Gaan na inhoud

Anna Delvey

in Wikipedia, die vrye ensiklopedie
Anna Delvey
Delvey in 2025.
Delvey in 2025.
Gebore 23 Januarie 1991 (1991-01-23) (35 jaar oud) ; Domodedowo, Sowjetunie
Land Rusland,[1] Duitsland[2]
Ander name Anna Sorokin,
Анна Сорокина
Misdaadbesonderhede
Misdaad Diefstal
Vonnisbesonderhede
Vonnisdatum 25 April 2019 (2019-04-25)
Vonnis 4 tot 12 jaar tronkstraf, boete van $24,000, skuldvergoeding van $199,000
Vrygelaat Februarie 2021
Status Tans in huisarres in die VSA

Anna Sorokin (Russies: Анна Сорокина, Anna Sorokina; gebore 23 Januarie 1991), ook bekend as Anna Delvey, is 'n swendelaar en bedrieër wat haar van 2013 tot 2017 as 'n ryk erfgenaam voorgedoen het aan die hoër stand van die New Yorkse sosiale en kunssirkels.

Delvey is naby Moskou gebore en het in 2007, toe sy 16 jaar oud was, saam met haar ouers na Duitsland verhuis. In 2011, op 20-jarige ouderdom, het Delvey Duitsland verlaat om in Londen en Parys te gaan woon. In 2013 is sy na New York, waar sy 'n intern was vir die Franse modetydskrif Purple. Sy het 'n klub en kunsstigting met privaat lede bedink, wat ingesluit het die huur van 'n groot gebou met winkels en uitstallings deur bekende kunstenaars wat sy ontmoet het terwyl sy 'n intern was. Sy het later vervalste dokumente geskep om haar bewering te staaf dat sy 'n trustfonds van miljoene euro's het en het talle geldoordragtransaksies vervals. Sy het dié dokumente en vervalste tjeks gebruik om banke, kennisse en eiendomsagente te oorreed om kontant aan haar uit te betaal en lenings sonder kollateraal te kry. Sy het die geld gebruik om haar uitspattige leefstyl te onderhou, insluitend verblyf in verskeie duur hotelle.

Tussen 2013 en '17 het Delvey groot finansiële instellings, banke, hotelle en individue verneuk. In 2017 het die New Yorkse polisie haar in hegtenis geneem met die hulp van haar voormalige vriendin Rachel Williams, wat Delvey beskuldig het van bedrog van $62 000. In 2019 het 'n New Yorkse staatshof Delvey gevonnis op 'n paar aanklagte van diefstal en pogings tot diefstal, en is sy gevonnis tot tronkstraf van tussen 4 en 12 jaar. Nadat sy twee jaar daarvan uitgedien het, is sy op parool vrygelaat.

Ses weke later is sy deur die Amerikaanse doeanepolisie in hegtenis geneem om na Duitsland gedeporteer te word. In Oktober 2022, nadat sy 19 maande lank aangehou is, is sy op borgtog van $10 000 vrygelaat en in huisarres geplaas.

Delvey se storie het publisiteit geniet toe Williams 'n lang artikel in die tydskrif Vanity Fair geskryf het oor haar ondervindings in 2018 met Delvey. Sy het in haar boek My Friend Anna (2019) op die storie uitgebrei. In dieselfde jaar het die joernalis Jessica Pressler 'n artikel vir die tydskrif New York geskryf oor Delvey se lewe as 'n sosiale vlinder. Netflix het Delvey $320 000 betaal vir die regte vir haar storie en dit ontwikkel in die minireeks Inventing Anna (2022) vir televisie. Delvey se lewensverhaal was ook die onderwerp van verskeie ander televisieprogramme, onderhoude, podsendings en teaterproduksies.

Vroeë lewe

[wysig | wysig bron]
Haar geboortedorp, Domodedowo naby Moskou.

