Asteroid City

Asteroid City
Regisseur	Wes Anderson
Vervaardiger	Wes Anderson Steven Rales Jeremy Dawson
Draaiboek	Wes Anderson Roman Coppola
Met	Jason Schwartzman Scarlett Johansson Tom Hanks Jeffrey Wright Tilda Swinton Bryan Cranston Edward Norton Adrien Brody Liev Schreiber Hope Davis Rupert Friend Steve Carell Matt Dillon Hong Chau Willem Dafoe Margot Robbie Tony Revolori Jeff Goldblum
Musiek deur	Alexandre Desplat
Kinematografie	Robert Yeoman
Ateljee	Indian Paintbrush American Empirical Pictures
Uitgereik	23 Mei 2023 (2023-05-23), Cannes 16 Junie 2023 (2023-06-16), VSA
Speeltyd	105 minute
Land	VSA
Taal	Engels

Die regisseur, Wes Anderson.

Asteroid City is 'n Amerikaanse wetenskapsfiksie-/komediedramarolprent van 2023 wat deur Wes Anderson geskryf, geregisseer en vervaardig is van 'n storie wat hy saam met Roman Coppola geskryf het. Dit het 'n ensemble van topakteurs, onder andere Jason Schwartzman, Scarlett Johansson, Tom Hanks, Jeffrey Wright, Tilda Swinton, Bryan Cranston, Edward Norton, Adrien Brody, Liev Schreiber, Rupert Friend, Steve Carell, Matt Dillon, Hong Chau, Willem Dafoe, Margot Robbie, Tony Revolori en Jeff Goldblum.

Die storielyn gaan grotendeels oor 'n toneelstuk oor 'n konvensie vir junior sterrekykers in 'n retrofuturistiese weergawe van 1955, maar dit raak ingewikkeld omdat die vervaardiging van die toneelstuk die onderwerp van 'n dokumentêre program vir televisie is. Dit gaan ook oor buiteaardse wesens en VVV's wat gesien word in die Amerikaanse suidwestelike woestyn naby die kerntoetsterreine ná die Tweede Wêreldoorlog.

Rolverdeling

• Jason Schwartzman as
  • Augie Steenbeck, 'n oorlogsfotojoernalis en Woodrow se pa
  • Jones Hall, die akteur wat die rol van Steenbeck vertolk
• Scarlett Johansson as
  • Midge Campbell, 'n beroemde, maar ontnugterde aktrise en Dinah se ma
  • Mercedes Ford, die aktrise wat die rol van Campbell vertolk
• Tom Hanks as Stanley Zak, Augie se skoonpa, wat glad nie van hom hou nie
• Jeffrey Wright as generaal Grif Gibson, die gasheer van die konvensie vir junior sterrekykers
• Tilda Swinton as dr. Hickenlooper, 'n wetenskaplike by 'n plaaslike sterrewag
• Bryan Cranston as die gasheer van 'n televisiereeks waarop die dokumentêr uitgesaai word
• Edward Norton as Conrad Earp, 'n legendariese dramaturg
• Adrien Brody as Schubert Green, 'n regiseur in beheer van die produksie op televisie
• Liev Schreiber as J.J. Kellogg, Clifford se pa
• Hope Davis as Sandy Borden, Shelly se ma
• Rupert Friend as
  • Montana, 'n singende cowboy wat in June belangstel
  • Asquith Eden, die akteur wat die rol van Montana vertolk
• Steve Carell as 'n motelbestuurder
• Matt Dillon as
  • 'n motorwerktuigkundige
  • Walter Geronimo, die akteur wat sy rol vertolk
• Hong Chau as Polly, Schubert se vrou
• Willem Dafoe as Saltzburg Keitel, 'n toegewyde dramaonderwyser
• Margot Robbie as
  • Steenbeck se oorlede vrou en Zak se dogter
  • die aktrise wat die vrou se rol vertolk
• Tony Revolori as generaal Grif Gibson se tweede in bevel
• Jeff Goldblum as die buiteaardse wese
• Fisher Stevens as Speurder 1
• Rita Wilson as mev. Weatherford
• Bob Balaban as 'n sakereus
• Deanna Dunagan as 'n kelnerin

Storielyn

In ’n retrofuturistiese weergawe van die 1950’s stel ’n televisieaanbieder ’n dokumentêr bekend oor die ontstaan en vervaardiging van Asteroid City, ’n verhoogstuk deur die beroemde dramaturg Conrad Earp. Die gebeure van die stuk word in wye skerm en gestileerde kleur uitgebeeld, terwyl die spesiale effekte vir televisie in swart-wit vertoon word.

