Biblioteca Vasconcelos

Die Biblioteca José Vasconcelos is 'n groot openbare biblioteek en een van die grootste kultuursentra in Meksikostad. Dit lê benoorde die Meksikostadse historiese sentrum. Dit maak deel uit van die Nasionale Raad van Kuns en Kultuur van die Meksikaanse Federale Owerheid en sou oorspronklik as spil van die Meksikaanse biblioteke dien. Met die jare (en ná die oorkoming van die aanbouprobleme) word dit 'n landteken van die stad en 'n nuwe ontmoetingsplek om te kom leer. Die biblioteek word elke jaar deur miljoene mense besoek.

Adres: Eje 1 Norte esquina Aldama S/N, Buenavista, Cuauhtémoc, 06350 Meksikostad.
Telefoon: +52559157 2800
Totale oppervlakte: 38 091 m² ; 26 000 daarvan is tuine.
Afmetings van die biblioteekgeboue: 270 meter lank en 28 meter hoog. Drie geboue met elkeen ses verdiepings.
Parkering: 325 staanplekke
Kapasiteit: 5 000^[1]
Besoekers (jaarliks): 1 825 000^[1]
Boujaar: 2004–2007
Boekebesit: 580 000
Kaart by Open Street Map.

Geskiedenis[wysig | wysig bron]

In die neëntiende eeu was die terrein waarop die biblioteek vandag staan saam met die Santa María la Ribera, Guerrero en Atlampa een van die eerste stadswyke benoorde die historiese sentrum. Die Biblioteca Vasconcelos is op die grond van die eertydse Buenavistastasie opgerig. Laasgenoemde beskik vandag oor 'n voorstadstasie en 'n groot winkelsentrum (Forum Buenavista) wat die nodige geriewe, kitskoseetplekke en kitsbanke bied. Elke Saterdag vind die Tianguis Cultural del Chopo voor die biblioteek plaas. Dit is 'n vlooimark vir Rock en stadteenkultuur.

Die gebou[wysig | wysig bron]

Die biblioteek bestaan uit drie aaneengeskakelde geboue met elkeen drie verdiepings. Dit het deursigtige dakke en mure en is van beton, glas en staal gebou. Hierdie kombinasie bevorder besieling en leer met natuurlike lig, kamertemperatuur en moderne inrigting. Die verskillende vlakke van die gebou word deur trappe en hysbakke met mekaar verbind, met afsonderlike vlakke in die middel en 'n reeks skuifbare boekrakke wat die 580 000 boeke 'n tuiste gee. Die biblioteek dien as inspirasieplek om te lees, studeer, na te dink en uit te rus. Die gebou word omring deur ontspanningstuine met inheemse plante uit Meksikostad, wat hierdeur ook eerstehandse kennis bied oor een van die mees diverse lande ter wêreld.

Die Vasconcelos Biblioteek is ontwerp deur Albert Kalach en word dikwels as 'n sprekende voorbeeld van die eietydse boukuns beskou.

Planne[wysig | wysig bron]

Seminaarruimte[wysig | wysig bron]

Gehoorsaal[wysig | wysig bron]

Die biblioteek se gehoorsaal vat 500 mense. Dit het 'n groot projeksieskerm, professionele klank- en videotoerusting, asook 'n spesiale ruimte op die eerste verdieping vir die beligting, pers en BBP-assistente. Die gehoorsaal is in die biblioteektuin "geplant" en het self ook 'n daktuin.

Veeldoelkamers A, B en C[wysig | wysig bron]

Op die eerste verdieping van die biblioteek is die drie veeldoelkamers A, B en C. Elkeen is toegerus vir 60 persone en het 'n projeksieskerm. Hulle is van die hoofvertrek geskei.

Hoofingangsontvangsaal[wysig | wysig bron]

Buitelugforum Las Gradas[wysig | wysig bron]

'n Buitelugvertrek naby die hoofingang met plek vir 200 mense op die tribune. Dit word deur 'n glasmuur van die ontvangsaal afgeskerm.

Noordelike en suidelike leessale[wysig | wysig bron]

Leesvertrekke[wysig | wysig bron]

Die gemeenskap se byeenkomste en werkswinkels kan in enige van die meer as 40 leesvertrekke aan die kante van die biblioteek gehou word. Hierdie vertrekke met tafels en stoele vat tot 30 mense.

Multimediasentrum[wysig | wysig bron]

Die sentrum kan vir werkswinkels benut word wat lessenaarrekenaars benodig.

Kinderkant[wysig | wysig bron]

Tuine[wysig | wysig bron]

Die tuine is 'n wesenlike deel van die biblioteek. Die tuine word almal deur tonnels, paadjies met beeldhouwerk asook spoorwegoorblyfsels aan mekaar verbind.

Jardín suroeste (Suidoostelike tuin)
Tuinpaadjies
Daktuin op die eerste verdieping
Tuine en tonnels

Biblioteekgeriewe[wysig | wysig bron]

Rusvertrekke: Daar is vele rus- en rookkamers.
Kleedkamers: Dit is op die eerste verdieping geleë.
Wi-Fi
Toiletgeriewe met drinkwaterfonteine.