Delvey is op 23 Januarie 1991 in Domodedowo, ’n werkersklassatellietdorp suid van Moskou in die Sowjetunie gebore.[3] Haar pa, Wadim, het as ’n vragmotorbestuurder gewerk en haar ma het ’n klein winkel besit. In 2007, toe Delvey 16 was, het haar gesin na Noordryn-Wesfale, Duitsland, verhuis. Daar het haar pa ’n uitvoerende pos by ’n vervoermaatskappy beklee totdat die maatskappy in 2013 insolvent geraak het. Hy het daarna ’n verhittings-en-lugvoerkoelingsbesigheid begin wat in doeltreffende energiegebruik gespesialiseer het. Delvey se ma was ’n huisvrou.[4]

Delvey het 'n Katolieke gimnasium in Eschweiler bygewoon. Maats het gesê sy was stil en het gesukkel met Duits.[4] As jong volwassene het sy Vogue, modeblogs en fotorekenings op LiveJournal en Flickr obsessief gevolg.[5]

Ná skool in 2011 het Delvey na Londen verhuis om by Central Saint Martins, ’n kunsskool, te studeer, maar sy het gou opgeskop en na Duitsland teruggekeer.[5] In 2012 het sy 'n kort internskap by ’n openbarebetrekkingemaatskappy in Berlyn gedoen. Daarna het sy na Parys verhuis, waar sy sowat €400 per maand tydens ’n internskap vir Purple verdien het.[6] Delvey het nie dikwels kontak met haar ouers gehad nie, maar hulle het haar huur gesubsidieer.[4][5][6] Omstreeks daardie tyd het sy die van "Delvey" aangeneem; sy het gesê dit is op haar ma se nooiensvan gebaseer, maar haar ouers het gesê hulle herken nie die van nie.[6]

Bedrog

[wysig | wysig bron]
Church Missions House.

In middel 2013 het Delvey na New York gereis om die New Yorkse Modeweek by te woon. Dit was vir haar makliker om daar vriende te maak as in Parys en sy het besluit om te bly. Sy het vir 'n kort ruk in die New Yorkse kantoor van Purple gewerk.[6] Nadat sy bedank het, het sy op die idee van die "Anna Delvey-stigting" – 'n klub en kunsstigting met privaat lede – gekom en vergeefs probeer befondsing soek van welgestelde lede van die stad se sosiale toneel. Haar voorstel het ingesluit die huur van die hele Church Missions House van ses verdiepings in die besit van Aby Rosen se RFR Holdings, om dit te gebruik as 'n veeldoelige venue en kunsateljee. Hier het sy beplan om winkels op te rig en uitstallings te hou.[4] Vir die beplanning het sy hulp gekry van die seun van die argitek Santiago Calatrava.[7]

Die platejoggie Elle Dee beskryf 'n vreemde voorval met Delvey op 'n partytjie in Mei 2014 in Montauk, New York. Delvey het voorgegee sy is 'n ryk erfgenaam en gespog oor die handelsmerke van die klere wat sy gedra het, maar mense op die partytjie slaapplek gevra. Toe hulle weier, het sy in 'n motor geslaap. Volgens Dee was Delvey gemeen, veral met mense in die gasvryheidsbedryf. Sy het mense aangeval wat nie baie volgelinge op Instagram gehad het nie en het gespog dat sy 'n dakwoonstel sou huur vir $12 000 per maand. Volgens Dee het Delvey op haar en ander kennisse staatgemaak om haar uitgawes te betaal; sy het beweer sy het haar beursie vergeet of dat haar kredietkaarte weens 'n noodgeval nie werk nie.[8]

In 2015 het Delvey die kunshandelaar en student Michael Xufu Huang op 'n partytjie ontmoet. Toe sy hoor hy beplan om die Venesiese Biënnale by te woon, het sy hom gevra of sy kon saamgaan. Huang het ingestem en 'n vliegkaartjie en hotelkamer vir Delvey bespreek met die veronderstelling dat sy hom die koste van $2 000 - $3 000 sou terugbetaal. Terug in New York het Delvey blykbaar van die reëling "vergeet" en hom nie betaal nie.[9] Hy het haar eindelik geblokkeer en hulle vriendskap beëindig.[9]

In Februarie 2016 het Delvey 'n fotoredakteur by Vanity Fair, Rachel DeLoache Williams, in 'n nagklub ontmoet. Williams het goed met haar bevriend geraak en was later instrumenteel is haar arres.[10]

