Charles Rennie Mackintosh
Charles Rennie Mackintosh
Skotse argitek en kunstenaar
Skool
Glasgow School / Jugendstil
Beduidende projekte en werke
Kelvingrove-kunsmuseum in Glasgow
Charles Rennie Mackintosh (* 7 Junie 1868 in Glasgow; † 10 Desember 1928 in Londen) was 'n Skotse argitek, binnenshuise ontwerper, kunshandwerker, ontwerper, grafiese kunstenaar en skilder. Saam met sy vrou Margaret McDonald Mackintosh, haar suster Frances MacDonald McNair en James Herbert McNair het hy die kunsgroep The Four gestig wat onder meer beslissende invloed op die Glasgow School uitgeoefen het.
In Glasgow en Skotland het Mackintosh, soos elders in die Verenigde Koninkryk, in sy leeftyd nouliks erkenning geniet as kunstenaar nie. Dit was vastelandse Europeërs, en hier veral Weense kuns- en ontwerpkringe, wat sy talent raakgesien het. Weense studente het Mackintosh in 'n blomversierde wa deur die stad gery toe hy saam met sy eggenoot Margaret McDonald in 1900 besoek aan die Oostenryks-Hongaarse hoofstad gebring het om 'n uitstalling van sy werk ter geleentheid van die VI. Secessions-Ausstellung by te woon.[1]
Oostenrykers was sodoende dekades vroeër bewus van die betekenis van Mackintosh se kunstenaarskap. Vandag word hy, ook en veral in sy geboortestad, vereer as een van die leidende persoonlikhede van die laat 19de eeuse Art Nouveau- of Jugendstil-beweging wat sy invloed ook op moderne ontwerp laat geld het. Hy word daarnaas as 'n invloedryke voorloper van die Modern Art-kunsstyl beskou. Sy buitengewone stoelontwerpe met hul kenmerkende rugleunings is in rolprente soos Blade Runner, televisiereekse soos Doctor Who asook Madonna se videosnit vir die treffer Express Yourself gebruik.[2]
Mackintosh se argitektoniese meesterwerk, die Glasgow School of Art (GSA) (intussen ook bekend as Mackintosh-gebou), het sedert die 19de eeu as 'n eersterangse kunsskool gedien wat in die middel van die GSA se kampus op Garnethill geleë was. Mackintosh, wat sy akademiese graad hier verwerf het, het die opgedrag gekry om 'n nuwe hoofgebou vir die kunsskool te ontwerp wat in twee fases tussen 1897 en 1909 ontstaan het. Die gebou met buitengewone stylelemente, waaronder vensters wat volgens die Japannese Sjogoen-styl ontwerp is ('n huldeblyk aan Glasgow se uitgebreide handelsbetrekkinge met Japan in die laat 19de eeu), het lesingsale, biblioteek asook studente en akademiese personeel se privaat woonvertrekke gehuisves.
In Mei 2014 is die kunsskool se wesvleuel, insluitende die biblioteek, deur 'n brand ernstig beskadig. Restourasiewerk was steeds aan die gang toe die gebou in die nag van 16 Junie 2018 deur 'n verwoestende brand volledig vernietig is. Meer as 120 brandbestryders het die vuur beveg. Kier Construction Scotland - die onderneming wat die restourasiewerk behartig het - het volgens nuusberigte geen sprinkelaars geïnstalleer nie.
Volgens sommige deskundiges was die hitte van die vuur so groot dat die skool se bouval moontlik afgebreek moet word. Die omvang van die skade, wat aan die buitemure aangerig is, sal nogtans eers deur 'n latere inspeksie vasgestel kan word. Die hele gebou is egter tydens die restourasieproses opgemeet en alle besonderhede gedokumenteer, terwyl baie van die interieur in stoorplekke buite die skool bewaar is. Tekeninge, foto's en 'n digitale bouplan sal die heropbou moontlik vergemaklik.[3]
Verwysings
- ↑ BBC Scotland News, 7 Junie 2018: Charles Rennie Mackintosh and the rooms that inspired Europe. Besoek op 17 Junie 2018
- ↑ The Guardian, 7 Junie 2018: Charles Rennie Mackintosh: 'He was doing art deco before it existed'. Besoek op 17 Junie 2018
- ↑ BBC News, 17 Junie 2018: Glasgow art school blaze: Expert warns it may have to be demolished. Besoek op 17 Junie 2018