Bespreking:Hendrik Schoeman

Oud-minister Hendrik Schoeman, wat gister in 'n mielieland op sy plaas in die distrik Delmas dood aangetref is, was 'n miljoenêr-boer, voormalige NP minister, waarnemende Staatspresident en 'n nederige man met deernis vir die armes. Hy het in 1945 in Pretoria gematrikuleer, waarna hy onder meer landbounavorsing in Amerika studeer het. Hy is in 1966 tot die Parlement verkies, waar hy die kiesafdeling Standerton verteenwoordig het. Twee jaar later het hy adjunkminister van Landbou geword en in 1972, op die ouderdom van 42 jaar, Minister van Landbou. Mnr. Schoeman was toe reeds hoof van Schoeman Boerdery, 'n reuse-gesinsaak, wat deur sy pa begin is. Die Schoemans het grond in vyf distrikte in Transvaal besit en het 2500 werknemers in diens gehad.

Mnr. Schoeman het in 1980 Minister van Vervoer geword. Die tolpadstelsel het in sy termyn in werking getree en treine is oopgestel. In dié tyd het hy ook leier van die Volksraad geword. Met pres. P.W. Botha se staatsbesoek in 1986 aan Frankryk was mnr. Schoeman waarnemende Staatspresident. En toe sy kabinetskollegas hom daarmee gelukwens, het hy skertsend gesê: Boys, môreoggend agtuur skommel ek my Kabinet. Sorg dat julle almal daar is! Mnr. Schoeman het in November 1986 uit die Kabinet en Parlement bedank toe sy vrou, Christelle, ernstig siek geword het. Daarna het hy 'n uitvoerende boer op Delmas geword, soos hy homself genoem het. In Maart 1989 is hy as voorsitter van die finansiële komitee van die NP in Transvaal aangewys en het aangedui dat hy dalk na die politiek kan terugkeer. Hy het in Mei 1992 'n ere-kolonel van die Delmas Kommando geword. Drie maande later is hy uit 'n hospitaal in Pretoria ontslaan nadat hy vir 'n longprobleem behandel is. Met die verkiesing in April verlede jaar het mnr. Schoeman gesê: "Ek het vir die kaalkopwonder (adj.pres. F.W. de Klerk) gestem. Vir my is daar net een party en dit is die Nasionale Party."