Delvey het Microsoft Word gebruik om vervalste bankstate en ander finansiële dokumente te skep wat wys sy het €60 miljoen in Switserse bankrekenings, maar het gesê sy kon nie die geld kry nie omdat sy in Amerika was.[4][7][6] Een van haar kennisse het haar in verbinding gebring met die prokureur Andrew Lance[11] by Gibson Dunn, wat haar weer in verbinding gebring het met verskeie groot finansiële instellings, insluitend City National Bank en Fortress Investment Group.[4] In November 2016 het Delvey vervalste dokumente ingehandig as deel van 'n leningsaansoek vir $22 miljoen van City National.[1] City National het die lening geweier nadat Delvey nie bewyse kon verskaf van die bron van die Switserse bates nie, en sy het toe by Fortress aansoek vir 'n lening gedoen. Fortress het ingestem om die aansoek te oorweeg as Delvey $100 000 betaal om regskoste in verband met die lening te dek. In Desember 2016, toe Delvey nie huur kon betaal nie, is die Church Missions House aan iemand anders verhuur.[4]

Op 12 Januarie 2017 het Delvey City National oorreed om 'n tydelike oortrekkingsgerief van $100 000 aan haar toe te staan met die belofte om die geld gou terug te betaal. Sy het aan hulle vals e-posadresse verskaf van "Peter Hennecke", 'n niebestaande sakebestuurder. Toe agterdog ontstaan, het Delvey beweer hy is oorlede en 'n nuwe persoon, "Bettina Wagner", bedink.[4][1] Aanklaers het later in haar verhoor gewys sy het 'n soektog op Google gedoen oor hoe om 'n "vals, onnaspoorbare e-pos" te skep.[7] Delvey het die $100 000 aan Fortress betaal vir die leningsaansoek, maar 'n besturende direkteur het snuf in die neus gekry wees 'n paar ongerymdhede in haar dokumente: Sy het byvoorbeeld beweer sy is van Duitse herkoms, maar volgens haar paspoort is sy in Rusland gebore. Toe die direkteur vra om haar bankiers in Switserland te ontmoet, het sy die leningsaansoek teruggetrek. In Februarie 2017 het Fortress $55 000, die deel van die geld wat nie vir uitgawes in verband met die lening gebruik is nie, aan Delvey terugbetaal.[1][4] Sy het toe rojaal geld uitgegee op luukseklere, elektronika en 'n persoonlike instrukteur, asook $800 op ligstrepe in haar hare en $400 op wimperverlengings.[4]

Op 18 Februarie 2017 het Delvey ingeboek in 'n kamer van $400 per nag by die 11 Howard Hotel in Soho, Manhattan.[4] Sy het dikwels fooitjies van $100 kontant gegee aan die concierge, met wie sy bevriend geraak het, en ander werknemers vir eenvoudige take soos restaurantaanbevelings of om pakkies na haar kamer te bring.[4] Tog het die meeste personeellede gedink sy is irriterend, en hulle het haar beskryf as onbeskof en klasbewus.[4] Delvey het die concierge bederf met masserings, manikure en sessies met die persoonlike instrukteur vir die sterre Kacy Duke.[4]

Die Mercer Hotel.

Nadat die bestuur ontdek het hulle het geen kredietkaart vir haar op rekord nie, het hulle daarop aangedring dat sy haar rekening van $30 000 betaal. Teen Maart 2017 was Delvey se geld op. Sy sou aanbied om vriende vir drankies en ete uit te neem, maar wanneer dit tyd was om te betaal het sy beweer sy het haar kredietkaarte vergeet of hulle werk nie.[1]

In April 2017 het Delvey vervalste tjeks vir $160 000 in 'n Citibank-rekening inbetaal en sy kon $70 000 daarvan onttrek.[12] Sy het toe $30 000 telegrafies aan 11 Howard gestuur om haar rekening te betaal.[4]

Ná drie maande by 11 Howard het Delvey met Rachel Williams se hulp na die Mercer Hotel verskuif.[10] Sy het ook twee nagte in die Bowery Hotel gebly en 'n vervalste betaling van Deutsche Bank aan hulle gestuur.[4] In Mei 2017 het sy 'n vervalste geldoordrag van Deutsche Bank vir $35 390 na Blade Air Mobility gestuur vir 'n huurvlug na Nebraska.

