Campbell-versamelings

Die Campbell-versamelings by die Universiteit van KwaZulu-Natal gee ‘n beeld van die geskiedenis en ryk kulturele lewe van die vroeëre bewoners van KwaZulu-Natal.

Hierdie internasionaal-bekende navorsingsinstelling bestaan uit drie afsonderlike eenhede, naamlik die Killie Campbell-Africana-biblioteek, die Mashu-etnologiemuseum em die William Campbell-meubelmuseum. Al die versamelings word gehuisves in die huis Muckleneuk aan die bopunt van Gladys Mazibukoweg (voorheen Marriottweg) in Essenwood in Durban.

Sir (senator) Marshall Campbell (Glasgow, 10 Julie 1848 – Durban, 20 April 1917) was ‘n Natalse politikus, een van die grondleggers van die suikernywerheid in Suid-Afrika en die vader van die bekende William en Killie Campbell. Hy het die huis Muckleneuk hoog teen Berea in die neo-Kaaps-Hollandse styl deur Herbert Baker laat ontwerp en in 1914 laat bou. Campbell is deur sy Zulu-werknemers Mashu genoem en daarom dra die stad wat ten noorde van Durban op sy plaas ontwikkel het die naam KwaMashu, “die plek van Marshall”.

Die terrrein om die huis is tot ‘n besondere terrein ontwikkel. Daar is verskeie inheemse, seldsame en historiese plante. So is daar ‘n piesangplant wat ‘n direkte afstammeling is van een wat voor Tsjaka se huis gegroei het. Ook is daar die unieke kruisings van bougainvillea genaamd Natalia en Killie Campbell.

Bibliografie

• Duggan, J.F.: Killie Campbell se weergalose kultuurnalatenskap. In: Lantern. Tydskrif vir Kennis en Kultuur. Jaargang 13, nr. 3, Maart 1974.
• phambo.wiser.org.za