Bevriende getalle
Bevriende getalle is pare natuurlike getalle wat die eienskap besit dat die som van die faktore van elk van albei getalle gelyk is aan die ander getal van die paar. By die faktore van getal x word die getal 1 saamgetel, maar nie die getal x self nie. Die kleinste voorbeeld van so ‘n bevriende getallepaar is 220 en 284. Hierdie voorbeeld is reeds deur die antieke Grieke ontdek. Teen die middel van die 20ste eeu was daar 390 sulke pare bekend. Sedertdien is daar met die hulp van rekenaars 1 227 869 886 pare vasgestel.
Voorbeeld
[wysig | wysig bron]Die faktore van 220 is 1, 2, 4, 5, 10, 11, 20, 22, 44, 55 en 110. Tel ons hierdie getalle op kry ons 284, presies die tweede lid van die paar. Die faktore van die ander lid van die paar, naamlik 284, is 1, 2, 4, 71 en 142. Die som van hierdie vyf syfers is 220, insgelyk presies die eerste lid van die paar.