Anne van Rooy

Anna Francina van Rooy (ook genoem Anne Françoise, gebore Holsters, Brussel, België, 31 Desember 1834 – Steynsburg, Kaapkolonie, 28 Augustus 1904) was die stammoeder van die Van Rooy-familie in Suid-Afrika en ’n weldoener van die Gereformeerde Kerk.

Anne Holsters se vader was Charles Holsters en haar moeder Petronella de Gieter. Ná haar huwelik met Johannes Cornelis van Rooy (ook Jean Corneille) van Rooy, van 's Hertogenbosch, Nederland, vertrek hulle op 24 Oktober 1857 in geselskap van (die latere ds.) Jan de Ridder en J.M. Maury met die seilboot Karel August na Suid-Afrika waar hulle op 26 Januarie 1858 by Port Elizabeth aan wal gestap het. Onderweg is die tweede seuntjie van die egpaar Van Rooy, Antoine Charles Auguste (Charles), gebore. Die gesin het hulle in die Noordoos-Kaap gaan vestig en die voorouers van talryke Van Rooys in Suid-Afrika geword.

Ná sewentien jaar van plaasskoollewe in die distrikte Colesberg, Burgersdorp, Cradock en Middelburg, Kaap, het meester Van Rooy in die pas aangelegde dorpie Steynsburg in 'n CNO-skooltjie onderrig gegee. As gevolg van die seën wat op 'n sakeonderneming gerus het, kon die weduwee-moeder in 1915 £1000 aan die nuwe CNO-skool skenk. Ná die Anglo-Boereoorlog het sy meegehelp om arm gemeentes weer op die been te bring.

Tant Anne was 'n eerwaardige dame wat haar woord oor enige onderwerp van betekenis kon doen. Die nakomelinge van haar 10 kinders was vurige voorstanders van die beginsel van Christelik-nasionale onderwys.

Haar kinders was:

Henri Charles (gebore 22 Desember 1855)
Antoine Charles Auguste (Charles) (gebore 24 November 1857)
Sen. Johannes Cornelis (Jan) (gebore 23 Julie 1859)
Clara Petronella (gebore 5 Februarie 1861)
Anne Lucia (Annie) (gebore 11 Mei 1863)
Willem Izaak (gebore 24 Oktober 1865) (oupa van die aktrise Marga van Rooy)
Jacobus Alberts (Koos) (gebore 9 Augustus 1868)
Pauline Johanna (gebore 10 Oktober 1870)
Frederica (gebore 4 Julie 1873)
Gertruida Adriana (eggenote van dr. Flippie Snyman) (gebore 21 Mei 1876)

Sien ook[wysig | wysig bron]

Brechtje van Rooy (née Postma)

Bronnelys[wysig | wysig bron]

(af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.
Die familie van Rooy in Suid-Afrika