Blanche Pienaar

in Wikipedia, die vrye ensiklopedie
Jump to navigation Jump to search
Blanche Pienaar.jpg

Blanche Pienaar is die skuilnaam van die Afrikaanse skrywer S.J. Meadows-Cullum (1905–1968; neé Terblanche[1]).

Lewe en werk[wysig | wysig bron]

Susanna Jacomina Terblanche is op 23 Maart 1905 op die plaas Verzamelkop in die distrik Ladybrand in die Vrystaat gebore. Sy is een van nege kinders van Johannes Gerhardus Terblanche en Maria Dorothea Pienaar[1] Die gesin trek later na die plaas Zaaihoek in dieselfde distrik. Haar eerste onderwys ontvang sy aan die plaasskole Zaaihoek en Commissiepoort en sy gaan daarvandaan na Ladybrand se Sekondêre Skool.

Weens swak gesondheid word haar onderwys etlike jare onderbreek, maar sy gaan tog later na die Normaalkollege en Politegniese Kollege in Bloemfontein.[2]

Sy is op 21 Augustus 1927 getroud met Harry Meadows-Cullum en die egpaar het twee seuns en ’n dogter. Haar man is in 1953 oorlede en sy 15 jaar later op 13 Maart 1968.[1]

Skryfwerk[wysig | wysig bron]

Sy skryf onder die skuilnaam Blanche Pienaar, ’n mengsel van haar vader en moeder se vanne. Haar eerste skets skryf sy nadat sy in vervoering raak oor Jan F.E. Celliers se Die vlakte en hierdie skets verskyn in Die Landbouweekblad. Later verskyn verskeie kortverhale, artikels en sketse onder verskeie skuilname in Die Huisgenoot, Die Boerevrou, Die Brandwag, Die Huisvrou en ander Afrikaanse sowel as Engelse tydskrifte.

Liefdesloutering is ’n sentimentele roman wat die tradisionele liefdesdriehoek as tema het,[3] terwyl Skewe bome disfunksionele verhoudings in die huwelik behandel.

Publikasies[wysig | wysig bron]

Werke uit haar pen sluit in:[4]

Jaar Publikasies
1942 Liefdesloutering
1944 Skewe bome

Verwysings[wysig | wysig bron]

  1. 1,0 1,1 1,2 Geni: http://www.geni.com/people/Susanna-Jacomina-Terblanche/6000000006250561474
  2. Nienaber, P.J. Hier is ons skrywers! Afrikaanse Pers-Boekhandel. Johannesburg. Eerste uitgawe. 1949.
  3. Kannemeyer, J.C. Geskiedenis van die Afrikaanse literatuur 2. Academica, Pretoria, Kaapstad en Johannesburg. Eerste uitgawe. Eerste druk. 1983.
  4. Esaach: http://www.esaach.org.za/index.php?title=Pienaar,_Blanche