Bremerbrood
Dr. Karl Bremer, minister van gesondheid van 1951 tot 1953 in Suid-Afrika, het baie aandag geskenk aan die armes in die samelewing. Hy het besef dat baie siektes, soos tuberkulose, teëgewerk kan word deur goeie voeding en was daarom 'n voorstaander vir die verryking van voedsel. Hy het vroue aangeraai om botter en margarien as mengsel in die verhouding 1:2 te gebruik. Op sy advies het 'n verrykte bruinbrood in Julie 1952 in die winkels verskyn. Hierdie brood, in die volksmond as Bremerbrood bekend, was verryk met smaaklose vismeel, grondbonemeel, melkpoeier, kalsium en ander konsentrate. Bremer het gehoop om op die wyse genoeg eiwitte, soute en vette in die dieet van die bevolking te voeg. Ongelukkig was die brood nooit gewild nie.