Cache

Fisiese skyfies wat as SVE-cache gebruik word.

In rekenaarwetenskap verwys die cache (uitgespreek kasj; ook genoem cachegeheue, hulpgeheue en tussengeheue) na 'n versameling data wat duplikate van oorspronklike waardes is, maar wat op 'n ander plek op die rekenaar gestoor word. Cache word gebruik waar dit te veel moeite is om die oorspronklike data te haal, of om te reken, relatief tot die moeite wat dit sou wees om die cache te lees. Cache is dus 'n tydelike stoorarea waar data wat gereeld gehaal word, gestoor word vir spoediger toegang. Sodra die data in die cache gestoor is, hoef die rekenaar nie weer die data op die oorspronklike plek te gaan haal nie, maar kan dit eerder 'n kopie van die data in die cache gaan lees, sodat die gemiddelde tyd wat dit vat om data te prosesseer, verlaag kan word.

'n Newe-effek van gecachede data is dat dit nie altyd op datum is nie. Meeste caches sal ou data vir tyd opdis, tot dit verval en dan verfris word. 'n Goeie voorbeeld hiervan is Wikipedia-bladsye, waar (meestal anonieme) gebruikers nie altyd die nuutste wysigings sien nie. Sodra die cachetydperk verstryk, word die cache egter met die databasis gesinchroniseer sodat die nuutste wysiging aan almal vertoon kan word.