Kleedkamers
Rusvertrek op die eerste verdieping
Elke badkamer het drinkwaterfonteine

Besienswaardighede naby die biblioteek[wysig | wysig bron]

Tianguis Cultural del Chopo: is 'n vlooimark (tianguis in Meksikaans-Spaans) wat Saterdae naby die biblioteek gehou word en plaaslik as El Chopo bekend staan. Hierdie besondere basaar gee uiting aan die stadteenkultuur met 'n musikale inslag. Daar word met aandenkings, plate, klere, tydskrifte, boeke en ander versamelstukke in die musiekgenres soos Rock, Metal, Goth, Punk, Grunge en Ska handel gedryf.

Almedapark van Santa María la Ribera: wes van die biblioteek lê die Santa María la Ribera colonia (stadswyk) wat in die 19de eeu ontstaan het toe van die welgesteldes buite die stadsgrense wou gaan woon. Tans is hierdie stadswyk 'n laslappie van ou en nuwe huise, waarvan meer as 1 000 histories gedenkwaardig is. Die Almedapark maak die middelpunt uit van Santa María la Ribera, met die Marisco Kiosk as hoofbesienswaardigheid. Dit is slegs vyf blokke ver van die biblioteek. Die Kiosk is in die laat 19de eeu deur José Ramón Ibarrola ontwerp en gebou om as Meksikaanse Paviljoen vir die Wêreldtentoonstelling 1886 in New Orleans en die Saint-Louis-Uitstalling 1902 te dien. Die Kiosk is die tweemalige wenner van die Wiki Loves Monuments Mexico.

Museum van die Aardkundige Instituut van die UNAM: dit is aan die einde van Almedapark geleë en bied 'n versameling fossiele, minerale, flora en fauna uit verskeie wêrelddele en 'n klein versameling landskapskilderye deur José María Velasco. Die Jugendstilgebou het gebrandskilderde vensters wat kenmerkende Meksikaanse tonele uitbeeld. Sy fasade bestaan uit sandsteen en toon reliëfs van skulp- en reptielfossiele.

Universiteitsmuseum Chopo van die UNAM: is 'n Jugendstil-staal-en-glaskonstruksie wat deur sy twee groot metaaltorings die koppe laat draai. Omrede die gebou soos die struktuur in Engeland lyk, kleef die bynaam Palacio de Cristal, oftewel Kristalpaleis. Tans is die museum op die moderne kuns, eksperimentele projekte vir die eietydse kuns, asook die jong kunstenaars toegespits. Die museum het ook 'n samewerkingsooreenkoms met Wikimedia Mexico. In hierdie museum bring die plaaslike vereniging veeltydse verrigtinge soos die Wiki Loves Monuments-prysuitdeling tot stand.

Revolusiemonument: is 'n besienswaardigheid en gedenkteken ter nagedagtenis aan die Meksikaanse Revolusie. Dit is op Republiekplein (Spaans: Plaza de la República) staangemaak en verdeel Revolution Avenue tussen die avenues Paseo de la Reforma en Avenida de los Insurgentes in die middestad van Meksikostad. Dit beskik oor 'n uitsigplatform op die dak en huisves die Nasionale Revolusiemuseum wat onlangs oorgedoen is.

Winkels naby die biblioteek[wysig | wysig bron]

Fórum Buenavista: 'n groot winkelsentrum naby die biblioteek het veel te bied: supermark, winkels, 'n teaterkompleks met 14 rolprentteaters en 1 IMAX, apteke, restaurante, gimnasium, mode-, skoen-, elektronika- en rekenaarwinkels, een groot kitskosarea, koffiewinkels en kitsbanke.

Wal-Mart Buenavista: 'n tak van die welbekende VS-kettingwinkel.

Onderweg[wysig | wysig bron]

Daar is verskeie vervoermiddele van te kies om vanaf die verblyfplek na die lokaal te pendel: per moltrein 30 minute ($0,38 USD), per bus 30 minute ($0,42 USD), per metrobús 20 minute ($0,46 USD), per taxi 15 minute ($5–10 USD).

Per moltrein: die Buenavistamoltreinstasie van Mexico City Metro is net buitekant die lokaal geleë. Hierdie spoor behoort tot Roete B van die kaartjiestelsel. Buiten die lae kaartjiegeld word geen verdere reisgeld (wat betref afstand, tyd, aantal spoorverwisselings of stasies aangedoen) gehef nie. 'n Enkele rit duur vir so lank jy wil, tot jy afklim en die stasie verlaat.

Per metrobús: 'n hanetree van die lokaal af wag 'n groot metrobústerminus – 'n snelbusdiens wat met Roete 1, 3 en 4 verbind is. Laasgenoemde roete is teen 'n tarief van 40 MXN (3 USD) regstreeks met die Benito Juarez Internasionale Lughawe verbind.

Per taxi: die taxigeld is goedkoper as dié van ander stede in die wêreld. 'n Rit vanaf die historiese sentrum kan so 30 MXN beloop. Jy gaan egter nie in die eerste die beste taxi klim nie.