpumalanga, 28 Januarie 192926 Julie 1996) was tussen 1953 en 1994 predikant in twee gemeentes van die Gereformeerde Kerke in Suid-Afrika, naamlik Piet Retief (1953–1958) en Sasolburg (1958–1994).

Herkoms en opleiding[wysig | wysig bron]

Alwyn Smit is op 28 Januarie 1929 te Volksrust gebore as die oudste kind van Ras en Bernice Smit. Die opvoeding wat hy van sy ouers ontvang het, het ’n diep merk op hom gemaak wat lewenslank in sy optrede waargeneem kon word. In 1935 het hy sy skoolloopbaan op Volksrust begin. Saam met sy ouers het hy in 1936 na Pietersburg (Polokwane) verhuis waar hy einde 1945 gematrikuleer het.

Begin 1946 het hy sy studie aan die PUK vir CHO begin. In die studentelewe het hy reeds diep spore getrap en hom as leier onderskei. Hy was ’n bekwame violis wat dikwels in dé hoedanigheid opgetree het. Hy het baie belanggestel in goeie musiek en was ook leier van die Alabama-studentegeselskap. Hy was onder andere ook lid van die studenteraad. Einde 1952 het hy sy studieaan die PU vir CHO en Teologiese Skool van die Gereformeerde Kerk voltooi.

Loopbaan[wysig | wysig bron]

As predikant het ds. Alwyn Smit ’n geseënde bedieningstyd van 41 jaar belewe. Die eerste vyf jaar van sy bediening, 1953 tot 1958, was hy predikant van Piet Retief. Van\ Januarie 1958 tot met sy emeritering in 1994 was hy deurentyd predikant van die Gereformeerde kerk Sasolburg. Hy het op die kerklike akker met toewyding gearbei.

Ds. Johan Ligthelm, sy kamermaat op universiteit, skryf in sy lewensberig in die GKSA se Almanak van 1997: "’n Uitstaande eienskap van hom was dat hy 'n man van prinsipe was. Hy het nooit sy beginsels prys gegee nie. Daarvoor het hy met ywer in die lig van die Skrif gestry. So het hy hom ook openbaar as 'n ware herder van die kudde van die Here wat aan sy sorg toevertrou was. In al hierdie tyd het hy as ongetroude man alleen gestaan, maar geweet dat sy hulp is by die Here wat hom tot hierdie taak geroep het."

Danksy ds. Smit se talent en liefde vir musiek het hy ruim 10 jaar lank gedien in die Interkerklike Kommissie vir Psalmberyming (IKKP). Hierdie kommissie het dan ook aan ds. J.P. Bingle opdrag gegee om op ds. Smit se begrafnis ’n waarderende woord te spreek. Ds. Bingle het onder meer gesê die Verbondslied, of Skriflied (soos hy ook graag daarna verwys het), het ds. Smit na aan die hart gelê. Ds. Bingle het sy waarderende woord afgesluit met die gedagte: "In die Verbondslied - waaraan hy so toegewyd gewerk het vir eie tyd en taal, maar nie kon voltooi nie - het hy van kleins af die toonaard en melodie (figuurlik) geleer van die nuwe lied wat hy nou saamsing met die 144 000 se lied voor die troon van God."

Waardering[wysig | wysig bron]

Ds. Ligthelm skryf ds. Smit was ’n ware Afrikaner wat sy land en volk baie lief gehad het. "Hy het baie gedoen en positiewe Christelike getuienis uitgedra. Op hierdie terrein sal hy ook baie gemis word." Ds. Smit het sy tyd vir aktiewe bediening voltooi, maar in die kort tyd hom gegun ná sy emeritering, was hy nog baie aktief. Ds. Ligthelm skryf: "Ons as mense sal sê hy kon nog baie doen, maar by God was sy taak op aarde afgehandel."

Bron[wysig | wysig bron]

  • Johan, ds. Johan in Van der Walt, dr. S.J. 1997. Die Almanak van die Gereformeerde Kerke in Suid-Afrika vir die jaar 1997. Potchefstroom: Administratiewe Buro.