Anzil Kulsen

Anzil Kulsen is ’n Afrikaanse skrywer van jeugverhale.

Lewe en werk[wysig | wysig bron]

Anzil Kulsen is op Upington gebore en word dan in ’n enkelouer-gesin op Keimoes groot. Sy het ’n broer, Clinton. Haar laerskoolopleiding kry sy op De Aar, waarna sy by Oranjezicht Hoërskool op Keimoes matrikuleer. Na skool studeer sy vir twee jaar aan ’n B.Com.-graad op Noordwes-Universiteit, maar voltooi nie hierdie studies nie. Vir ’n jaar studeer sy dan Taalpraktyk by die Technikon van die Oranje-Vrystaat, waarna sy as kliëntediensbeampte en opleier by Perm Bank op Upington gaan werk. Sy verwerf ’n B.A.-graad aan die Universiteit van Suid-Afrika en skryf dan in vir ’n honneurs-graad in letterkunde. Sy sluit later by die ATKV aan as projekbestuurder, waar sy veral in die Noord-Kaap aktief is met die vestiging van leeskringe en om gemeenskappe aan te moedig om self te skryf. As deel van haar werk besoek sy afgeleë gemeenskappe om daar met mense oor boeke te gesels, terwyl sy ook kreatiewe skryfkursusse aanbied en spel- en narratiewe terapie doen. Sy is getroud met Heine, en hulle het twee kinders, ’n seun en ’n dogter. Hulle woon op Upington.

Skryfwerk[wysig | wysig bron]

Aanvanklik lê sy sonder veel sukses voortdurend gedigte, kortverhale en artikels aan tydskrifte en uitgewers voor. In 2000 skryf sy in vir ’n kursus in kreatiewe skryfwerk deur The Writer’s Bureau of London in Engeland, waar sy in 2003 ’n sertifikaat verwerf. Haar eerste artikel word in 2001 in De Kat gepubliseer. ’n Paar gedigte word deur middel van Poetry Institute of Africa gepubliseer en vir sowat drie jaar werk sy mee aan dagstukkie-boeke vir Carpe Diem Media. Hierna publiseer sy gereeld kortverhale, artikels en rubrieke in tydskrifte. ’n Kortverhaal van haar word opgeneem in die versamelbundel “Verlief”, wat liefdesverhale vir die jeug bevat. Haar groot deurbraak kom met die publikasie van haar jeugroman “Zita”. Dit handel oor ’n bruin meisie wat in ’n plakkerskamp grootword. Haar pa is ’n Indiër en sy lyk dus anders as die ander kinders. Die vervreemding en probleme met aanpassing word vergroot wanneer sy as gevolg van haar buitengewone akademiese prestasies in ’n skool met hoofsaaklik wit kinders beland. “’n Hart vol sand” beskryf die werklikhede van die lewens van jong mense op ’n klein, plattelandse gemeenskap. Terselfdertyd is dit ook ’n vermaaklike verslag van ’n jong, bedorwe stadsmeisie se ervaring van eerste liefde en haar ontdekking van haar kulturele erfenis. Jenna se pa stuur haar na Kepeke, ’n klein dorpie in die Kalahari, waar daar baie sand is en nie veel van enigiets anders nie. Die eerste voorkoms is egter bedrieglik. “Sorrie maak nie gesond nie” vertel van die matriekmeisie Rose se stryd nadat sy besef sy is swanger. Sy wil nie seksueel aktief wees nie, maar Rodriek dring aan en na hulle besoek aan die klub Las Vegas is sy verwagtend. Sy het te veel gedrink en kan niks van die gebeure onthou nie. Sy glo dat Rodriek haar verkrag het. Rose se ma drink te veel en treur nog oor die dood van haar boetie, terwyl haar afwesige pa probeer om betrokke te wees by sy familie, maar nie werklik slaag nie. Die “Karatekas”-reeks is vir jong kinders tot nege jaar, met die hoofkarakters wat karate beoefen. Die eerste boek in die reeks is “Vriende en verraad”, waar Warren tydens die kampioenskappe die beste vaar in die dojo. Sy beste vriend is Divan, wat reeds ’n rooi gordel het, maar nou bedreig voel deur Warren se sukses. Boonop bring Warren se meisie, Kyla, al hoe meer tyd saam met Divan deur en het Warren se ma nie genoeg geld om vir die inskrywing vir die groot kampioenskap in Durban te betaal nie. In “Konkels en skelmstreke” is Kyla in Durban, maar haar pa daag nie op soos hy belowe het nie en sy beseer haar enkel in die bus. Dan hoor sy ’n gesprek wat haar laat dink dat daar ’n groot bedrogspul aan die gang is. Sy weet nie of sy moet veg as sy weet van die oneerlikheid nie en boonop is haar enkel seer. Sy stel die versamelbundel^[1] “’n Bordjie vergifnis” saam uit inskrywings wat aan die tydskrif Kuier se kortverhaalkompetisie gestuur is.

Publikasies[wysig | wysig bron]

Jaar	Publikasies
2006	Zita
2014	Karatekas 1: Vriende en verraad
2015	Karatekas 2: Konkels en skelmstreke
	’n Hart vol sand
	Sorrie maak nie gesond nie
	Samesteller
2012	’n Bordjie vergifnis