Ara

in Wikipedia, die vrye ensiklopedie
(Aangestuur vanaf Arapapegaai)

Ara
Ara macao.
Wetenskaplike klassifikasie
Koninkryk:
Animalia
Filum:
Chordata
Klas:
Aves
Orde:
Psittaciformes
Familie:
Psittacidae
Subfamilie:
Arinae
Tribus:
Arini
Genusse

Ara
Anodorhynchus
Cyanopsitta
Primolius
Orthopsittaca
Diopsittaca

Aras of arapapegaaie (Engels: macaws) is dikwels kleurryke papegaaie met lang sterte. Daar is ses genera van Psittacidae (ware papegaaie) wat in Afrikaans as "ara" bekend is, hoewel net een genus Ara heet. Die ander vyf is Anodorhynchus, Cyanopsitta, Primolius, Orthopsittaca en Diopsittaca.

Aras is inheems aan Sentraal-Amerika, Mexiko, Suid-Amerika en voorheen die Karibiese gebied. Die meeste spesies word verbind met woude, veral reënwoude, maar ander verkies bos- of graslande.[1]

Biologie[wysig | wysig bron]

Aras word van ander papegaaie onderskei deur hul proporsioneel groter snawels, lang sterte en relatief kaal, ligkleurige gesigskolle. In sommige spesies is die gesigskolle kleiner en beperk tot ’n geel kol om die oë en ’n tweede kol naby die basis van die snawel. ’n Ara se veerpatroon aan sy gesig is so uniek soos ’n vingerafdruk.[2]

Die grootste aras is die Anodorhynchus hyacinthinus, Ara ambiguus en Ara chloropterus. Hoewel voëls van die genera Cyanopsitta, Orthopsittaca en Primolius steeds relatief groot is, is hulle kleiner as lede van Anodorhynchus en Ara. Die kleinste lid van die familie is Diopsittaca; hy is nie groter as sommige parkiete van die genus Aratinga nie.[1]

Aras is, nes ander papegaaie, toekans en spegte, sigodaktiel (die binneste en buitenste toon wys na agter en die twee middelste tone vorentoe).[1]

Spesies[wysig | wysig bron]

Daar is 19 spesies aras, insluitende uitgestorwe en ernstig bedreigde spesies.[3] Daar is ook verskeie hipotetiese uitgestorwe spesies, maar daar is min getuienis daarvoor.[4]

  • Anodorhynchus
    • Anodorhynchus glaucus (ernstig bedreig of uitgesterf)
    • Anodorhynchus hyacinthinus
    • Anodorhynchus leari
  • Cyanopsitta
    • Cyanopsitta spixii (waarskynlik uitgesterf in die natuur)
Van links: ’n Skarlaken-, blou-en-geel- en militêre ara.
’n Blou-en-geel- en bloukeel-ara.
’n Verskeidenheid aras.
  • Ara
  • Orthopsittaca
    • Orthopsittaca manilata
  • Primolius
    • Primolius couloni
    • Primolius maracana
    • Primolius auricollis
  • Diopsittaca
    • Diopsittaca nobilis

Hipotetiese uitgestorwe spesies[wysig | wysig bron]

Verskeie hipotetiese uitgestorwe spesies is voorgestel waarvoor daar min getuienis is. Hulle kon subspesies gewees het, of bekende papegaaie wat na ’n eiland ingevoer en later verkeerdelik as ’n aparte spesie beskou is.[4]

  • Ara martinica (Rothschild, 1905)
  • Ara guadeloupensis (Clark, 1905)
  • Ara erythrocephala (Rothschild, 1905)
  • Ara gossei (Rothschild, 1905)
  • Ara atwoodi (Clark, 1905)

Bewaringstatus[wysig | wysig bron]

Die meeste aras is nou bedreig in die natuur en ’n paar het uitgesterf. Cyanopsitta spixii is waarskynlik nou uitgesterf, en Anodorhynchus glaucus moontlik ook (net twee betroubare rekords bestaan van iemand wat laasgenoemde in die 20ste eeu gesien het). Die grootste probleme wat ’n bedreiging vir die voëls inhou, is die vinnige tempo van ontbossing en onwettige handel.[6]

Internasionale handel in alle ara-spesies word deur die Convention on International Trade in Endangered Species of Wild Flora and Fauna (Cites) beheer. Sommige spesies, soos Ara macao, word in Aanhangsel I genoem en daar mag nie vir kommersiële doeleindes met hulle handel gedryf word nie. Ander spesies, soos Diopsittaca nobilis, word in Aanhangsel II genoem en daar mag kommersieel met hulle handel gedryf word mits seker beheermaatreëls in plek is, soos spesiale permitte.

Galery[wysig | wysig bron]

  • Ara ararauna.
    Ara ararauna.
  • Ara militaris.
    Ara militaris.
  • Primolius auricollis
    Primolius auricollis
  • Anodorhynchus hyacinthinus.
    Anodorhynchus hyacinthinus.
  • Die uitgestorwe Ara tricolor.
    Die uitgestorwe Ara tricolor.

Verwysings[wysig | wysig bron]

  1. ↑ 1,0 1,1 1,2 Abramson, J., Speer, B. L., & Thomsen, J.B. 1999, "The Large Macaws, Their Care and Breeding", Raintree Publications:CA
  2. ↑ "Facial fingerprint". webparrots.com (in Engels). Geargiveer vanaf die oorspronklike op 20 Augustus 2019.
  3. ↑ "Zoological Nomenclature Resource: Psittaciformes (Version 9.004)". www.zoonomen.net. 5 Julie 2008. Geargiveer vanaf die oorspronklike op 22 April 2020.
  4. ↑ 4,0 4,1 Fuller, Errol (1987). Extinct Birds. Penguin Books (England). pp. 148–9. ISBN 0-670-81787-2.
  5. ↑ Wetmore, A. (1937). "Ancient records of birds from the island of St. Croix with observations on extinct and living of Puerto Rico". Journal of Agriculture of the University of Puerto Rico. 21 (1): 5–16.
  6. ↑ Snyder, N.; McGowan, P.; Gilardi, J.; Grajal, A., reds. (2000). Parrots: Status Survey and Conservation Action Plan 2000–2004. Gland, Switserland, en Cambridge, VK: IUCN. ISBN 978-2-83170504-0.

Eksterne skakels[wysig | wysig bron]

Ontsluit van "https://af.wikipedia.org/w/index.php?title=Ara&oldid=2565134"