C. de Bruyn
C. de Bruyn is die skrywersnaam van die Afrikaanse skrywer Engela Catharina Langenhoven (née Kool). Sy het hoofsaaklik liefdesverhale geskryf.
Lewe en werk[wysig | wysig bron]
Engela Catharina Kool is die eerste baba wat op die dorpie Morgenzon in die Oos-Transvaal (tans Mpumalanga) gebore is.[1] Sy gaan vanaf haar twaalfde jaar na die Hoërskool Ermelo, waar sy matrikuleer. Daarna studeer sy verder aan die Universiteit van Pretoria en die Pretoriase Normaalkollege. Ná kwalifikasie as onderwyser gee sy onderwys aan die Hoërskool Hoogenhout op Bethal.[2] Op 29 Junie 1940 trou sy op Ermelo met Johan Christiaan Boshoff Langenhoven, ’n broerskind van die skrywer C.J. Langenhoven. Hulle het ’n seun, Philip Hendrik Morkel Langenhoven. Die egpaar vestig hulle toe op Hartenbos, waar sy baie tyd in die plaaslike ATKV-museum deurbring. Later verhuis hulle na Kroonstad, waar haar man timmerman en boukontrakteur is en ook ondervoorsitter van die Nasionale Party-tak op die dorp.[3] Hier gee Engela lank onderwys aan die Spoorwegskooltjie.[4]
Skryfwerk[wysig | wysig bron]
Hoewel die uitgewers munt wou slaan uit haar aangetroude van, besluit sy om eerder onder ’n skuilnaam te skryf omdat sy voel dat haar werk glad nie in dieselfde asem as dié van haar aangetroude oom genoem kan word nie en te pretensieus sou wees. Haar roman, Doodgebore liefdesblomme, is een van sestien romans wat eervol vermeld is in die Liefdesroman-wedstryd wat in 1944 deur Afrikaanse Pers-Boekhandel uitgeskryf is.
Publikasies[wysig | wysig bron]
| Jaar | Publikasies |
|---|---|
| 1946 | Doodgebore liefdesblomme |
Verwysings[wysig | wysig bron]
- ↑ Genealogiese besonderhede volgens die Langenhoven Familieregister, bladsy 42: http://www.langenhoven.net/Langenhovenboek1.pdf
- ↑ Nienaber, P.J. Hier is ons skrywers! Afrikaanse Pers-Boekhandel. Johannesburg. Eerste uitgawe, 1949. bl. 196-197.
- ↑ Langenhoven Familieregister: http://www.langenhoven.net/Langenhovenboek1.pdf
- ↑ Tienie Serfontein se artikel in Volksblad Kroon van 21 Julie 1998: http://152.111.11.6/argief/berigte/volksblad/1998/07/21/8/5.html[dooie skakel]