Argentynse Vloot

Die Argentynse voorraadskip ARA Patagonia tydens vlootoefeninge (Mei 2007).

'n Super Etendard van die vlootlugmag.

ARA Almirante Brown D 10, 'n MEKO-klas torpedojaer.

Die duikboot ARA San Juan.

Die Argentynse Vloot (Spaans: Armada de la República Argentina, afkorting ARA) is die vloot van die gewapende magte van Argentinië, 'n Spaanssprekende republiek in die suide van Suid-Amerika. Die naam van elke skip van die Vloot word deur die letters ARA voorafgegaan.

Samestelling

Die Argentynse Vloot se hoofkwartier is by die Puerto Belgrano-vlootbasis naby Bahía Blanca en is verder verdeel in afdelings volgens skeepstipe:

• Amfibiese kommando: 2 T-42 torpedojaers, ondersteunende skepe en amfibiese vervoervaartuie,
• Korvet Eerste Afdeling Kommando: 3 A-69 korvette,
• Korvet Tweede Afdeling: 6 140 MEKO korvette,
• Torpedojaer Tweede Afdeling: 4 360H2 MEKO torpedojaers, logistieke, oseanografiese, hidrografiese en patrollieskepe,
• Duikbootvloot (gebaseer in Mar del Plata): 2 TR 1700 duikbote, 1 209-1200 en 1 reddingskip.

Die Vloot het verder die ARA Almirante Irízar tot sy beskikking. Hierdie ysbreker het in 1978 by die vloot aangesluit en word gebruik om basisse in die Argentynse deel van Antarktika te voorsien. Die skip het in 2007 gedeeltelik uitgebrand en word sedertdien herstel en gemoderniseer.