Ammunisie

'n Belt van 0.50 kaliber ammunisie wat in 'n M2 Browning gelaai is. Elke vyfde patroon (rooi punt) is 'n M20 (pantserdeurdringende "tracer").

Ammunisie, is die materiaal wat afgevuur, verstrooi, laat val of ontplof word vanaf enige wapen of wapenstelsel. Die term ammunisie sluit beide weggooibare wapens (b.v. bomme, missiele, granate, landmyne), en die onderdele van ander wapens wat die effek op 'n teiken skep (bv. koeëls en plofkoppe) in.

Die doel van ammunisie is om 'n krag teen 'n gekose teiken te projekteer om 'n effek te hê (gewoonlik, maar nie altyd, dodelik nie). 'n Voorbeeld van ammunisie is die vuurwapen patroon, wat al die komponente insluit wat benodig word om die wapeneffek in 'n enkele pakket te lewer. Tot die 20ste eeu was swartkruit die mees algemene dryfmiddel wat gebruik is, maar is nou in byna alle gevalle vervang deur moderne verbindings.

Ammunisie kom in 'n groot verskeidenheid groottes en tipes voor en is dikwels ontwerp om slegs in spesifieke wapenstelsels te werk. Daar is egter internasionaal erkende standaarde vir sekere ammunisietipes (b.v., 5.56×45mm NATO) wat hul gebruik oor verskillende wapens en deur verskillende gebruikers moontlik maak. Daar is ook spesifieke tipes ammunisie wat ontwerp is om 'n gespesialiseerde effek op 'n teiken te hê, soos pantserdeurdringende ammunisie en "tracer"-ammunisie, wat slegs in sekere omstandighede gebruik word. Ammunisie word gewoonlik op 'n spesifieke manier gemerk of gekleur om die identifikasie daarvan te vergemaklik en om te verhoed dat die verkeerde ammunisietipes per ongeluk of onvanpas gebruik word.

Etimologie

Die term "ammunisie" kan teruggevoer word na die middel van die 17de eeu. Die woord kom van die Frans la munition, vir die materiaal wat vir oorlog gebruik word. Ammunisie en munisie word dikwels uitruilbaar gebruik, hoewel munisie nou gewoonlik verwys na die werklike wapenstelsel met die ammunisie wat benodig word om dit te gebruik. In sommige tale anders as Engels word ammunisie steeds as munisie beskou, soos: Nederlands ("munitie"), Frans ("munitions"), Duits ("Munition"), Italiaans ("munizione") en Portugees ("munição").

Eksterne skakels

• European Ammunition Box Translations
• International Ammunition Association