In die verhoogstuk word ’n junior sterrekykerskonvensie op die fiktiewe woestyndorp Asteroid City gehou. Die oorlogsfotojoernalis Augie Steenbeck kom vroeg by die konvensie aan saam met Woodrow, sy intellektuele tienerseun, en sy drie jonger dogters. Toe hulle motor onklaar raak, bel Augie sy skoonpa, Stanley, om hulp te vra. Stanley, wat ’n afkeer van sy skoonseun het, oorreed hom om vir die kinders van hul moeder se onlangse dood te vertel, wat Augie tot dusver verswyg het. Augie en Woodrow ontmoet Midge Campbell, ’n beroemde maar wêreldmoeë aktrise, en haar dogter, Dinah, wat net soos Woodrow benoem is om tydens die konvensie vereer te word. Augie en Midge, en Woodrow en Dinah, raak deur die loop van die verhoogstuk geleidelik op mekaar verlief.

Die ander deelnemers aan die konvensie arriveer:

• Generaal Grif Gibson
• Die sterrekundige dr. Hickenlooper
• Nog drie tieners wat vir pryse besoem is (Clifford, Shelly en Ricky)
• Hulle ouers (J.J., Sandy en Roger)
• ’n Bus met laerskoolkinders en hulle jong onderwyseres, June Douglas
• ’n Cowboyorkes onder leiding van die sanger Montana

’n Plaaslike motel voorsien almal se verblyf. Gibson verwelkom die deelnemers by die Asteroid City-krater, waar een van die tieners 'n beurs vir sy of haar uitvinding sal ontvang. ’n VVV verskyn skielik bo die krater; ’n buitenaardse wese kom te voorskyn en steel die oorblyfsel van die meteoriet wat die krater gevorm het. Augie slaag daarin om die wese af te neem. Gibson, met instruksies van die president, plaas die dorp onder militêre kwarantyn, en almal word aan mediese en sielkundige ondersoeke onderwerp.

Scarlett Johansson

Jason Schwartzman

Adrien Brody

Tilda Swinton

Intussen ontwikkel ’n romanse tussen Montana en June, wat die studente verseker dat die buitenaardse wese waarskynlik vreedsaam is. Die prysbenoemdes gebruik dr. Hickenlooper se toerusting om met die buitenaardse wese te probeer kontak maak. Deur die wag wat die betaaltelefoon dophou te flous, bel Ricky sy skoolkoerant om die buitewêreld van die kwarantynbesonderhede en die toesmeerdery te vertel.

Die gebeure in Asteroid City word nasionale nuus. ’n Woedende Gibson staan op die punt om die kwarantyn te beëindig toe die VVV weer verskyn en die meteoriet terug in sy oorspronklike posisie laat val; die generaal sien nuwe merke daarop en lei af dat dit "in 'n inventaris opgeneem is”. Gibson stel toe die kwarantyn weer in; die kinders, wetenskaplikes en ouers kom in opstand en gebruik die prysbenoemdes se uitvindings om die weermag te oorrompel. In die epiloog van die verhoogstuk is Augie en sy gesin die laastes wat Asteroid City verlaat nadat Gibson die kwarantyn amptelik opgehef het. Woodrow onthul dat hy die beurs gewen het en van plan is om die geld op Dinah te bestee, en Midge laat vir Augie haar posadres. Stanley probeer om Augie se dogters te oortuig om hulle moeder se as op te grawe, wat die meisies naby die motel begrawe het, maar gee uiteindelik moed op toe die gesin besluit om ’n gebed ter nagedagtenis van haar doen. Daarna ry Augie en sy gesin stilweg weg.

