Brasiliaanse nasionale vrouerugbyspan

Brasilië
Unie		Brasiliaanse Rugbykonfederasie (CBRu)
Bynaam(e)		As Yaras (“die Yara’s”)
Embleem		Yara
Afrigter(s)		Emiliano Caffera (sedert 2023)
Kaptein(s)		Eshyllen Coimbra
Spankleure		Alt. kleure
Eerste internasionale wedstryd
Nederland 10–0 Brasilië (Amsterdam, Nederland; 10 Mei 2008)
Grootste oorwinning
Colombia 13–34 Brasilië (Luque, Paraguay; 29 Junie 2024)
Grootste nederlaag
Frankryk 84–5 Brasilië (Exeter, Engeland; 31 Augustus 2025)
Wêreldbeker
Verskynings		1/10 (Eerste in 2025)
Beste uitslag		Groepfase in 2025
Unie webwerf
ww2.brasilrugby.com.br

Die Brasiliaanse nasionale vrouerugbyspan (Portugees: Seleção Brasileira de Rugby Union Feminino) is die nasionale vrouerugbyspan wat Brasilië in internasionale wedstryde (toetswedstryde) verteenwoordig. Hulle dra die bynaam As Yaras (Portugees vir: “die Yara’s”) na die gelyknamige wese uit die Brasiliaanse mitologie. Rugby word in Brasilië geadministreer deur die Brasiliaanse Rugbykonfederasie (Confederação Brasiliera de Rugby, CBRu) wat in 1963 gestig is. Brasilië word as die derde beste vrouerugbyspan in die Amerikas beskou (ná die Verenigde State en Kanada). Die Brasiliaanse vrouerugbyspan is tans (September 2025) 25ste op Wêreldrugby se wêreldranglys gelys.

Brasilië het in 2008 sy eerste toetswedstryd teen Nederland gespeel. In 2024 het Brasilië vir die eerste keer vir die vrouerugbywêreldbekertoernooi gekwalifiseer en daarmee die eerste Suid-Amerikaanse land geword wat daarin kon slaag; hulle het egter tydens die 2025-toernooi al hul groepwedstryde verloor. Brasilië speel tradisioneel in geel truie met groen kleuraksente, groen broeke en groen sokkies.

Beheerliggaam

Die hoofartikel vir hierdie afdeling is: Brasiliaanse Rugbykonfederasie.

Die beheerliggaam vir rugby in Brasilië is die Brasiliaanse Rugbykonfederasie (Portugees: Confederação Brasileira de Rugby, CBRu). Die beheerliggaam is in 1963 onder die naam Brasiliaanse Rugbyunie (União de Rugby do Brasil, URB) gestig en in 1970 in Brasiliaanse Rugbyvereniging (Associação Brasileira de Rugby, ABR) hernoem; in 2010 het die beheerliggaam sy huidige naam aangeneem. In 1995 het die Brasiliaanse beheerliggaam ’n volle lid van die Internasionale Rugbyvoetbalraad (IRVR; nou Wêreldrugby) geword. Daarbenewens was die Brasiliaanse beheerliggaam in 1988 ’n stigtingslid van CONSUR (nou Suid-Amerika Rugby).

Geskiedenis

Oorsprong

Die eerste gedokumenteerde vrouerugywedstryd in Brasilië is in 1987 tydens die tradisionele sewesrugbytoernooi by die São Paulo-atletiekklub gehou. Die meeste spelers was vriendinne of susters van die mans en het hulle vir wedstryde en oefensessies begelei. Op Vrouedag 1997 is nog ’n wedstryd by die Desterro Rugbyklub in Florianópolis gespeel. Die voormalige kaptein van die nasionale span, Maria Mikaella, wat ook in dié wedstryd verskyn het, deel haar ervarings:

… we didn’t know the sport. In Brazil we didn’t have rugby on TV or even a rugby ball to buy. We haven’t heard about rugby until our friends began to play. We started just watching, but the sport seemed to be really cool to just watch. So we convinced the boys to teach us. The first game was messy. I just remember that we lost. However made us fall in love with rugby.

