Chanette Paul

in Wikipedia, die vrye ensiklopedie
Jump to navigation Jump to search

Chanette Paul is 'n Suid-Afrikaanse skryfster van onder meer speurverhale. Sy is in Johannesburg gebore en het, terwyl sy nog 'n loopbaan in die klerebedryf gevolg het, in 1988 'n meestersgraad in Afrikaanse en Nederlandse Letterkunde aan die destydse Randse Afrikaanse Universiteit (RAU) verwerf.

Chanette Paul skryf in Afrikaans en het al 32 boeke gepubliseer. Sy het met verskillende literêre genres geëksperimenteer en uiteindelik speurverhale met 'n romantiese inslag as haar persoonlike nis ontdek. Paul word onder die belangrikste Afrikaanse skrywers van misdaadfiksie gereken, maar het ook 'n verskeidenheid verhale en humorartikels vir tydskrifte geskryf. Sy is 'n lid van International Thriller Writers en die Afrikaanse redakteur van Crime Beat.

Chanette Paul woon tans in 'n klein huis op die oewer van die Kleine Rivier in die Overberg.

Loopbaan[wysig | wysig bron]

Chanette Paul het altesaam nege skole bygewoon, aan vyf universiteite gestudeer en in sewe Suid-Afrikaanse provinsies gebly. Die eerste literêre werk, waarvoor sy betaling ontvang het, was 'n sprokie wat sy op die ouderdom van sestien geskryf het. 'n Tweede werk het as kortverhaal in haar matriekjaar ontstaan en het later, toe sy al gestudeer het, in die tydskrif Huisgenoot verskyn.

Chanette Paul het haar beroepsloopbaan in die klerebedryf begin, maar tegelykertyd haar meestersgraad aan die RAU verwerf. Haar skripsie is met die Simon Wainstein-prys bekroon. Paul was nog enkele jare in die klerebedryf werksaam voordat sy haarself in 1995 as voltydse skrywer bekwaam het. Vir haar debuutroman, wat in die volgende jaar verskyn het, het sy die Perskor-prys vir die beste romantiese fiksie ontvang. 'n tweede roman, Wip van die droomvanger (1999), was op die Afrikaanse Taal- en Kultuurvereniging se kortlys vir die ATKV-Prosaprys.

Danksy 'n beurs van Human & Rousseau het Chanette Paul in 2003 'n tweede meestersgraad in Skeppende Skryfwerk aan die Universiteit van Kaapstad voltooi. Leila word lig, 'n roman wat in hierdie tydperk ontstaan het, het weer die kortlys vir die ATKV-Prosaprys in 2006 gehaal.

Paul doen sedert 2002 manuskripontwikkeling vir Lapa Uitgewers en bied namens dié uitgewers ook werkswinkels aan. Met haar literêre werk wil sy 'n bydrae tot die "destigmatisering van Afrikaanse ontspanningsfiksie" lewer, maar sy beywer haar ook vir die voortbestaan van die Afrikaanse taal.

Toe Paul in 2007 met die skryf van spanningsromans met 'n romantiese inslag begin het, het sy haar ware literêre nis ontdek. Springgety was die eerste in 'n reeks van vyf romans wat in die Niemandsdorp-omgewing rondom die speurder Gys Niemand en konstabel Faantjie Fortuin afspeel. Die legende van Kruisbaai se visvrou vorm 'n deurlopende tema in al vyf speurverhale. Springgety is opgevvolg deur Fortuin (2008), Boheem (2009), Meetsnoer (2010) en Dryfhout (2011).

Eksterne skakels[wysig | wysig bron]