La Mamounia.

Ook in Mei 2017 het Delvey vir Williams, Kacy Duke en haar videograaf genooi op 'n "gratis" reis na Marokko. Sy was geïnspireer deur Khloé Kardashian en het 'n huis van $7 000 per nag gehuur by La Mamounia, 'n luuksueuse vyfsterhotel in Marrakesj. Dit het drie slaapkamers, 'n privaat swembad en sy eie butler gehad. Sy wou ook 'n dokumentêr agter die skerms maak van die skepping van haar stigting.[10]

Ná 'n paar dae het die hotelpersoneel gesê hulle kon nie geld van Delvey se kredietkaarte kry nie en 'n ander manier van betaling geëis. Delvey het verskonings uitgedink, die personeel se onbeholpenheid die skuld gegee en beweer hulle stelsels is te blameer.[13] Delvey het Williams oorreed om die rekening van $62 000 te betaal, wat meer as 'n jaar van Williams se netto salaris was.[10][4] Williams het haar werk se kredietkaart sowel as haar eie gebruik en Delvey het belowe om die geld telegrafies aan haar te stuur. Williams het ook betaal vir die vlugte na Marokko, items wat Delvey gekoop het en 'n privaat toer, met beloftes van Delvey om haar terug te betaal.[7]

Ná die een verskoning na die ander het Delvey haar eindelik net $5 000 terugbetaal[4] en sy moes geld van vriende leen om haar huur te betaal.[10] American Express het later sowat $52 000 van die heffings op haar kredietkaartse verwyder.[14] Nadat sy ander kennisse gekontak het aan wie Delvey ook geld skuld, het Williams besef sy pleeg bedrog.[10]

In Marokko het Delvey in nog twee luuksehotels gebly en Duke, wat weens 'n voedselverwante siekte reeds na New York teruggekeer het, gevra om vir haar kamers te betaal.[4] Toe Duke ook aanbied om haar vliegkaartjie terug na New York te betaal, het Delvey 'n sitplek in die besigheidklas gevra.[4]

Op 17 en 21 Augustus 2017 het Delvey na bewering twee vervalste tjeks van $15 000 in haar rekening by Signature Bank inbetaal en oor die volgende paar dae het sy sowat $8 200 kontant getrek voordat die tjeks gehop het.[15]

Aanklagte en arres

[wysig | wysig bron]

Delvey is op 3 Oktober 2017 in hegtenis geneem in 'n lokval wat beplan is deur Michael McCaffrey, ’n polisieman van die New Yorkse polisie, wat saam met die kantoor van Manhatten se distriksprokureur gewerk het. Om die lokval te vergemaklik, het McCaffrey nou saam met Williams gewerk. In daardie stadium het Delvey in Passages Malibu, ’n luuksueuse rehabilitasiesentrum in Kalifornië, gebly.

Om Delvey te oortuig om na ’n meer openbare plek te gaan waar ’n arrestasie makliker uitgevoer kon word, het McCaffrey met Williams gereël dat sy haar nooi vir middagete by ’n restaurant buite die sentrum. Toe Delvey die sentrum verlaat, is sy in hegtenis geneem.[16][17] Sy is aangekla op verskeie aanklagte van diefstal, tjekbedrog en die onbetaalde koste van die reis na Marokko en hotel- en restaurantrekenings.[7]

Verhoor en vonnis

[wysig | wysig bron]
Rikers Island.

Op 8 Desember 2018 het Delvey in die New Yorkse misdaadhof verskyn en 'n pleitooreenkoms vir drie tot nege jaar tronkstraf van die hand gewys. Haar verhoor het op 20 Maart 2019 voor regter Diane Kiesel begin.[1] Gedurende die verhoor is Delvey in Rikers Island aangehou, waar sy 13 oortredings begaan het. Sy het Kersfees in eensame opsluiting deurgebring.