… ons het nie die sport geken nie. In Brasilië het ons nie rugby op televisie gehad of selfs ’n rugbybal om te koop nie. Ons het nie van rugby gehoor totdat ons vriende begin speel het nie. Ons het net begin kyk, maar die sport het regtig gaaf gelyk om net te kyk. So het ons die seuns oortuig om ons te leer. Die eerste wedstryd was morsig. Ek onthou net dat ons dit verloor het. Maar ons het op rugby verlief geraak.

In 2008 het Brasilië sy eerste toetswedstryd teen Nederland gespeel. Die span is eers in 2019 weer byeengeroep vir ’n toer na Colombia, gelyk aan hul eerste ontmoeting met ’n ander Suid-Amerikaanse span. In 2020 het die Brasiliane tydens die eerste vrouerugbywêreldbekerkwalifiseringswedstryd in Medellín weer die Colombiane ontmoet, maar hulle is met 23–19 geklop.

Verdere ontwikkeling

In 2023 het Brasilië tydens die 2025-vrouerugbywêreldbekerkwalifisering toetswedstryde teen Colombia gespeel. Suid-Amerika Rugby het, befonds deur Wêreldrugby, die streek se eerste toernooi van stapel gestuur, die Amerikas Rugbytrofee 2023 in Junie in Brasilië. Tydens dié toernooi het die Brasiliane die Colombiane en ’n Amerikaanse jeugspan ontmoet.

Op 5 en 9 Julie 2023 het Brasilië in Medellín weer Colombia ontmoet in ’n uitspeelwedstryd vir die WXV 3. Die span kon sy eerste oorwinning ooit aanteken, toe hulle Portugal met 10–7 kon klop, daarbenewens was dit die eerste toetswedstryd teen ’n Europese opponent in 15 jaar.

Eerste wêreldbekerdeelname

Groepwedstryd tydens die Vrouerugbywêreldbeker 2025 tussen Brasilië en Italië

Op 29 Junie 2024 het die Brasiliane geskiedenis gemaak, toe hulle die eerste Suid-Amerikaanse span geword het wat vir die vrouerugbywêreldbekertoernooi kon kwalifiseer. Dit nadat hulle in Asunción, Paraguay, die Colombiane vir die eerste keer kon klop, waarvolgens hulle tydens die Vrouerugbywêreldbeker 2025 in Engeland hul eerste verskyning gemaak het. Ná hul 34–13-oorwinning oor Colombia het Brasilië van die 51ste tot die 39ste plek op Wêreldrugby se wêreldranglys se ranglys gevorder, hul destyds beste plek. Daarmee was vir die eerste keer in die toernooigeskiedenis elke vasteland deur minstens een nasionale span verteenwoordig. Ná Kanada en die Verenigde State was die Brasiliane die derde span van die Amerikas. Daarbenewens was Brasilië ná Argentinië, Chili en Uruguay (almal by die mansrugbywêreldbekertoernooi) die vierde Suid-Amerikaanse land wat aan ’n rugbywêreldbeker deelgeneem het. Tydens die toernooi in Engeland het die Brasiliane vir die eerste keer Suid-Afrika, Frankryk en Italië ontmoet, maar drie swak nederlae gely.

Kleure, embleem en bynaam

Brasilië speel tradisioneel in ’n geel trui met groen kleuraksente, groen broeke en groen sokkies. Hul alternatiewe trui is groen met wit kleuraksente, wit broeke en groen sokkies.

Die beheerliggaam Brasiliaanse Rugbykonfederasie se kenteken, wat ook op die trui verskyn, toon ’n rugbybal tussen twee doelpale op ’n geel agtergrond met die afkorting CBRu daarbo.

Die span se bynaam is As Yaras (Portugees vir: “die Yara’s”) na die gelyknamige wese uit die Brasiliaanse mitologie.

