Computex

in Wikipedia, die vrye ensiklopedie



Taipei International Information Technology Show


Uitstallingsterrein



Taipei Wêreldhandelsentrum
&
Taipei Wêreldhandelsentrum se Nangang-uitstallingsterrein


Gasheerstad

Taipei
Vlag van Republiek van China Republiek van China

Computex Taipei, of Taipei International Information Technology Show (Chinees: 台北國際電腦展 , algemeen bekend as Computex), is 'n handelskou vir inligtingstegnologie wat sedert 1981 jaarliks in Taipei, die hoofstad van die Republiek China (Taiwan) gehou word.

Dit is tans die grootste handelskou van sy soort in Asië en sedert die vroeë 2000's naas die Europese CeBIT en die Amerikaanse Consumer Electronics Show (CES) ook een van die belangrikste IT-handelskoue ter wêreld.

Ontwikkeling[wysig | wysig bron]

Die Computex-handelskou word gemeenskaplik deur die Taiwannese Raad vir die Ontwikkeling van Buitelandse Handel (Taiwan External Trade Development Council, kort TAITRA), wat deur die Nasionaal-Chinese regering befonds word, en die Taipei Computer Association (TCA), 'n privaatinstelling, georganiseer.

Die eerste handelskou, wat destyds nog Taipei Computer Show genoem is, is in 1981 aangebied en het hoofsaaklik as 'n forum gedien waar klein- en middelslagondernemings uit Taiwan se ontwikkelende rekenaarbedryf hul produkte kon uitstal. Die naamwysiging na Computex gaan terug op Stan Shih, 'n voormalige hoof van TCA, wat sy voorstel ter geleentheid van die vierde handelskou gemaak het.

Nadat Taiwan se inligtingstegnologiebedryf in die vroeë 1990's stewige groei getoon het en die Raad vir Buitelandse Handel se uitstallingsterrein op Taiwan se Songshan-lughawe vir die 8ste en 9de handelskou weer in gebruik geneem is, is die Computex-handelskou steeds verder uitgebrei en het tot een van die belangrikste uitstallings vir die internasionale rekenaarbedryf ontwikkel. Dit is tans die grootste IT-handelskou (nadat die CEBIT, wat tot 2018 in Hannover, Duitsland aangebied is, gestaak is) waaraan die wêreld se belangrikste vervaardigers uit dié bedryf, waaronder Intel, AMD, Nvidia, Microsoft en ander, asook inheemse ondernemings soos Acer en Asus deelneem.

Computex 2012 het sowat 130 000 besoekers gelok, waarvan 36 500 internasionale besoekers uit 172 lande. Meer as 4 000 kopers uit die IT-bedryf het kontrakte met Taiwannese uitvoerders gesluit.[1]

Verwysings[wysig | wysig bron]

  1. Computex 2012: Die Highlights, in: PC Welt, nommer 8, 2012, bl. 13

Eksterne skakels[wysig | wysig bron]