Brandvleidam
Die Brandvleidam is in 1923 in ‘n pan langs die regteroewer van die Breederivier, sowat 10 km besuide Worcester, gebou. Dit het ‘n opgaarvermoë van ‘n 47 miljoen m³ gehad. In 1950 is die damwal verhoog sodat die kapasiteit van die dam op 66 miljoen m³ te staan gekom het. Die kruin van die grondwal was net minder as ‘n kilometer lank en as die dam vol was, het dit ‘n meer van 1500 ha beslaan. Dit is deur ‘n toevoerkanaal van die Holsloot- en Smalbladerenriviere gevul. Vir sy omvang is die Breederiviervallei die intensiefste besproeiingsgebied in die land en was die eerste plek waar besproeiing – reeds in 1896 – op ‘n koöperatiewe grondslag vir die Robertsonse Kanaalraad toegepas is.
Die fynbosspesie Chenolea convallis is endemies aan die nabye van die dam, en die enigste bevolking kom gevolglik hier voor.