Deurgaans in die rolprent word die skepping van die verhoogstuk verweef met die stuk self binne die televisiedokumentêr. ’n Tyd nadat Conrad Earp aan die toneelstuk begin skryf het, ontmoet hy die akteur Jones Hall, wat ’n oudisie in Earp se huis doen en onmiddellik gekeur word. Tydens dieselfde ontmoeting soen Earp en Hall mekaar, wat hulle verhouding as minnaars vestig. Earp skryf die stuk met die hulp van ’n plaaslike dramaskool en werf die meeste rolspelers daaruit, insluitend Mercedes Ford, ’n temperamentele maar talentvolle aktrise wat Midge vertolk.

Tydens die opgeneemde uitvoering van die stuk konfronteer Hall, wat Augie speel, die regisseur van die stuk, Schubert Green, en sê dat hy “die stuk steeds nie verstaan nie”, en vra vir Green of hy sy rol “reg hanteer”. Green sê vir Hall om aan te hou om Augie op dieselfde manier te vertolk ondanks sy onsekerheid, en dat hy sy rol wel reg hanteer. Ná daardie interaksie, terwyl hy ’n rookpouse op ’n balkon neem, loop Hall die aktrise raak wat gekeur was om Augie se vrou te speel voordat haar enigste toneel geskrap is. Sy dra die teks van die geskrapte toneel vir hom voor, en hy blyk nuwe insig daaruit te put.

Ses maande nadat die stuk begin speel het, sterf Conrad Earp in ’n motorongeluk.

Ontvangs

Asteroid City het in Amerika en Kanada $28,2 miljoen dollar gemaak en wêreldwyd $54 miljoen. In sy openingsnaweek het die fliek $853 382 in ses teaters geïn. Die $142 230 wat dit per teater gemaak het, was die beste sedert die begin van die covid-19-pandemie en die grootste sedert La La Land in 2016.

Op Rotten Tomatoes het die prent 'n goedkeuringsyfer van 76% gehad, gebaseer op 363 resensies, met 'n gemiddelde punt van 6,9/10. Die webtuiste se konsensus lui: "Asteroid City sal waarskynlik nie vir Wes Anderson baie nuwe aanhangers wen nie, maar dié wat van sy kenmerkende styl hou, sal dit as ’n terugkeer na onberispelik gerangskikte vorm beleef." Op Metacritic het dit 'n punt van 76 uit 100 gekry, gebaseer op 60 resensies, wat dui op 'n "algemeen gunstige" ontvangs.

In The Guardian noem Peter Bradshaw Asteroid City “verskriklik vermaaklik en lig gesofistikeerd”. John Nugent van Empire loof die prent se unieke visuele en vertelstyl en skryf: “[Anderson] bly die rolprentkuns se verstommendste stilis, met die strengheid en detail in elke raam beter as ooit,” maar hy waarsku: “Dit is soms ’n bietjie ongefokus en altyd ’n bietjie oordadig. As jy nie van Wes Anderson-flieks hou nie, sal jy ook nie van dié een hou nie. Maar ons ander moet hoop hy hou aan om dit te maak.”

Op die webtuiste Vulture skryf Bilge Ebiri: “Daar is ’n punt aan al dié oordadigheid. Anderson se obsessief gekonstrueerde dioramas ondersoek die diep menslike behoefte om ons lewens te orden, te kwantifiseer en te beheer in die aangesig van die onverwagte en die onsekere […] Asteroid City is moontlik die suiwerste uitdrukking van hierdie dinamika omdat dit oor die onbekende in al sy vorme gaan.”

In sy resensie vir The New Yorker sonder Anthony Lane vir Johansson uit en sê hy haar spel “kloof die rolprent se geordende oppervlak oop. Selfs al beskou jy die jongste rolprent as ’n boks vol toertjies, móét jy die durf bewonder waarmee Johansson, as Midge, in daardie boks delf en brokstukke van koel, gepynigde geestigheid uithaal. Vaardiger as enigiemand anders hanteer sy die heen-en-weer tussen die werklike en die verbeelde.” Adam Mullins-Khatib van die Chicago Reader het die prent as ’n "ware prestasie van een van Amerika se uniekste rolprentstemme” geprys en Anderson se regie en draaiboek sowel as die rolverdeling se vertolkings geloof.

Skakels

• Hierdie artikel is in sy geheel of gedeeltelik uit die Engelse Wikipedia vertaal.