Toetswedstryde

Brasilië het 5 van sy 20 toetswedstryde gewen, ’n wenrekord van 25,00%. Brasilië se statistieke in toetswedstryde teen alle lande, in alfabetiese volgorde, is soos volg (korrek teen September 2025):

Opponent	Gespeel	Gewen	Verloor	Gelykop	% Gewen
Colombia	8	2	6	0	25,00
Frankryk	1	0	1	0	0,00
Italië	1	0	1	0	0,00
Nederland	5	1	4	0	20,00
Portugal	3	2	1	0	66,67
Spanje	1	0	1	0	0,00
Suid-Afrika	1	0	1	0	0,00
Algeheel	20	5	15	0	25,00

Rekords

Wêreldbekerrekord

Brasilië het tot dusver vir een rugbywêreldbekertoernooi gekwalifiseer. Hulle is tydens die 2025-toernooi egter sonder ’n oorwinning in die groepfase uitgeskakel.

Jaar	Uitslag
1991	Nie deelgeneem nie
1994	Nie deelgeneem nie
1998	Nie deelgeneem nie
2002	Nie deelgeneem nie
2006	Nie deelgeneem nie
2010	Nie gekwalifiseer nie
2014	Nie gekwalifiseer nie
2017	Nie gekwalifiseer nie
2021	Nie gekwalifiseer nie
2025	Groepfase
2029	N.v.t.
2033	N.v.t.

Spelers

Huidige span

Die volgende spelers het die span gevorm tydens die Vrouerugbywêreldbeker 2025:

Agterspelers (zagueros) Speler Posisie Klub Toetswedstryde Aline Mayumi Koeke Skrumskakel Pasteur 11 Leila Cássia Silva Skrumskakel Leoas de Paraisópolis 03 Luiza Campos Skrumskakel Charrua 10 Fernanda Tenório Losskakel Elshaddai 08 Maria Gabriel Graf Losskakel Brothers Rugby Club 04 Raquel Kochhann Losskakel Charrua 06 Carolyne Katrine Pereira Senter Melina 03 Edna Santini Senter São José 09 Mariana Nicolau Senter São José 03 Marina Fioravanti Senter Poli 05 Giovanna Barth Vleuel Maringá 04 Bianca Silva Vleuel Leoas de Paraisópolis 03 Isadora Lopes de Souza Vleuel Melina 07 Yasmim Soares Heelagter Melina 03

Voorspelers (atacantes) Speler Posisie Klub Toetswedstryde Isabela Gomes Saccomanno Haker São José 09 Júlia Leni Lima Haker Curitiba 12 Natália Jonck Haker Brothers Rugby Club 02 Franciele Barros Stut Sporting 11 Giovana Mamede Stut Jacareí 02 Pâmela Soares Santos Stut Charrua 04 Samara Vergara Stut Pasteur 08 Taís Prioste Stut Bobigny 10 Ana Carolina Santana Slot Melina 04 Dayana Dakar Slot Niterói 09 Eshyllen Coimbra Slot Cobras 14 Camilla Ísis Carvalho Losvoorspeler Elshaddai 03 Íris Coluna Losvoorspeler Poli 08 Larissa Carvalho Losvoorspeler Curitiba 08 Larissa Henwood Lima Losvoorspeler Counties Manukau 06 Letícia Medeiros Losvoorspeler Jacareí 09 Letícia Silva Losvoorspeler Melina 05 Marcelle Souza Losvoorspeler Elshaddai 04

Bekende spelers

Tot dusver is nog geen Brasiliaanse speler in Wêreldrugby se Heldesaal opgeneem nie.

Sien ook

• Brasiliaanse nasionale rugbyspan

Eksterne skakels

• (pt) Amptelike webwerf van die Brasiliaanse Rugbykonfederasie
• (en) Brasilië by Wêreldrugby
• (pt) Brasiliaanse rugbynuus