Carol Clark

in Wikipedia, die vrye ensiklopedie

Carol Clark (gebore 1947) is 'n Suid-Afrikaanse skrywer en digter.[1]

Lewe en werk[wysig | wysig bron]

Sy is in 1947 op Elliot in die Oos-Kaap gebore, waar sy ook matrikuleer. Carol Clark studeer verder aan die Hugenote Kollege op Wellington en bekwaam haarself as 'n maatskaplike werker. Hierna verwerf sy die B.A.-graad en die B.A. Honneurs-graad aan die Universiteit van Suid-Afrika deur deeltydse studie. Sy woon lank aan die Weskus, onder meer op Koingnaas en Langebaan, waar sy bibliotekaresse is en ook vir 'n rukkie Engels gee op die skool by Vredenburg. Sy is getroud en het twee kinders.

Skryfwerk[wysig | wysig bron]

Digkuns[wysig | wysig bron]

Sy publiseer Afrikaanse en Engelse gedigte in letterkundige tydskrifte soos Standpunte, Tydskrif vir Letterkunde en Carapace en debuteer dan in 1984 in die versamelbundel Visier.[2][3][4][5] Hier onderskei sy haar gedigte deur 'n fyn visualiteit en genuanseerde klankspel, met T.T. Cloete wat veral die gedigte Ruimtetuig en Uitvaart in hierdie verband uitsonder.[6] Haar natuurbeelding word veral beïnvloed deur die eiesoortige skoonheid van die Weskus.

Daarna volg die selfstandige bundel Tjienkerientjee se oog is swart.[7][8][9] Die gedigte in die bundel is merendeels liries en eenvoudig, maar bevat nogtans heelwat diepte. Daar is baie natuurwaarnemings in die bundel, wat sy op knap wyse verbind met persoonlike en filosofiese simboliek. Hoewel die oorwegende toonaard melankolies is, skryf sy ook 'n aantal ironiese verse.

Versamelbundels[wysig | wysig bron]

Haar gedig Window dressing word onder andere vir Hoër Graad onderrig in Afrikaans aan Wes-Kaapse skole voorgeskryf. Van haar gedigte word opgeneem in versamelbundels soos Nuwe verset, Sy sien webbe roer, Majesteit, die kat en Die Afrikaanse poësie in 'n duisend en enkele gedigte. In 2020 word haar gedig ‘Grootmaakkind’ in Vers en vrou opgeneem. [10]

Publikasies[wysig | wysig bron]

  • 1994Tjienkerientjee se oog is swart

Verwysings[wysig | wysig bron]

  1. Kannemeyer, J.C. Die Afrikaanse literatuur 1652-2004. Human & Rousseau. Kaapstad en Pretoria. Eerste uitgawe, 2005.
  2. Brink, André P. Rapport. 3 Februarie, 1985.
  3. Cloete, T.T. Tydskrif vir Letterkunde. Jaargang 23 no. 2, Mei 1985.
  4. Grové, A.P. Tydskrif vir Geesteswetenskappe. Jaargang 25 no. 3, September 1985.
  5. ; Le Roux, André. Die Burger, 31 Januarie 1985.
  6. Tydskrif vir Letterkunde. Mei 1985
  7. Hambidge, Joan. Tydskrif vir Letterkunde, Jaargang 34 nos. 1 en 2, Februarie/Mei 1996.
  8. Esaach: http://www.esaach.org.za/index.php?title=Clark,_Carol
  9. ; Hambidge, Joan. Die Burger, 5 April 1995: http://m24arg02.naspers.com/argief/berigte/dieburger/1995/04/05/8/1.html Geargiveer 20 Februarie 2016 op Wayback Machine
  10. De Wet, K. (samest.) Vers & vrou. Kaapstad: Human & Rousseau. 2020