Kleinstreepswael
| Kleinstreepswael | |
|---|---|
| |
| Sangopname uit die Masai Mara-wildtuin, Kenia | |
| Wetenskaplike klassifikasie | |
| Domein: | |
| Koninkryk: | |
| Filum: | |
| Klas: | |
| Orde: | |
| Familie: | |
| Genus: | |
| Spesie: | C. abyssinica
|
| Binomiale naam | |
| Cecropis abyssinica (Guerin-Meneville, 1843)
| |
| Sinonieme | |
|
| |
Die Kleinstreepswael (Cecropis abyssinica) is 'n gedeeltelike trekvoël, 'n algemene groot swael wat maklik verwar word met die grootstreepswael, aangesien die twee baie na mekaar lyk.
Identifikasie[wysig | wysig bron]
'n Volwasse kleinstreepswael is tussen 15 en 17 cm lank met 'n donkerblou bolyf en rooibruin onder die stert. Die kroon, nek en weerskante van die kop is rooi tot rooibruin gekleur. Die onderlyf is wit met donker strepe (die strepe is meer prominent as dié van die grootstreepswael wat fyner strepe het – een van die onderskeidende kenmerke) en die bo-vlerke en ondervlerkse vliegvere is swart-bruin van kleur. Die swarterige stert het baie lang buitenste vere: dié vere is dan ook ietwat langer by die mannetjies as by die wyfies. Jonger voëls se kleure is ietwat dowwer en bruiner, met minder kontras tussen die kleure en ook korter buitenste stertvere.
Habitat[wysig | wysig bron]
Kleinstreepswaels verkies beboste laevelde en word gereeld naby menslike vestings aangetref. Die voël bou 'n bakvormige moddernes met 'n buisagtige ingang aan die onderkant. Die nes het binne-in 'n sagte voering en kan in latere jare herbruik word. Neste word gewoonlik in grotte, onder rotsoorhange of aan 'n boomtak gebou. Die spesie het ook aangepas deur neste in geboue, brûe en ander mensgemaakte strukture te bou. Neste word gewoonlik op die hoogste moontlike plek gebou.
Verspreiding[wysig | wysig bron]
Die kleinstreepswael broei in Afrika, suid van die Sahara, vanaf Sierra Leone en die suidelike dele van Soedan tot die oostelike dele van Suid-Afrika. Die voël is 'n gedeeltelike trekvoël: kleinstreepswaels in Suid-Afrika sal noord trek in die winter. Wes-Afrikaanse voëls verlaat die noordelike gedeeltes van die broeigebiede tydens droë seisoene.
Voortplanting[wysig | wysig bron]
Die wyfie lê gewoonlik drie eiers. Die eiers is glanswit en sommige het soms 'n paar bruin kolletjies op. Die broeitydperk is 14-16 dae en slegs die wyfie broei op die eiers. Beide ouers sal na geboorte die kleintjies voer. Dit neem 17-19 dae voor die jong voëls vir die eerste keer probeer vlieg, waarna hulle na die nes sal terugkeer om vir 'n paar dae te rus.
Dieet[wysig | wysig bron]
Die Kleinstreepswael eet meestal vlieënde insekte, maar sal ook soms sade en klein vrugte eet.
Geluid[wysig | wysig bron]
Die voël se geluid is 'n nasale 9-10 note: tjirp-tjirp-tjirp, kriek, kriek, kriek, tjirp.
Ander name[wysig | wysig bron]
- Engelse naam: Lesser striped swallow
- Wetenskaplike naam: Cecropis abyssinica
Hirundo is Latyn vir "swael" en abyssinica verwys na Abissinië in Oos-Afrika (die ou naam vir Ethiopië).[1]
Verwysings[wysig | wysig bron]
- ↑ Clinning, C. 1989. Southern African Bird Names Explained. Johannesburg: The Southern African Ornithological Society. ISBN 0-620-14140-9
Bronnelys[wysig | wysig bron]
- Sinclair, Hockey en Tarboton, SASOL Birds of Southern Africa, ISBN 1-86872-721-1
- Turner & Rose, Swallows and Martins ISBN 0-7470-3202-5
- Inskrywing van die kleinstreepswael Geargiveer 24 Junie 2007 op Wayback Machine by die webwerf van Birdlife Northern Natal.