Birmingham City FC

Birmingham City
Volle naam	Birmingham City Football Club
Bynaam/me	Blues
Stigting	1875 (1875) (as Small Heath Alliance)
Tuisveld	St. Andrew’s
Kapasiteit	29 409
Voorsitter	Tom Wagner
Afrigter	Chris Davies
Liga	Football League Championship
Tuiskleure 　 Wegkleure

Birmingham City Football Club is ’n professionele sokkerklub gebaseer in Birmingham, Engeland. Die klub is in 1875 gestig as Small Heath Alliance, en is hernoem na Small Heath in 1888, Birmingham in 1905, en Birmingham City in 1943. Die span ding mee in die EFL Championship, die tweede vlak van die Engelse sokkerliga­stelsel.

As Small Heath het hulle in die Football Alliance gespeel voordat hulle stigterslede én die eerste kampioene van die Football League Second Division geword het. Die mees suksesvolle tydperk in hul geskiedenis was in die 1950’s en vroeë 1960’s. Hulle het hul hoogste liga-posisie van sesde in die Eerste Divisie in die 1955/56-seisoen behaal en ook die 1956 FA Cup-eindstryd gehaal. Birmingham het in twee Inter-Cities Fairs Cup-eindstryde gespeel — in 1960, as die eerste Engelse klubspan wat ’n groot Europese eindstryd bereik het, en weer die volgende jaar. Hulle het die Ligabeker in 1963 en weer in 2011 gewen. Birmingham het vir ongeveer die helfte van hul geskiedenis in die hoogste vlak van Engelse sokker gespeel; die langste tydperk buite die hoogste afdeling, tussen 1986 en 2002, het twee kort tydperke in die derde vlak ingesluit, tydens welke hulle die Football League Trophy twee keer gewen het.

Hulle het ’n langdurige en vurige mededinging met Aston Villa, hul naaste bure, met wie hulle die Second City-derby speel. Die klub se bynaam is Blues, na die kleur van hul trui, en die ondersteuners staan bekend as Bluenoses. Die klub se berugte hooligangroep staan bekend as die Zulu Warriors.

Hul tuisstadion is St. Andrew’s, waar hulle sedert 1906 speel. Daar is planne om ’n nuwe stadion met plek vir 62 000 toeskouers te bou.

Eksterne skakels

• Amptelike webwerf