Op haar versoek het Delvey se advokaat gereël dat ’n stilis uitrustings vir haar hofverskynings bekom.[18][19] Een dag het sy haar Rikers Island-uniform vir ’n Michael Kors-slooprok verruil. Die volgende dag het sy ’n deursigtige swart Yves Saint Laurent-top by 'n Victoria Beckham-broek gedra.[20] Een Vrydag het sy geweier om die hofsaal binne te gaan omdat sy nie in die klere wat die tronk uitgereik het, wou verskyn nie.[21]

Tydens die verhoor het Delvey se prokureur haar verdedig deur te sê haar bedoeling was nog altyd om haar skuld terug te betaal en dat sy dienste ontvang het in ruil vir publisiteit op Instagram. Hy het haar as ’n entrepreneur beskryf en met Frank Sinatra vergelyk, en beweer dat hulle albei ’n “goue geleentheid” in New York geskep het.[22]

Op 25 April 2019, nadat die jurie twee dae lank beraadslaag het, het hulle Delvey skuldig bevind aan agt aanklagte.[1][23] In ’n onderhoud voor haar vonnisoplegging het Delvey gesê: “Ek sou vir jou en vir almal anders én vir myself lieg as ek sê ek is jammer oor enigiets.”[13]

Op 9 Mei 2019 is sy gevonnis tot 4 tot 12 jaar in ’n staatsgevangenis, met ’n boete van $24 000, en beveel om restitusie van $199 000 te betaal, insluitend $100 000 aan City National, $70 000 aan Citibank en ongeveer twee derdes van die bedrag wat aan Blade verskuldig was.[24] Dié bedrae, sowel as ongeveer $75 000 in regskoste wat met die verhoor verband hou, is betaal uit die opbrengs van Delvey se ooreenkoms van $320 000 met Netflix; die hof het Delvey toegelaat om die oorblywende $22 000 te hou.[25]

Ná die verhoor is Delvey, gevangene #19G0366 van die New Yorkse departement van korrektiewe dienste,[26] aanvanklik na die Bedford Hills-vrouegevangenis gestuur en later na die Albion-gevangenis.[17][27] Op 11 Februarie 2021 is sy op parool vrygelaat.[28] Daarna het sy in The NoMad-hotel ingeboek en ’n Duitse kameraspan gehuur om haar te volg en haar bedrywighede te verfilm.[29]

Delvey in 2022.

Huisarres

[wysig | wysig bron]

Ses weke ná haar vrylating op parool het die doeanepolisie Delvey in hegtenis geneem omdat haar visum verstryk het. Sy is in 'n tronk in New Jersey aangehou in afwagting op haar deportasie na Duitsland, wat sy teengestaan het.[2] 'n Immigrasieregter het beslis as Anna vrygelaat word, "sal sy die vermoë en geneigdheid hê om weer bedrieglike en oneerlike dade te pleeg".[30]

In Januarie 2022 is Delvey in die tronk positief vir Covid-19 getoets en in kwarantyn geplaas. In Oktober 2022 is sy op borgtog van $10 000 vrygelaat.[31] Sy is gelas om 24 uur per dag in huisarres te bly. Sy is elektronies gemonitor en is nie toegelaat om sosiale media te gebruik nie.[31]

Teen Desember 2022 het Delvey kunswerke van $340 000 verkoop.[32] Die opbrengs is gebruik vir haar borgtog en om drie maande se huur vir haar eenslaapkamerwoonstel van $4 250 per maand in East Village te betaal.[32]

In Augustus 2024 is Delvey se toegang tot sosiale media hestel en haar huisarres uitgebrei tot 'n radius van 121 km van haar blyplek af.[33]

