Bernabéu-stadion

Bernabéu-stadion
Ligging	Madrid, Spanje
Koördinate	40°27′11″N 3°41′18″W
Kapasiteit	83 186
Oppervlak	Gras
Konstruksie
Gebou	Oktober 1944 – Desember 1947
Geopen	14 Desember 1947 (1947-12-14)
Renovasie	1982, 2001, 2019–2024
Argitek	Manuel Muñoz Monasterio Luis Alemany Soler Antonio Lamela
Huurders
Real Madrid Spanje

Die Bernabéu-stadion (Spaans: El Bernabéu) is ’n sokkerstadion met ’n intrekbare dak in Madrid, Spanje. Met ’n sitplek­kapasiteit van 83 186 ná die groot renovasie wat laat in 2024 voltooi is, het die stadion die tweede grootste kapasiteit van alle sokkerstadions in Spanje. Dit is sedert sy voltooiing in 1947 die tuisstadion van Real Madrid. Dit is slegs kleiner as Camp Nou in Barcelona. Die stadion, wat vroeër as die Santiago Bernabéu-stadion bekend gestaan het, staan nou amptelik net as “Bernabéu” bekend.

Die stadion is vernoem na die voormalige sokkerspeler en legendariese Real Madrid-president Santiago Bernabéu (1895–1978). Dit het reeds vier eindstryde van die Europabeker/UEFA Champions League aangebied: in 1957, 1969, 1980 en 2010. Die Bernabéu-stadion was ook die gasheer vir die tweede been van die Copa Libertadores-eindstryd in 2018, wat dit die enigste stadion maak wat al eindstryde van beide kompetisies aangebied het.

Die eindstryde van die 1964 Europese Kampioenskap tussen Spanje en USSR (2–1) en die 1982 FIFA-wêreldbeker tussen Italië en Wes-Duitsland (3–1) is ook hier beslis, wat die Bernabéu die eerste stadion in Europa maak om ’n Europa-beker-eindstryd én ’n Wêreldbeker-eindstryd aan te bied. Die Bernabéu-stadion sal ook wedstryde tydens die 2030-Wêreldbeker aanbied, maar vanaf 2025 is dit steeds onseker of die eindstryd daar gespeel sal word.

Op musiekgebied val Julio Iglesias se konsert van 1983 besonders op, toe 100 000 toeskouers die skouspel bygewoon het. Frank Sinatra, U2, Bruce Springsteen, die Rolling Stones en Taylor Swift het ook op die stadion opgetree op afsonderlike geleenthede.