Brøndby IF

Brøndby IF
Volle naam	Brøndbyernes Idrætsforening
Stigting	3 Desember 1964 (1964-12-03)
Tuisveld	Brøndby Stadion, Brøndbyvester
Kapasiteit	28 000
Voorsitter	Jan Bech Andersen
Afrigter	Frederik Birk
Liga	Superligaen (Die Superliga)
2024–25	3. posisie
Tuiskleure 　 Wegkleure

Brøndbyernes Idrætsforening, gewoonlik afgekort tot Brøndby IF (Deense uitspraak: [ˈpʁɶnˌpyˀ ˌiˀˈef]), is ’n professionele Deense sokkerklub wat in die Kopenhagense voorstad Brøndbyvester gesetel is. Die klub is op 3 Desember 1964 gestig deur ’n samesmelting van die sokkerklubs Brøndbyøster Idrætsforening (gestig op 10 Oktober 1928) en Brøndbyvester Idrætsforening (gestig op 1 Februarie 1909). Die klub se eerstespan, wat in die Deense Superliga speel, speel hul tuiswedstryde by Brøndby Stadion – in die klub se kleure van blou en geel.

Die klub het nasionaal sowel as internasionaal uitgeblink deur in die kwartfinaal van die Europese Kampioenebeker in 1986–87 en die halfeindronde van die UEFA-beker in 1990–91 te kom. Daarbenewens het die klub in 1998 vir die UEFA Champions League gekwalifiseer, waar Brøndby Bayern München in die groepfase geklop het, en het ook verskeie kere vir die UEFA-beker/Europa League gekwalifiseer.

Gedurende die 1980’s het Brøndby IF se rol in Deense sokker al hoe meer prominent geword, onder andere deur die Deense Superliga in 1985, 1987, 1988, 1990 en 1991 te wen. Tussen 1996–1998 het Brøndby IF drie Deense kampioenskappe agtereenvolgens gewen. In 1998 het die klub ook die Deense Beker gewen en sodoende “Die Dubbel” huis toe gebring. Brøndby IF het die Deense Superliga in 2002 en die Deense Beker in 2005 gewen. Die span het onlangs weer die Deense Beker in 2018 en die Deense Superliga in 2021 gewen.

Brøndby het ’n langdurige mededinging met stadsbure FC Kopenhagen, en hulle ding mee in die Kopenhagen-derby. Die wedstryd staan ook bekend as die “Slag van Kopenhagen” of die “New Firm”, as ’n verwysing na die Old Firm.

Brøndby Support is die amptelike ondersteunersklub van Brøndby IF. Dit is in 1993 gestig en het ongeveer 12 000 lede. Die klub se ultras-groep staan bekend as Alpha en is die hooforganiseerders van tifo.

Eksterne skakels

• Amptelike webwerf