Verwysings

[wysig | wysig bron]
  1. 1 2 3 4 5 6 7 Ransom, Jan; Palmer, Emily (25 April 2019). "Fake Heiress Who Swindled N.Y.'s Elite Is Found Guilty". The New York Times. ISSN 0362-4331. Geargiveer vanaf die oorspronklike op 15 November 2020.
  2. 1 2 "Anna Sorokin: Fake heiress detained by US immigration authorities". BBC News. 2 April 2021. Geargiveer vanaf die oorspronklike op 23 April 2021.
  3. ↑ Contreras, Cydney (12 Februarie 2022). "Breaking Down Julia Garner's Unique Accent on 'Inventing Anna'". NBC News. Geargiveer vanaf die oorspronklike op 13 Februarie 2022. Besoek op 17 Februarie 2022.
  4. 1 2 3 4 5 6 7 8 9 10 11 12 13 14 15 16 17 18 19 20 Pressler, Jessica (28 Mei 2018). "How an Aspiring 'It' Girl Tricked New York's Party People – and Its Banks". The Cut. Geargiveer vanaf die oorspronklike op 24 Januarie 2020.
  5. 1 2 3 Shamsian, Jacob (11 Februarie 2022). "'My parents did not really know what to do with me': Real-life scammer Anna Sorokin explains the tense family relationship in 'Inventing Anna'". Insider. Geargiveer vanaf die oorspronklike op 19 Februarie 2022. Besoek op 18 Februarie 2022.
  6. 1 2 3 4 5 Palmer, Emily (10 Mei 2019). "A Fake Heiress Called Anna Delvey Conned the City's Wealthy. 'I'm Not Sorry,' She Says". The New York Times. Geargiveer vanaf die oorspronklike op 3 April 2021.
  7. 1 2 3 4 5 Shamsian, Jacob (26 April 2019). "2 years ago, 26-year-old Anna Delvey was on a $62,000 vacation in Morocco. Now she's facing 15 years in prison for her elaborate 'fake heiress' scam". Insider. Geargiveer vanaf die oorspronklike op 19 Februarie 2022. Besoek op 18 Februarie 2022.
  8. ↑ Dee, Elle (16 Desember 2019). "My Anna Delvey story: Strange encounters with a fake heiress". BBC News. Geargiveer vanaf die oorspronklike op 17 Februarie 2022. Besoek op 17 Februarie 2022.
  9. 1 2 Kinsella, Eileen (10 Desember 2020). "Convicted Fraudster Anna Delvey Conned Collector Michael Xufu Huang. That Didn't Stop Him From Hanging Her Portrait in His New Museum". Artnet. Geargiveer vanaf die oorspronklike op 6 Mei 2021.
  10. 1 2 3 4 5 6 Williams, Rachel DeLoache (13 April 2018). "She Paid for Everything: How a Fake Heiress Made My $62,000 Disappear". Vanity Fair. Geargiveer vanaf die oorspronklike op 13 Mei 2019.
  11. ↑ "All you need to know about Alan Reed in 'Inventing Anna'". Newsweek. 17 Februarie 2022.
  12. ↑ "The People of the State of New York – against Anna Sorokin Defendant" (PDF). CBS News. Geargiveer (PDF) vanaf die oorspronklike op 11 Februarie 2022. Besoek op 17 Februarie 2022.
  13. 1 2 "Anna Sorokin, who pretended to be a wealthy German heiress, was sentenced to four to 12 years in prison last week". Inside Edition. 14 Mei 2019. Geargiveer vanaf die oorspronklike op 20 Februarie 2022. Besoek op 19 Februarie 2022.
  14. ↑ "Anna Sorokin Case: Victim Calls Fake Heiress 'A Sociopath,' 'An Extreme Narcissist'". CBS News. New York. Geargiveer vanaf die oorspronklike op 22 Februarie 2022. Besoek op 22 Februarie 2022.
  15. ↑ "Fake heiress who dazzled New York elite gets 4 to 12 years for fraud". Reuters. Geargiveer vanaf die oorspronklike op 19 Februarie 2022. Besoek op 17 Februarie 2022.
  16. ↑ Williams, Rachel DeLoache (18 Julie 2019). "Anna "Delvey" Sorokin Was My Friend. Here's How I Helped Bring the Fake Heiress to Justice". Time. Geargiveer vanaf die oorspronklike op 14 Mei 2021.
