Commissionerstraat (kiesafdeling)

Commissionerstraat was 'n kiesafdeling in Johannesburg se middestad vir die Suid-Afrikaanse Volksraad vanaf die heel eerste algemene verkiesing op 15 September 1910 ná Uniewording op 31 Mei daardie jaar.

In die eerste verkiesing in Commissionerstraat wen een van die leiersfigure in die Arbeidersparty, Henry Sampson, met 'n meerderheid van net 40 stemme teen die Unionisteparty se R. Curry. Die Sosialiste Party se J. Davidson was derde met 25 stemme, vergeleke met Sampson se 924. In daardie verkiesing het die Arbeiders net drie setels gewen, maar die Unioniste 36 en die Amptelike Opposisie in die Volksraad geword nadat die Regerende Party 66 setels uit die 121 gewen het.

In 1915 neem die Suid-Afrikaanse Party Commissionerstraat by die Arbeiders af toe H. Graumann vir C.H. Hayward met 'n meerderheid van 485 verslaan. Die Arbeiders verhang egter die bordjies in 1920 en J.H.S. Gow wen Commissionerstraat terug toe hy die S.A.P. se W.J. Laite verslaan met 'n meerderheid van net 47. Die onafhanklike S.P. Bunting was derde met 57 stemme. Graumann tree egter in 1921 weer as wenner uit die stryd toe hy 1 181 stemme kry vergeleke met Gow se 713.

Dit was die laaste verkiesing in Commissionerstraat, want voor die verkiesing van 1924 is dit tydens 'n herafbakening afgeskaf.

Partye en kandidate gewen

• 1910 - Henry Sampson van die Arbeidersparty
• 1915 - H. Graumann van die Suid-Afrikaanse Party
• 1920 - J.H.S. Gow van die Arbeidersparty
• 1921 - H. Graumann van die Suid-Afrikaanse Party

Bronne

• Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.