Blanche Gerstman

in Wikipedia, die vrye ensiklopedie
Jump to navigation Jump to search
Blanche Gerstman
Blanche Gerstman.jpg
Geboorte2 April 1910
Afsterwe11 Augustus 1973
Beroep(e)komponis, orkesspeler
Portal.svg Musiekportaal
'n Dirigeerklas in 1947. Anton Hartman, Hannes Uys, Albert Coates, Blanche Gerstman en Ernest Fleischmann.

Blanche Gerstman (2 April 1910[1] - 11 Augustus 1973) was een van Suid-Afrika se belangrikste komponiste, maar ook 'n veelsydige musikus wat haar brood as orkesspeler verdien het.

Sy ontvang haar voorbereidende opleiding by die seun van die voormalige goewerneur van die Kaapkolonie, sir Walter Hely-Hutchinson, Victor Hely-Hutchinson (teorie) en Colin Taylor (klavier) en verwerf die graad B.Mus. onder prof. W.H. Bell aan die Suid-Afrikaanse Musiekkollege in Kaapstad. In 'n vroeë komposisie, Hellas (1928), vir sopraan, vrouekoor en orkes, het sy vir die eerste keer haar aanleg getoon vir die soort musiek wat sy later met groot welslae sou komponeer. Nietemin het sy in die daaropvolgende jare haar voorliefde vir suiwer instrumentale musiek werke vir klavier en viool behou en in 1950 'n voortreflike sonate vir die twee instrumente gekomponeer.

Buiten die liedere wat sy Engels, Duits en Nederlands geskryf het, het sy ook 'n aantal Afrikaanse gedigte van Jan F.E. Celliers, W.E.G. Louw, Elisabeth Eybers (die sangsiklus Die lied van die vrou; 1953) en Ch. Weich getoonset. Haar koorwerke gegrond op die gedigte van N.P. van Wyk Louw (Die Boodskap van Maria) en I.D. du Plessis (Ode to South Africa) is tussen 1946 en 1948 geskryf. Sy was van tyd tot tyd dosent in komposisie aan die Universiteit van Kaapstad se S.A. Musiekkollege en van 1961 tot 1963 aan die Universiteit van Pretoria. Hoewel sy deurentyd musiek vir viool, klavier, orrel en orkes gekomponeer het, het sy haar grootste welslae behaal met sangwerke, waarvan, buiten die voorafgenoemde twee werke, Uit die Passie ook belangrik is.

Met 'n beurs wat sy in 1950 by die Performing Rights Society gewen het, kon sy in Londen verder gaan studeer. In de Kaapstadse Munisipale Orkes het sy die kontrabas gespeel van 1940 tot 1950 en weer van 1964 tot 1966.

Verwysings[wysig | wysig bron]

  1. Afrikaanse kultuuralmanak gee haar geboortedatum as 2 April aan, maar die Standard Encyclopaedia of Southern Africa as 29 Julie, ook 1910

Bronne[wysig | wysig bron]

  • Potgieter, D.J. (ed.) 1974. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
  • Swart, dr. M.J. (voorsitter redaksiekomitee). 1980. Afrikaanse kultuuralmanak. Aucklandpark: Federasie van Afrikaanse Kultuurvereniginge.