  17. 1 2 Shamsian, Jacob (23 Julie 2019). "A Vanity Fair photo editor who says she was scammed by 'SoHo grifter' Anna Delvey wrote a book – and it finally explains how she was caught". Insider. Geargiveer vanaf die oorspronklike op 27 Januarie 2022. Besoek op 16 Desember 2019.
  18. ↑ Tashjian, Rachel (28 Maart 2019). "The Alleged "Soho Grifter" Is Using a Courtroom Stylist". GQ. Geargiveer vanaf die oorspronklike op 3 Junie 2021.
  19. ↑ "Con artist who passed herself off as wealthy heiress sentenced to 4 to 12 years in prison". CBS News. Associated Press. 10 Mei 2019. Geargiveer vanaf die oorspronklike op 11 Mei 2019.
  20. ↑ Minutaglio, Rose (15 Februarie 2022). "Yes, Anna Sorokin from 'Inventing Anna' Really Did Have Saint Laurent Sent to Her in Prison". Elle (in American English). Geargiveer vanaf die oorspronklike op 23 Februarie 2022. Besoek op 28 Februarie 2022.
  21. ↑ Friedman, Vanessa (26 April 2019). "Does This Dress Make Me Look Guilty?". The New York Times. Geargiveer vanaf die oorspronklike op 13 Junie 2021.
  22. ↑ Palmer, Emily (28 April 2019). "Anna Delvey, Fake Heiress: 7 Bizarre Highlights From Her Trial". The New York Times. Geargiveer vanaf die oorspronklike op 3 Junie 2021.
  23. ↑ Pullman, Laura (7 Maart 2021). "'Fake Heiress' Anna Delvey on her time in prison and what she'll do next". The Times. Geargiveer vanaf die oorspronklike op 3 Junie 2021.
  24. ↑ Ransom, Jan (9 Mei 2019). "Sorokin, Who Swindled N.Y.'s Elite, Is Sentenced to 4 to 12 Years in Prison". The New York Times. Geargiveer vanaf die oorspronklike op 7 November 2020.
  25. ↑ "Netflix Paid Convicted Scammer Anna Sorokin $320,000 To Adapt Her Story For 'Inventing Anna'". Decider. Geargiveer vanaf die oorspronklike op 14 Februarie 2022. Besoek op 18 Februarie 2022.
  26. ↑ Baker, Vicky (20 Februarie 2021). "Netflix and Anna Delvey: The race to secure the story of New York's 'fake heiress'". BBC News. Geargiveer vanaf die oorspronklike op 24 Junie 2021.
  27. ↑ Pavia, Lucy (5 November 2019). "The Anna Delvey Netflix drama has cast its leading lady". Evening Standard. Geargiveer vanaf die oorspronklike op 16 Desember 2019.
  28. ↑ "Anna Sorokin: Fake heiress released from US prison". BBC News. 12 Februarie 2021. Geargiveer vanaf die oorspronklike op 12 Februarie 2021.
  29. ↑ Motion, Davina (19 Februarie 2021). "What 'fake heiress' Anna Delvey did next". Tatler. Besoek op 28 September 2022.
  30. ↑ "Erasing Anna: From ICE detention, Anna Delvey talks about her new Netflix show and life behind bars". Insider. 2 Februarie 2022. Geargiveer vanaf die oorspronklike op 19 Februarie 2022. Besoek op 18 Februarie 2022.
  31. 1 2 Reul, Katie (5 Oktober 2022). "Anna Sorokin, Con-Artist From 'Inventing Anna,' Released From Prison". Variety (in American English). Besoek op 6 Oktober 2022.
  32. 1 2 Ho, Karen K. (22 Desember 2022). "Fake Heiress Anna Delvey Sold $340,000 in Artworks Often Featuring Herself". ARTnews.
  33. ↑ Melendez, Pilar (6 September 2024). "Anna Delvey and Kelly Cutrone's Latest Project? Their Bucolic Life Upstate". Vanity Fair (in American English). Besoek op 5 Maart 2025.

Skakels

[wysig | wysig bron]
Ontsluit van "https://af.wikipedia.org/w/index.php?title=Anna_Delvey&oldid=2869327"